Read Lamkang LUK 1 Bible Online

LUK 1 - Lamkang bible

LUK 1

¹Mrot khim khai thu mii knempok ki nenni tup ṭut dok in mkheng hot na lamda,

²mupṭhun daat ki mikki sakhi kurthuwk rek ungu pauna ktlo rekki nen nhin inni mido tparlaan in heppi,

³nei ktum rukku kṭha kurthuwkka, mpha mruk karvang dok thung ngi, do mkheng nga knai tekki pṭoi chnu, kheel sii ngi kinreel Theophilas nah atumra, parnaak jik nu akikjit pikka,

⁴hava le mlei thung ngi nah do aryaak dok mkindit ava ado dee ra. s1 Baptis Kuptlot Johon ṭou nra mdo Thethut

⁵Judia ki kruwng Herod nit rek thung ngi,Abija rilam thungki mmiing Sakharija tdit thiimpupa khat amda; Ungta Aron chanu mmiing Elijabeth tdit mnu mei khat thloi da.

⁶Ungta mikniing inni Isowr maiṭhuwm thung ngi rinkindit ti am lamda, paureen rek mkheng thu chet lamda, ungu karmang deekki Mukpu Nowlam pṭoi lamda.

⁷Pdainu nao khat lee thloi chlamme, mleija Elijabeth ta nao kuplu kma kurthuwk da, mikniing inni mkum inna der chlam da.

⁸Tunva thiimpu khat kurthuwk ki Isowr maiṭhuwm mi luwbuk Inn thu mnit ki sok mlo chaak slii arlaanni hanto thuwk da.

⁹Thiimpu rekki mdo tlot kcho in nopa khat pchel piik msut in thungta, Mukpu luwbuk Inn thung ngi mikrim kdi rei dii lulu kṭong ava kapkaa rang nga mma kchol lamda, ungbi mma ngi Mukpu luwbuk Inn thu van lut da.

¹⁰Ungta kurtuwl mii rek mkheng ava mma ngi mikrim kdi reidii kṭong mapkaak arlaanni duwn tha ṭhil chlam da.

¹¹Ungta mikrim kdi reidii kṭong mdo pkaak naan kchiir suwlbuwr chang ktong tha Mukpu waan tamsii khat rip da mhin ktardet da.

¹²Ungu Sakharija ngi Mma mdee thungta, kdung ngi piir da ṭi chda.

¹³Pdainu waan tamsii ngi mhin theda, “ṭi ma Sakharija! Ado ṭhil chaakka ataryaak pikka, ungta anumei Elijabeth ti chapa khat akuhur pik ra, ungu mmiing ava Johon di nadi.

¹⁴Ungta plung ngam mi kanpa ndi, ungu mma ṭou nitti mii knempok ki kanpa chra.

¹⁵Mma ava Mukpu maiṭhuwm mi klin lang lang kurthuwk ra, mma ngi rik rou dii knee mata kipri tlo nime; mnuh poi thungki kupṭhun ni pthla kchiir ri pum dimmi kdim chra.

¹⁶Ungta mma ngi Isreel nao rek mii knempok ava, mmaan ki Isowr Mukpu ktong tha kpinle ra.

¹⁷Ungta Mdu sukki Elijah ki rutan leh pthla ngi kvangra, Mpahle ngi mnaole hin plung mdo pinlet nra ungta, pau kleek rek ava kindit lousing ktong tha kṭhii ra, Mukpu ktongtha mii rek kurchuwl nra kpurthlon pik ra.”

¹⁸Ungbi Sakharija ngi waan tamsii hin theda, “Tak heppi neiva hava dei nik da? Mleija neia kder kcha ping, ungu knumei rukka kum kder cha.”

¹⁹Ungta waan tamsii ngi mhin arthawng da, “Neia Isowr am na thung ngi krip Gabriel ava ping; hava kṭha paumin ahin ksin ra, ungu ksong ra Neia mdo tsi.

²⁰Ungta asuw, havale mvee dok du khim khai, rim kdi am chna di, pau dei nim ti, mleija mmaan mpha thu kurkhum rang ki Nei kpauna rek ava rin cha mti.”

²¹Ungta mii rek va Sakharija arda daat lamda, luwbuk Inn thung ngi mukto dok leiji mmaanna ngak chlam da.

²²Ungu mma ngi duwn tha marvan thuw thungta, mhin inni pau chip pchaang mda, ungbi luwbuk Inn thung ngi mik kleng mun na kdi ngi bin lamda; ungta mhin inni khutti partam da mpau kthuwk kma ngi am chda.

