Read Lamkang LUK 11 Bible Online

LUK 11 - Lamkang bible

LUK 11

¹Mma ngi mmun khat thung ngi ṭhil slii da, ungta mupṭut dok thungta, msiikhu rekki Mhin theda, “Mukpu, Johon ni msiikhu rek mdo purchu heppi tiṭhil chaak na mhai purchuk chaan.”

²Ungbi Mma ngi mhin inni theda, “Naanni aṭhil chaak in mpha thu hanto aṭhil chaan: “Apah, Nah amiing kunlor kurthuwk so. Nah Akruwngpaam kurjung kurthuwk so.

³Mnii ktaiki thenpen mnii ktaiji mhai pii chaan,

⁴ungta kupnu ton in mhai ptlot pik chaan, mleija neen kdaksaan rukva neenki lei ktuwl rek kdo ptlot pik in; ungu kepthleem thu mhai ptla chmaan.”

⁵Ungta Mma ngi mhin inni theda, “Naan arlakki plap kthloi ku mii khat ti than ṭimmi mhin vada, ‘Cham, thenpen kdum pang mhai purpuwk cha;

⁶mleija kaplap khat kipjiing thlungda, mhin kdo piik chaak ra do khat lee thloi chma nu,’ dida mthe chaakku;

⁷mthung ki ngi, ‘Mhai pja ma; tunva thurngot arkam dok nu, knaole tu kowm leen ki iip dok in ping; kardel da do khat lee apii pchaang ni maang,’ di donle mmava karthawng rang mo?

⁸Neiji ahin thaanni kthea, mma plap kat mkurthut leiji, mma ngi kardel da do khat lee pii mdaat rang joso, maplap kurthuwk da, mdo ṭhil reen leiji kardel donle mdo kriin chaak khim khai kpii ra.

⁹“Ungta Neiji ahin thaanni kthea, aṭhil chaan, akpii chraan, athlaam in, ungu pha chnaan di; thurngot aṭhil in, akpvan pik chraan.

¹⁰Mleija kṭhil cha mii pum ktaiji arlaang chda, ungta kthlaam kcha mii ngi pha chda, ungu thurngot kṭhil mii ava hin kapvan pik ra.

¹¹Naan arlakki tak hep kdu lu mpah hin mchapa ngi tuwlva khat mṭhil na tuwlva khat kchang mhin pruwl khat kpii rang mo;

¹²Mata mma ngi harpardi khat mṭhilna, mhin ruwl parthi khat kpii rangmo?

¹³Naanni kṭha kma kurthuwk daat jownti, anao le hin do kṭha apiik de innu, parwaan tha ka am Apah in ngaalva Mhin kṭhil cha rek hinni kheel sii ki pthla kchiir ava kpii chra!”

¹⁴Tunva mpao kthuwk kma tarnam khat Mma ngi rei pthiida; tarnam ava msun dok thungta, mpau kthuwk kma miilai ava pauda, ungbi mii rekka ngak chda.

¹⁵Pdainu mii murson rek va theda, “Tarnam rek kruwng chapa Belyebul rutan ni Mmava Tarnam rek mdo rei pthi.”

¹⁶Mii angṭhe ngi Mhin mdo pirsin naanni, parwaan ki titinna khat thlaam lamda.

¹⁷Pdainu Mma ngi muplung bin in ava deida, mhin inni theda, “Kruwngpaam khim khaiji mraal karpii sora mthii na ngi mkinṭhen chaak bi ava do si nime, ungu mdo ṭhen inn ava ktluw chra.

¹⁸Ungta seitaan rukva mdaksaa mṭhen chaak bi, mukruwng paam ava tak heppi krip rang? Mleija Neiji tarnam rek kdo rei pthii ava naanva Belyebul rutan pi kdingi theen tinu.

¹⁹Belyebul rutan ni Neiji tarnam rek krei pthii kukurthut tu, naan achapa leva ku rutanni mdo rei pthiin da? Ava ngi mlei kurthuwk da, mmaanni naanna akikṭewl raan.

²⁰Pdainu Neiji Isowr khut chel rutan ni krei pthii kukurthut bi, Isowr Kruwngpaam ava naan leenni kurjung nga.

²¹“Ruktang miilai khatti rawl dona kurthlong da, mdaksaa amna munna mseel chaakbi, mdo mna rekka kurkhum ra,

²²pdainu mma hinni mruktang bet khat thleng sora mapchaan chaak bi, mma lamrin chaak rawl dona ava klowng chra, ungu kmaang chdok ava kthamve lamra.

²³Neitu kilṭhi kma mii ava Nei kraal mikpii, ungta Nei tu kurkuk kma mii ava kinvei chra.

²⁴“Pthla ktobor ri miilai khat thungki msun dok mpha thu, mkarngat nra mun rek kthlaamra dii amna ma thu chet da, ungu khat lee mphaak ma thungta, mma ngi theda, ‘Neiji karvan thuw dokna inn ava thung ngi kinle chdaat ni.’

²⁵Ungu mma ngi marvan thungta, tru deek ungta kintiing deekki mma ngi pha da.

²⁶Ava dilli mma ngi chet da mma hinva kheel sii ngi kṭha kma ktlok pthla rek tikheu arvan ṭhida; ungu mmaanni lut lam da, ava thung ngi am lamda; ungbi mdonna thangva miilai ava chodu ki hinva kheel sii ngi jul chda.”

²⁷Mma ngi hava mthe slii arlaanni, mii mluwngpa arlakki snu miilai khatti kdung owngda Mhin theda, “Nah ado tuhurna poi, ungta Nah dojown arnuw ava msuw kṭha!”

