Read Lamkang LUK 12 Bible Online

LUK 12 - Lamkang bible

LUK 12

¹Ungta ava arlaanni mii rek mpunpa rek knempok ki karthel da mthuw kurtuwl in thungta, ru kri reeppi msiikhu rek hin kthe pṭhun da, “ṭha tlot ktlo Pharisi rek thowl ava cheek asin dei chaan.

²Kandang kma ngi mdo khum daat ra do khat lee ame, mata tdee mara kurdowl daat do khat lee ame.

³Ava ngi mlei kurthuwk da, naanni kjiing thung ngi ado theen ava mar awng thung ngi karyaa ra, ungu tuprutti innka thung ngi akarbiik in ava innthlun tunni kparyaam ra.

⁴“Kaplap rek, naan hinni kthea, daksaa daat eayou pchaang thida ava diltha kheelli do khat lee ktlo pchaang kma mii rek ava ṭi chmaan.

⁵Pdainu naanni ado ṭit raan mii ava lamchi Neiji pau aju kham pik in ni, mii mi eayo dok diltha sim thung ngi kvar pchaangki rutan kthloi Mma lamchi aṭi chaan!

⁶“Priit rek parnga ava peisa knii ngi mdo jur pme mo? Ungta Isowr maiṭhuwm va khdaat pre parngiil me.

⁷Talu lei da, naan aluw leen inki sam mkheng rukka mdo tai dok ma, ṭi maan, naanna priit rek knempok kheel dekki mman klu kurthuwk in pti.

⁸“Ungta Neiji ahin thaanni kthea, mii rek maiṭhuwm mi kandang ngi makthe thuw kcha mii pum ktaija, Mii Chapa rukva Isowr ki Waan tamsii rek maiṭhuwm mi kandang ngi kthe thut pik ra;

⁹pdainu mii rek maiṭhuwm mi mkipthlei mii ava, Isowr Waan tamsii rek maiṭhuwm mi kipthleira.

¹⁰“Ungta Mii Chapa ava mraal kpii ngi pauna kthe mii pum ktai ava kuptlot pik ra; pdainu pthla kchiir tun ni plaal da mraal kpii mii pum ktai ava ptlot pik nime.

¹¹Ungta mmaanni synagog rek paam kpu rek, ungu ruktang rek maiṭhuwm mi at ṭhiin mpha thu, tak heppi, mata talu arthawng nik di, mata talu naanni the nikaan di dida plung pjiin maan;

¹²mleija ṭhang ava kat thung ngi ado the raanna pthla kchiir ri akpurchuk chraan.”

¹³Kurtuwl mii rek thungki khat ti Mhin theda, “Chukpu, ku u pa tu alrou kdo panthem ve nraan mhai the pik cha.”

¹⁴Pdainu Mma ngi mhin theda, “Miilai, ku ngi Neia kekṭewl ra mata naanve akthem pik raan mdo tsii da?”

¹⁵Ungta Mma ngi mhin inni theda, “Tuk asut dei chaan, ungu hangmal mii mkheng asuw pṭoi dei chaan, mleija miilai khat rinkhu ava alrou knempok mdo thloi lei pme.”

¹⁶Ungta mhin inni Mma ngi pau purtolli theda, “Paam kthloi suwangpa khatti chasowm knempokki arkun da;

¹⁷ungu mthii na ngi hanto bin da, ‘Neiji talu tlo nik damma, mleija chasowm kdo purtuwl nra ame’.

¹⁸Ungta mma ngi theda, ‘Neiji hava etlo ni; kuktomma ṭhit pthii ni, ungu klin betti khat sa ni; ungta ava thung ngi chasowm leh kdona mkheng nga purtuwl ni.

¹⁹Ungu neiji kraothla hin the ni, raothla, adona rekka kum roi ksot kira knempokki ra nang ngi athloija, nang ngi tik kinteuvi achaa aneera am cha.’