²³Ungu msoklo ava mṭut thungta mma ngi mi inn tha vang da.

²⁴Hava nit dil tha mnumei Elijabeth ti nao hur da, ungu thla parnga lik thung ngi kurdowl da, theda,

²⁵“Hanto Mukpu ngi mbom chda, mii rek do sut na thung ki ning kja mlo pthii pik chda.

²⁶Thla truk diltha waan tamsii Gabriel li Isowr hinki Galil ki Nasareth khuwpii tha Pthla ngi siida.

²⁷Devid charuwl thungki mmiing Joseph mdo dit pselpa khat ava ngi mmiing Mery tdit ktlang dang snu ava hin inn thlot dok da.

²⁸Ungta Mma ngi mhin arjungda theda, “Kdaai am so, O mdo san khat nang, Mukpu ngi atṭhia!”

²⁹Pdainu mma ngi kdung plung pja da theda, hava mdo turvuija talu lei ki da kdingi plung ngi bin da.

³⁰Ungta waan tamsii ngi mhin theda, “ṭi ma, Mery, Isowr dosan nang ngi aphaak chaakka.

³¹Ungu asuw, apoi thung ngi nao hur ti don Chapa khat plu na di, ungta mmiing ava Jisu di na.

³²Mma ava klin langlang ra, Ungu kparthaang sii ki Chapa kdira; ungta Mma hin Mukpu Isowr ri, mpah Devid ko onna Mhin kpii ra,

³³Ungta Mma ngi Jakob charuwl tunni kṭuw knai kma kpaal ra; ungu Mma Kruwngpaam ava kṭuw tdit amnime.”

³⁴Ungbi Mery ngi waan tamsii hin theda, “Hava tak heppi kurthuwk rang, neia innpu kdo thloi mak pa?”

³⁵Ungta waan tamsii ngi mhin theda, “Pthla kchiir nah aleen kurjung ra, ungu kparthaang sii rutan ava ngi aju kupkhum ra; ava leiji Isowr Chapa Kchiir nao khat plu nadi.

³⁶Ungta asuw, nah arilam kthuwk snu khat Elijabeth ruk va kum mder chaak dil thang ngi mma ngi nao mdo hur ava hava ngi mthla truk na a.

³⁷Mleija Isowr hinva kurthuwk kma ra do khat lee ame.”

³⁸Ungbi Mery ngi theda, “Asuw, neia Mukpu ki khut do seem sra owr khat ping; Nah pauna dil kṭoiji ki hinni kurthuwk so,” Ungta mma hinki waan tamsii ava sunda.

³⁹Ava nit rek dil tha Mery ngi kardel da Judia khuwpii khat mulpaam tha kuknotti vangda.

⁴⁰Ungta mma ngi Sakharija inn thu lut da Elijabeth arvui chda.

⁴¹Ungu Mery do arvui Elijabeth ti maryaak thungta, mpoi thung ki nao ava kunchowm da, ungu Elijabeth ta pthla kchiir ri dim chda.

⁴²Ungbi mma ngi kdung owngda, theda, “Nah snu rek arlakki asuw kṭha, ungu apoi thungki thei ava msukṭha!

⁴³Ungta talu leiji hava ado trot pikda, ditta neiki Mukpu nuh ava ngi nei kihinni athlen daatta?

⁴⁴Mleija asuw, nah do arvui chaak kaknaa thung ngi mthlen daat le, kpoi thungki nao ava mkanpatti kunchowm da.

⁴⁵Ungta Mukpu hinki pau ava kurkhum ra dida krin cha mii ava msukṭha.”

⁴⁶Ungta Mery ngi theda, “Kraothla ngi Mukpu panpaak da,

⁴⁷Ungu kapthla ngi nei makaktlan pik Isowr panpaak chda,

⁴⁸mleija ktuwl kcha Mma ki sra owr nei ava msut pik chda. Mleija asuwn; tun ki kupṭhunni charuwl mii mkheng ngi asuwkṭha a, di donle mo ko own chra.

⁴⁹Mleija mruktang Mma ava ngi nei ktummi, klin lang lang nong mtlot pik da, Ungta Mma miing ava Kchiir kurthuwk.

⁵⁰Ungta Mma plungnee ava Mma kṭi charuwl rek khat thungki ngi, charuwl khat kpha ngi am da.

