Read Lamkang MAK 8 Bible Online

MAK 8 - Lamkang bible

MAK 8

¹Ava nit lik thung ngi, mii mluwng pa ngi mthuw kurtuwl nowl thungta, mdo chaak raan do khat lee am mda, Mma ngi msiikhu rek own thida mhin inni theda,

²“Kuplung kakhamma, hava kurtuwl mii rekka, mleija nii kdum lik thung ngi mi amṭhiin da, mdo chaak raan do khat lee thloi chlam me.

³Poi ktham daatti mi inn thaan kupsun lambi, lam tha puwrthlowk ki klou kro lam; ungu mii angṭhea lam kla ki kthleng chlam.”

⁴Ungbi msiikhu rekki Mhin arthawng da, “Tak heppi houja pang mii knemma kbowk laiju Miilai khdaat va thenpen ni kpamaal rang ki da?”

⁵Ungta Mma ngi mhin inni khewl da, “Thenpen tija athloi inna?” Ungbi, “Tikheu,” di lamda.

⁶Ungta Mma ngi kurtuwl mii rekka dul leen mku on nraan paureen da; ava dilli thenpen tikheu louda, panpaak thida, khui da msiikhu rek hin mii rek maiṭhuwmmi mdo down nraan pii da, ungbi mmaanni kurtuwl mii rek maiṭhuwmmi down pik lamda.

⁷Ungta mmaanni tuwlva kdil sisi mruk thloi lam da; ava ruk phowl kṭha parlaan thida mmaiṭhuwm inni mdo down nraan paureen da.

⁸Mii mkheng nga poi kpa sappi maal da, mkikleem kṭik ava tomkal tikheu kdim jilli purkuk lamda.

⁹Ungta mii rekka pun plii arveel.

¹⁰Mma ngi mii rekka psun lam thida; arkuwng leen msiikhu rek tu kal teng lamda, Dalmanutha paamkowl tha vang lamda.

¹¹Ungta Mma hin Pharisi rek thleng lam da karteen ṭhi lamda, mdo pirsin naanni parwaan ki titinna mhai tdet in di lamda.

¹²Ungta pthla ngi Mma ngi tdaal ṭen ring thida the da, “Talu leiji hava charuwl va titinna mdo thlaam da? Kinditti, Neiji ahin thaanni kthea, hava charuwl hin titinna pii ni me.”

¹³Ungta Mma ngi ma thi lamda, arkuwng leen tuwng nowl da raalpha khat ktong tha vang kunsun da.

¹⁴Tunva mmaanni arkuwng leen thenpen mdo hur raan parngiil chdok lamda; khdaat chrel hur lam da.

¹⁵Ungta Mma ngi mhin inni mluw klek thida theda, “Pharisi rek leh Herod thowl cheek asin dei chaan.”

¹⁶Ungbi mmaanni khat leh khat karteen psuk nlam da, “Thenpen thloi maan min.”

¹⁷Ungta Jisu ngi deida mhin inni theda, “Thenpen ado thloi maan leiji talu ki ngi karteen in pti? Tun kpha thung ngi kdei mdit mata kdei pindi kurthuwk maan ti mo? Aplung inna kapchai set set daat mo?

¹⁸Mik kthloi daatti kdei kma, knaa kthloi daatti karyaa kma pa in pti mo? Naanni bin pha liit maan ti mo?

¹⁹Neiji mii pun parnga do chaak ra thenpen parnga kdo pkui, ava tomkal tija kdimmi mkekleem kṭikka apurku in?” Mmaanni Mhin the lamda, “Sowm lei knii.”

²⁰“Ungta mii pun plii do chaak ra thenpen tikheu kdo pkui mkekleem kṭikka tomkal tija kdimmi apurku in?” Ungbi mmaanni theda, “Tomkal tikheu.”

²¹Ungbi Mma ngi mhin inni theda, “Naanna kdei pindi liit kma pa in pti mo?”

²²Ungta mmaanni Betsaida tha arvang lamda. ungbi mii angṭhe ngi mik ktot khat Mhin ṭhi paphaak da, mdo kmei pik nra the chlam da.

²³Ungta Jisu ngi mik ktot ava mkhut tha kjowng da, khuwduwn tha ṭhi da; mmik leenni Mma ngi ptil pthot da, mleenni mkhut mkhiin pik dilli, Mma ngi mhin theda, “Khuw adea?”

²⁴Ungbi mma ngi khuw hansuw thida theda, “Mii kdea; pdainu ding rek kchet heppi kdea.”

²⁵Ava dilli vei khat nowlli mleenni mkhut khiin pik da; msut rim thungta, do khim khai kindit chelli dei da.

²⁶Ungbi Jisu ngi mi inn tha van sii thida theda, “Khuw thung ngi vang lut ma.”

²⁷Ungta Jisu ngi msiikhu rek tu Kaisaria Philippia khuw rek tha vang lamda; ungta mmaanni lam tha mvan slii arlaanni, Mma ngi msiikhu rek hin pau khewl lamda, “Mii rek va Neia ku pi mti dit lamda?”

²⁸Ungbi mmaanni Mhin the lamda, “Baptis kuptlot Johon; ungu angṭhe rek va Elija pi di lamda; ungta angṭhe rek nowl va khulpu rek arlakki khat pi di lamda.”

²⁹Ungbi Mma ngi mhin inni khewl lamda, “Pdainu naan va Neia ku pi ati dit inna?” Pitor ri arthawng da, “Nah Khrista pti.”

³⁰Ungbi ku mii khat lee hin mmaanni mdo the thut ma nraan mhin inni Jisu ngi pau pṭum da.

³¹“Mii Chapa ava do knem pokki suwk kthuwk ra, kver rek, thiimpu kinreel rek, Nowlam chukpu rekki Mma ava pthlei donle, ke eayou ra,ungu nii kdum dil tha kring kardel ra,” dida Mma ngi kpurchuk pṭhun da.

³²Mma ngi havaa kurphuwng ngi the da. Ungbi Pitor ri ṭhida, Mhin kurkowk pṭhun da.

³³Pdainu Mma ngi mdil kinle da msiikhu rek msut daat chunni Pitor ra raida theda, “Kdil tha kursown dok, Seitaan! mleija nang nga Isowr ktong ki pti pme, pdainu dulti mii rek hinki pti.”

³⁴Ungta Jisu ngi kurtuwl mii mluwng pa leh msiikhu rek Mhin own thida, mhin inni theda, “Ku mii khatti Nei kdil mṭoi nuwm bi, mdaksaa kulro mso, mdaksaa khros ahur sora Nei kdil aṭoi chaso.

³⁵Mleija ku mii khatti mrinkhu maktlan nuwm bi ava kmaang chra; pdainu Nei ktum ungu kṭha paumin tummi ku mii khatti mrinkhu mpiik chaak bi, mma ava kaktlan pik ra.

³⁶Mleija mii ava ngi dultipaam thungki pha chthi sora mrinkhu mkartlaai chaakku, ava talu ksi rang?

³⁷Mleija mma rinkhu ava mii ngi tak heppi kpinlet pik rang?

³⁸Mleija ku mii khatti losang kṭhi ungu pnu kirvei ki charuwl hava thung ngi Nei ungu kṭha pauna rek tummi ningkja mkursoi bi, Mii Chapa ruk va Mpah laarnee ngi kchiir waan tamsii rek tu murjun mpha thu ningkja ksoi ra.”