²⁸Pdainu Jisu ngi theda, “Isowr pauna aryaa da kirkhii mii ava ngi msuwkṭha!”

²⁹Miiluwng rekka mnem bet bet thungta, Mma ngi kthe pṭhunda, “Hava charuwl rekka kṭha kma charuwl rek lam, titinna khat thlaam lamda, pdainu Jonah ki titinna kma donle, titinna khat lee kpii rome.

³⁰Mleija Jonah ngi Ninevah mii rek biitinna mkurthut ava lulu ngi, Mii Chapa rukka hava charuwl rek biitinna kurthuwk ra.

³¹Kurdu ktong ki kruwngnuh ngi hava charuwl rek tu kilṭhi ngi makṭewl nitva rip donle mraal kpii lamra; mleija dultipaam mdon na kingi Solomon lousing karyaa chra thleng da, ungu asuwn, Solomon hinnu klin khat hava thung ngi ka am daatta.

³²Makṭewl nitva Ninevah mii rekki hava charuwl mii rek tu kilṭhi ngi krip ra, ungu mraal kpii lamra; mleija mmaanni Jonah doparyaam thung ngi plung ren hur lamda; ungu asuwn, Jonah hinnu klin khat hava thung ngi ka am daatta!

³³“Ku mii khat lee ngi meila pchuk thida innden mata tomkol tingi thii nime, pdainu klut mii rekki mar awng mdo dee nra, mrina khat tunni kthii ra.

³⁴Naanki daksaa meila ava mik, naan ki mik ava mdam bi, adaksaan mkheng nga mar awng ngi kdim chra; pdainu ava mdam mabi, adaksaanna pum jiing ngi kjiing chra.

³⁵(Ava ngi mlei kurthuwk da, naan thungki mar awng mjiin ma nra cheek asin dei chaan.)

³⁶Naan adaksaan mkheng nga mar awng ngi mdim bi, mjiin nra mun amni me, meila ar awng ngi kleng lulu ngi mkheng nga kleng ra.”

³⁷Mma ngi mpau slii arlaanni, Pharisi khat ti mdo maal ṭhi chaak nra Mhin the chda; ava leiji Mma ngi vanṭoi da tebol be ngi ku ongda.

³⁸Mma ngi mmaal du ngi mkhut mdo alṭhut ma mdee thungta, Pharisi ava kdung ngi ngak chda.

³⁹Ungta Mukpu ngi mhin theda, “Tunva Pharisi rek naanni tong leh arkuw ava mduwn knowt in tinu, pdainu naan aril inna kṭha kma ngi pum dimmi dim chda.

⁴⁰Ka aak rek naan! Mduwnki ki kseem Mma va mthungki ruk mdo seem pme mo?

⁴¹Pdainu mthung ngi ka am dona ava karpii dei chaan; ungu asuwn, naan atum inva do mkheng nga kartleu dok kurthuwk.

⁴²“Pdainu Pharisi rek naanna sukthi! mleija naanni chiibaal, chasowm,mkheng tholowm piin ti, ungta mkindit leh Isowr wonsat leek psuk inti; hava lea naanni ado tlot raan kurthuwkka, ktlok rek ado leek daak in ro nime.

⁴³Pharisi rek naanna asuwnkthi! mleija synagog rek thung ngi longkhom kṭha ngeen inti ungu mii kurtuwlna mun rek thung ngi salaam ngei intinu.

⁴⁴Naanna asuwn kthi! mleija naanna tdee ma thlaan rek hep daat in pti, ungu avale tun ni mii rekki kdei kma ngi mdo ther chown in thlaan rek ava hep daat in pti.”

⁴⁵Nowlam chukpu rek thungki khatti Mhin arthawng da, “Chukpu, hava ado the ngi neen ruk mhai rai chaan in pti.”

⁴⁶Ungbi Mma ngi theda, “Nowlam chukpu rek naan rukka asuwnkthi! mleija miirek do diil pchaan mara bowr krik puhur in thiin tinu, naan adak saanva bowr krik ava akhut chel in daat rap rukva thowng maan ti.

⁴⁷Naan ava asuwnkthi! mleija naanki apah le do eayo khulpu rek thlaan sa in tinu.

⁴⁸Hanto naanni sakhi rek kurthuwkki apah leen do tlot ava rot pik in tinu; mleija mmaanni eayou lamda, naanni mthlaan rek sak pik in tinu.

⁴⁹Ava ngi mlei kurthuwk da, Isowr lousing rukva theda, ‘Neiji khulpu rek leh kenyee rek sii nik di, murson rekka mmaanni eayou lam don tjat traan kpii lamra.’

⁵⁰Dultipaam mapṭhan daat ki khulpu rek mkheng hii,

⁵¹Abel hii thungki ngi Sakharija hii kpha, kchiir suwlbuwr leh mmun kchiir arlakki kmaang kcha mkheng ki hii ava hava charuwl rek thung ngi karngai ra. Oji, Neiji ahin thaanni kthea, hava charuwl rek thung ngi karngai kat ra.

⁵²Nowlam chukpu naanna asuwnkthi! mleija tdee naki chungkam naanni lou dok thiin ti, adaksaan ruk lut maan ti, ungu klut ra mii rek ruk khaan pthiin tinu.”

⁵³Mma ngi hava thungki msun dok thungta, nowlam chukpu rek leh Pharisi rekki, pau knempok kikhewl pṭhun lamda, ungta mplung apthit sora do knempok mdo the nra,

⁵⁴Mma ngi do mruk mthe ta, tukjown nraan kdingi Mhin arda lamda.