⁵¹Mkhut ti Mma rutan ava tdet da, ungta plung ngi purdun susu kpohok mii rek ava, Mma ngi kpinvei pthii ra,

⁵²rutan kthloi rek ava Mma ngi mkon naan thungki kupchowm pthiira, ungta kchowm langlang ngi ka am rek mii ava kikhiing ra.

⁵³Poi ktham rek ava do kṭha ngi papa da ungu, suwang rekka ktlong ngi sii pthiida.

⁵⁴Mma ngi muplungnee mdobin phaak leiji, msra owr Isreel bomda,

⁵⁵Mleija nenki npah le hin mdo the heppi, Abraham leh mma charuwl rek hin tha kṭuw knai kma ngi mdo the!”

⁵⁶Mery ngi thla kdum arveelli Elijabeth am ṭhi da, thida mi inn tha vang kinle da.

⁵⁷Tunva Elijabeth ti nao mdo pluk na ki mpha arvang da, chapa khat mma ngi pluda.

⁵⁸Ungta Mukpu plungnee klin langlang mma hin mdo tdet ava mrilam kthuwk rekki maryaak in thungta, mma tu kilṭhi ngi kanpa chlam da.

⁵⁹Ungta mnii tret na ngi nao ava vunmor kreen ra arva lamda. Ungu mpah miing kdu jikki mmiing ava Sakharija di lam donle mdo thowl raan,

⁶⁰Pdainu mnuh ngi theda, “Anto rang pme Johon dida ti the raan.”

⁶¹Ungbi mmaanni mhin the lamda, “Nah arilam thu miing kuhur ku khat lee ktaak pa.”

⁶²Ungta mmaanni mpah hin partam lamda mmiing ava ku rangda kdingi khewl lamda.

⁶³Ungu mma ngi mdo kjit nra phel khat ṭhil lamda, ungu kjit da, “Mmiing ava Johon ra.”

⁶⁴Ungta tun kat daatti mner kparvang da, ungu miplei kurkol da, mma ngi Isowr panpaak da theda,

⁶⁵ungta mveen rek mkheng ngi ṭi lamda. Ungta Judia mulpaam mkheng thung ngi hava ki pau ava karvel da.

⁶⁶Ungta karyaa mii rek mkheng ngi muplung in thung ngi arkhii lamda, the lamda, “Hava naova tak hep kdu lu rang ki da?” Mleija Mukpu khut ti mma ava ṭhida.

⁶⁷Ungta mma pah Sakharija ava Pthla kchiir ri dim chda, pauphuwng da theda,

⁶⁸“Isreel Mukpu Isowr ava msuw kṭha, mleija mmii rek kaktlan pik rang ngi velda.

⁶⁹Ungta Mma sra owr Devid inn thu, nen ntum raan tkirliin nraan ki, arkii khat mi sin khiin pik inda.

⁷⁰Alraang ki kchiir khulpu rek nerri tipthe thuw dok da.

⁷¹Nen mi kusnuwm kma rek thungki, mi kaktlan pik raan, ungu nen mikipder chaan thungki;

⁷²nen npah le hin plungnee ki chii mdoreel dok ava ktlo ra, Mma ngi Kchiir paurina ava mdo bin phaak na ngi,

⁷³nenki npah in Abraham hin pau ava mdo reel dok,

⁷⁴nen ava kusnuwm kma rek khut thungki mi do tak ktlan pik dok in, kṭi liit kma Mma sok talo chaak nraan,

⁷⁵Nenki rinkhu nit rek mkheng thu kseeng deek, rinkindit deekki ta am nraan kurthuwk.

⁷⁶Ungta nao, nah, kparthaang sii khulpu di donle ako own ra; mleija Mukpu maiṭhuwm mi chet ti don, Mma lam purchuwl pik nadi.

⁷⁷Mma mii rek hin mupnu ton in mdo ptlot pik naki tkirliinna lousing kpii ra,

⁷⁸kparthaang hin ki nit rek ava nen nleen murjun tlaak mpha thu, nenki Isowr plungnee thu,

⁷⁹kjiingnu leh kdiyou arlim thung ngi, kuk ong mii rek hin mar awng kpii rangki, ungu kdaai lam ava thu nen nkhu in mikpii kchaan kurthuwk.”

⁸⁰Ungta nao ava ruktang ngi pthla ngi lin saang da, ungta mma ngi Isreel mii rek hin maktardet na ki nit mphaak du khim khai kbowklaiji am chdaat da.