Read Lamkang LUK 10 Bible Online

LUK 10 - Lamkang bible

LUK 10

¹Hava dilli Mukpu ngi murson rek som tikheu ava Mma che nra khuwpii ktai leh mmun ktai thu knii nii ngi mdu tha sii lamda.

²Ungta Mma ngi mhin inni theda, “Tkhau ra ava knempokka, pdainu kakhau ra mii amme, ava ngi mlei kurthuwk da, Mukpu ngi takhau nrang thung ngi kakhau ra mii knempokki mdo sii nra aṭhil chaan.

³Alamṭoi nraan tha chet in, asuwn, Tkei rek arlakki jao rek lulu ngi, Neiji naanna aksii inna.

⁴Sum khau, thongja, khukok rek, khat lee kuhur rome; ungta lam thung ngi ku mii khat lee hin salaam ktlo rome.

⁵Naanni inn thung ngi aluwn mpha thu ru kri ngi ‘Hava inn thung ngi kdaai am so!’ adiin ra atheen.

⁶Ungta ava thung ngi kdaaiki chapa ma ambi, naan thungki kdaai ava mma leenni amso, pdainu ma am mabi, ava naan leenni kinle chra.

⁷Ungta mmaan do piik ava achaa anee in, inn ava thung ngi jiam daat in, mleija nong klou mii ava ngi marda man mdo ngeen chaak; inn khat ki ngi inn khat tha kun thot maan.

⁸Naanni khuwpii khat thung ngi alu in mpha thu, mmaanni atarlaan chaak inta, naan hin ado tdown pik in then ava achaan;

⁹ava thu kukoi mii ava apdam pik chaan, ungta mhin inni atheen, Isowr Kruwngpaam ava naan hin knai tekka.

¹⁰Pdainu naan luna khuwpii ava ngi atarlaan chaak maan ta, mlam ktai thung ngi chet inra atheen,

¹¹‘Naan khuwpii thungki vaiphul neen kukhu leen inni kpop ava, naan ado kupsul naan ni kukṭhot pthiinna; anto daat joso hava adei in, mleija Isowr Kruwngpaam ma knai tekka.’

¹²Neiji naan hin kthea,nit ava thu khuwpii ava hinva Sodom mi kdiil pchaang bet ra.

¹³“Khorasin nah tija thung ngi asuwkthi daatta! Bethsaida nah tija thung ngi asuwkthi chdaatta! Mleija naan thung ngi nong rek klin klin kthuwk ava Tyr leh Sidon thu ktlo mkurthuw tlaangbi, alraang raang ngi buwkthi kpurkhum lam donle, purvut kurbuk lamdon, plung ren kuhur chdok lamra.

¹⁴Pdainu makṭewl nit thungva, naan hinva Tyr leh Sidon ni kdiil dei bet chra.

¹⁵Ungta Kaparnahum nah parwaan kpha dekki kchuwng pti mo? Nah sim thu kbuk chna di.

¹⁶Naan hin karyaa kcha mii ava ngi Nei kihin mdo taryaak, naan akipthlei in mii ava ngi Nei mdo tipthlei, ungta Nei mkipthlei mii ava ngi Nei mju ksii Mma ava mdo pthlei.”

¹⁷Kanpa ngi som tikheu ava kinle da, theda, “Mukpu, Nah amiing ngi tarnam rek ruk neen kukurdu tha am chda!”

¹⁸Ungbi Mma ngi mhin inni theda, “Parwaan ki kowl kiplek heppi seitaan ktla Neiji kdee.

¹⁹Asuwn, naanni pruwl rek leh ruwlparthi tun ado ther tap nraan, ungu aksnuwm kmaan ava rutan mkheng leen, Neiji rutan ado kpiik dok in; ungta do khat lee ngi sul apurnul in nime.

²⁰Anto daat joso pthla rekki naan kurdu ngi ka amma kdingi kanpa maan; pdainu naan amiing in ava parwaan tha mdo kjit dok kdingi kanpa chaan.

²¹Ṭhang ava kat thung ngi Jisua pthla kchiir ri kanpa da theda, “Apah, parwaan leh dulti ki Mukpu, Neiji akpanpaak chaakka, mleija Nang ngi hava lea ksing leh kdei pandi thungki kurdowlli thii tinu, ungta nao kdowng rek hin purphuwng tinu; O, Apah, hava lea Nah plungnee dongei chaak.