²⁰Pdainu Isowr ri mhin theda, ‘Ka aak! Snii jaan ni nah araothla ava mṭhilla; ungu nah do purchuwl dona rekka kule do rang da?’ ”

²¹Isowr ktong tha suwang kthuwk kma daksaa tummi alrou kpurtuwl mii ava anto ra.

²²Ungta Jisu ngi msiikhu rek hin tha theda, “Ava ngi mlei kurthuwk da, Neiji ahin thaanni kthea, naanni rinkhu tummi talu chaa nik di, mata adaksaan tummi talu hiil naa ni kaan di kdingi plung pja maan.

²³Mleija rinkhua then kikheel dek ungu daksaa ava dona kikheel dek.

²⁴Pa aah rekka asuwn, tapṭau ruk pṭau lamme, chasowm ruk arvei lamme, mdo purtuwl nraan ktom ruk thloi lamme, mdo thiik nraan ruk ame, joso Isowr ri mdo pmaal chaak lam, ungu puwa rek kikheel dekki naanna mman klu in pti!

²⁵Ungta naan ni plung ado pjat lei inni arinkhu inna khutup khdaat pang rap klu apursown pchaan in mo?

²⁶Hava mikdil sii mak rap klu ktlo pchaang kma va, talu leiji ktlot mursonna plung apjat psuk inna?

²⁷Duwm rei rekka tak heppi kmowng tdit abin phaak in, nong kmei lamme, plaa ruk arvai lamme, anto daat joso ahin thaanni Neiji kthea, Solomon daat rap klua mlaarnee mkheng nga havale hep daatti hiilnaa me.

²⁸Pdainu snii ngi bil thung ngi kring daat pduk nii ngi lungplu thung ngi tvar pthiira arnaa rek mak klua Isowr ri mipihiil mapnaakku, naanna tak hep pang thung ngi akipihiil akapnaak chraan, O, mruk suwnni krin mii rek naan!

²⁹Ungta naanni talu chaa nik di talu nee nik di kdingi thlaam da plung pja maan.

³⁰Mleija dultipaam thungki chati rek mkheng ngi havale mdo thlaam, ungu naan do kriin ava naanki Apah ngi mdo dee dok.

³¹Ava kchang nga, Mma Kruwngpaam athlaam chaan, ungta havale mkheng nga ak tpom pik chraan.

³²“Ṭi maan, jao suwn rek, mleija naanki Apah in va Kruwngpaam kṭha ado tpiik chaak raanna mdo ngei kurthuwk.

³³Naanni sum alrou ajur inra, ekkarpii chaan, kṭuw knai kma ki sumbuwr atum raan arkhii chaan, mleija kupru ngi knai pchaang kma, reiṭha ngi mdo pṭum kre pchaan ma, parwaan ava tha kchuwl liit kmara alrou apurtuwl chaan.

³⁴Mleija asumbuwr in amna thung ngi aplung bin in rukka ka amra.

³⁵“Naanni arkowl apnet inra meila kṭuwng ngi am in;

³⁶Ungta kphal kmaal kchet mmaan ki Kpupa ngi thlungda thurngot mṭhil daat le mmaanni mdo pvan pik teng nra karda cha mii rek lulu kurthuwk in.

³⁷Mma ngi murjun mpha thu mik khut kahar daatti sra owr rek mdo phaak ra ava msuwkṭha; kinditti, Neiji ahin thaanni kthea, Mma ngi mdaksaa ki arkowl pnet thidonle, mmaanna tebol be ngi pkong lam don, ungta Mma ngi arjung donle sok klo pik lamra.

³⁸Mma ngi mvei knit na mata mvei kdumna murjun thu anto heppi mphaak lambi, sra owr rek mmaanna msukṭha!

³⁹Pdainu hava adei in, innkpupa ngi kupru thlen naki mpha mdee chaak daat tlaangbi, minn mdo kruwl ma nra tlown daak nime.

⁴⁰Naan rukka apurchuwl inra jiam in, mleija Mii Chapa ava naan dobin phaak liit ma ṭhang thu kurjung kro.”