²²“Hava le mkheng nga Kpah ngi Nei kihin mdo tparlaan dok; ungta Mpah kma donle Mchapa ava ku tdit ku mii khat lee ngi dei me, mata, Mchapa ungu Mchapa ngi mdo purphuwn nra mdo kchol rek ku mii khat ava kma donle, Mpah ava ku tdit ku mii khat lee ngi dei me.”

²³Ava dilli siikhu rek hin karheel da tuprut ti Mma ngi mhin inni theda, “Naan do dee kdei cha mii rek ava msuw kṭha!

²⁴Mleija Neiji ahin thaanni kthea, khulpu rek leh kruwng rek maknem mi, naan dodee ava dei chnuwm lamda, pdainu dei chlamme, ungta naan do aryaak ava aryaa chnuwm lamda, pdainu aryaa chlam me.”

²⁵Ungta asuwn, Nowlam chukpu khatti rip da mdo pirsin na ngi Mhin theda, “Chukpu, neiji talu tloda kṭuw knai kma ki rinkhu ava pha chnik di?”

²⁶Jisu ngi mhin theda, “Nowlam thu talu mikjit da? Tak heppi apat?”

²⁷Ungta mma ngi arthawngda, “Nang ngi nang ki Mukpu nangki Isowr ava aplung ril mkheng, araothla mkheng, arutan mkheng, ado bin chaak mkheng tu wonsat adolo ra; ungta aveen ava adaksaa lulu ngi wonsat adolo ra.”

²⁸Ungbi Mma ngi mhin theda, “Kindit deekki nang ngi arthaanna, hava atlo ungu ring nadi.”

²⁹Pdainu mma ngi mdaksaa kpindit nuwm da, Jisu hin theda, “Nei kveenna kule da?”

³⁰Jisu ngi arthawng da, “Miilai khat ava Jerusalem ki ngi Jerikho tha jungda, ungbi namtrom rek khut thung ngi tla da, ungu mdomna lowng chlam thida bun lamda, kdiyou lulu ngi ma pthii lamda, ungu sun chlam da.

³¹Tunva mpha ava kat thung ngi thiimpu khatti ava lam junṭoida, ungu mma ngi ava mdee thungta, khat ktong tha lam lep da jung da.

³²Ava lulu ngi Levi khat rukka mmun ava thung ngi thleng da, mma ngi mdee thungta khat ktong tha lam lep da jung da.

³³Pdainu Samaria miilai khat va kipjiin kcha ngi mma amna tha thlengda, mma ngi mdee thungta wonsat lo chda,

³⁴hai pha da, mlim na rek ava thao leh rik rou dii pbul pik thida bowl pik da, mma saaṭhi ava leenni ptuwngda, malthlun na inn khat thung ngi ṭhida, ungu sok lo chda.

³⁵Ungta mupduk nii va mma ngi dinarii knii louda malthlun na ksut pṭoi mii ava hin theda, ‘Mma ava tuk mhai sut pik cha, ungu nang ngi kheelli ado pche ava neiji karvan kinlet thung ngi achoi chdaat nik di.’

³⁶Hava miilai kdum rek arlakki ku ngi namtrom khut thung ngi ktla mii ava veen kurthuwkka, nang va ku rang ngi abinna?”

³⁷Mma ngi theda, “Mma wonsat klo cha mii avara.” Ungbi Jisu ngi mhin theda, “Vangra ava heppi atlo.”

³⁸Tunva mmaanni lam tha hanto mche slii arlaanni, Mma ngi khuw khat thu lut da, mmiing Martha tdit snu khatti mi inn thu pthlung chda.

³⁹Ungta Mukpu khu ther ri ku ongda Mma do purchu karyaa kcha mmiing Mery tdit mnaonu khat amda.

⁴⁰Pdainu Martha ava msoklo ra mnem leiji mning mulda, Mhin vada theda, “Mukpu, knaonuva nei kthii ndaat sok klou rang nga mhai ma pthiida, ava Nangva tuk msut pik nim timo? Mdo tbom nra mhai the pik cha.”

⁴¹Pdainu Mukpu ngi mhin arthawng da, “Martha, Martha, nangva do knempok leen aning mulda aplung kjiing nga;

⁴²do khat pang akriinna. Mery va mma thungki talo pchaan mara kṭha ava mtum rang ngi mukchol chaakka.”