⁴¹Pitor ri theda, “Mukpu, hava pau purtol ava neen daat mo mata mkheng ki tummi ado theda?”

⁴²Ungbi Mukpu ngi theda, “Mpha kcha ngi mmaan hin mtum in then mdo piik nlamra, mmaanki innkpupa ngi inn ava tun mkheng ksut pṭoira mdosi, trin chaak kro ksing nong kpuw ava ku rang da?

⁴³Chukpu ngi mthlen mpha thu ktlo slii ngi mdo phaak sra owr mma ava msukṭha.

⁴⁴Kinditti, Neiji ahin thaanni kthea, mma ava mdo thloi khim khai kpaa nra kthii ra.

⁴⁵Pdainu, ‘Neiki Chukpua kukto ngi kthlung ra,’ dida sra owr mdaksaa mthi nangi athe sora, sra owrpa rek leh sra owrnu rekka bunda, chaanee da, prida ma ammu,

⁴⁶sra owr avaki Chukpu ngi mma dobin phaak liit ma nit khat thu, mma dodee ma ṭhang ava thu, mthlenbi, mma ava mraal pii donle krin dei kma rek tu kilṭhi ngi kthii pthiira.

⁴⁷Ungta mma Chukpu do ngei kdei, pdainu kpurchuwl kma mdit mata, mma dongei dil kṭoiji ktlo kma mii ava kdung ngi kchung karlaang chra.

⁴⁸Pdainu kdei cha kma ungu kchung kuhur jap ra mii ava ko ol haiji kchung kuhur ra. Ungu knemmi mdo piik mii khim khai hinni knemmi karngai ra, ungta mii rek hin knemmi mdo silna hinki mmaanni knemmi kingeenra.

⁴⁹“Neia dultipaam thung ngi mei kthlaar kurjung ping; ungta ava kbuwng slii meek da ka amma!

⁵⁰Neiji baptis kdo tlot ṭhira baptis khat ka am, ungta ava mkurkhum du khim khai Neiji tak heppi namduwl nik da!

⁵¹Neia dultipaam thung ngi kdaai kpii ra kurjung pi kdingi abin inmo? Ava pme, Neiji ahin thaanni kthea, kṭhen rangki ping;

⁵²mleija tunki kupṭhunni inn khat thungki miilai parnga ava miilai kdummi miilai knii mraal kpiira ungta miilai knii ngi miilai kdum mraal pii donle kinṭhen ra;

⁵³mpah ngi mchapa raal pii don mchapa ngi mpah raal kpii ra, mnuh ngi mchanu raal pii don mchanu ngi mnuh raal kpii ra, makternu ngi makmou raal pii don makmouvi makternu raal pii donle mmaan ava kṭhen pthiira.”

⁵⁴Kurtuwl mii rek hin rukva Mma ngi theda, “Naanni kniw tlaak na ktongtha armei kparniim adee in mpha thu, naanni the teng inti, ‘Khuw krara,’ ungu anto katti thuwkda.

⁵⁵Ungta kurdu ktongki tirthli mraan che, naanni theen ti, ‘Kdung ngi kang kthlungra,’ ungu anto katti thuwkda.

⁵⁶ṭha tlot ktlo naan! Dultile parwaan mo owng kdeiji pau apurlup in, pdainu mpha ava tak heppi tpurlu rang tdit dei maan timo?

⁵⁷“Ungta naan adaksaan kat tumva talu lei kinditti kṭewl maan ti?

⁵⁸Naan akro kmaan miitu kikṭewl ra ache slii arlaan inni, lam tha akulrot dok nraan atloin, anto mkurthut mabi, kikṭewl rang hin akṭhiraan, ungta kikṭewl miiva nong klin kpuw hin akpii pthii raan, ungu nong klin kpuwva rowng inn thung ngi akdaal raan.

⁵⁹Neiji ahin thaanni kthea, naan do piik ra mṭut naki sum ava apiik dok du in khim khai mun ava thungki thuwk pchaang ni maan ti.”