Read Lamkang LUK 14 Bible Online

LUK 14 - Lamkang bible

LUK 14

¹Sabath nii khatti Mma ngi Pharisi rek arlakki paam kpupa khat inn thung ngi kmaal ra chet da, ungbi mmaanni Mma sut pṭoi lamda.

²Ungta asuwn, Mma du sukki ktar thliing miilai khat amda.

³Ungbi Jisu ngi Nowlam chukpu rek leh Pharisi rek hin theda, “Sabath nitti kapdam ava Nowlam do rot mo mata do rot pme?”

⁴Pdainu mmaanni rim kdi am lamda. Ava dilli Mma ngi kjowngda pdam pik thida, psun da.

⁵Ungta Mma ngi mhin inni theda, “Naan ku mii khat ki chapa khat mata msil ava sabath nitti diirum thung ngi mtlaak dokku, ava ṭen pthuwk teng ni maan timo?”

⁶Ungta mmaanni hava arthawng pchaang lamme.

⁷Tunva mdo own chaak rekki mun takjat mdo arkal in leiji paupurtol khatti mhin inni theda,

⁸“Ku mii khatti kphal thu kmaal ra atu own chaak in mpha thu, takjat mun thu ko ong maan, mleija naan hinva ksong bet khat mma ngi ku own kcha ruk kro;

⁹ungu naanve knii aku own kchaan mii ava ngi arvang donle, ‘Hava mma hin ako onna apii cha,’ mata mmun kchowm leen ku ong dida mthebi, aning kakjak kupṭhun ra.

¹⁰Pdainu naan ato own chaak in mpha thu mmun kchowm sii tun arvaan ra ku ong in, ungta ako own kchaan mii ava ngi arvang don atdee in bi, ‘Cham, kchuwng bet tunni vang ko ong,’ kdira ungta tebol be ngi ado ko onṭhin maiṭhuwm mi naanna takkjat khat kurthuwk naan di.

¹¹Mleija ku mii khatti mdaksaa kpunlor kcha mii ava kjuwm mi kthii ra ungu mdaksaa kjuwm mi ka am mii ava kpunlor ra.”

¹²Mma ko own kcha mii ava hin rukva Mma ngi theda, “Nang ngi kjiingki kmaal mata kmaal khat a own chaak ki mpha thu, nah aplap rek, a u anao rek, arilam rek, mata suwang aveen rek daat own ma, mmaan rukva akpinlet pik rang ngi aku own purthul kcha kro.

¹³Pdainu nang ngi kmaal khat apiik mpha thu, sra mii rek, kyeng rek, mkhu kyeng, mik ktot rek, a own cha,

¹⁴ungu nah sukṭha kurthuwk na di, mleija mmaanni apurthul pik pchaang nime. Nang ava rinkindit mii ngi mrin karheel mpha thu akpii purthul pik chra.”

¹⁵Tebol be ngi Mma do ko onṭhi khatti ava aryaa da, Mhin theda, “Chukpu, Kruwngpaam tha thenpen kchara mii ava msuw kṭha!”

¹⁶Pdainu Mma ngi mhin theda, “Mpha khat thu miilai khatti kmaal klin langlang khat tlo da, ungu mii knempok own chda;

¹⁷ungu kmaal pha mve thungta, mdo own rek hin msra owr rek siida, theda, ‘Arvaan, mleija tunva mkheng kurchuwl dokka.’

¹⁸Pdainu mmaan mkheng ngi kinṭim sappi maap kṭhil pṭhun sap lamda. Ru kri ki ngi theda, ‘Neia bil khat ren chnu, ungu chet da kdo sut ma ro mda; ahinni kthe chaakka, maap mhai tlot pik cha.’

¹⁹Ungta khat nowlli theda, ‘Neia silpa sik parnga ren chnu, neiji va nira mthit maṭhat suw lap chni; ahinni kthe chaakka, maap mhai tlot pik cha.’

²⁰Ungta ktlok khat nowlli theda, ‘Neia numei khat lou chnu, ungu ava ngi mlei kurthuwk da kva pchaang chrang maang.’

²¹Ava leiji sra owr ri arvang da mma chukpu hin song chda. Ava dilli inn kpupa ngi plung pthit da sra owr hin theda, ‘Kbeiji khuwpii ki paam rek lamṭhuwm ktai thung ngi chet ra, sra rek, kseek rek, ungu mik ktot rek arvan ṭhi lam.

²²Ungta sra owr ri theda, ‘Ocha, nah paureen khim khai ktlot dokka, ungu ktlong ngi ka am pok daatta.’

²³Ungta chukpu ngi msra owr hin theda, ‘Vara lampii rek leh inn arlak rek thung ngi chet ra mii rekka trinkma ki inn mdim nra arvan ṭhi lam.

²⁴Mleija Neiji ahin thaanni kthea, kdo own rek ku mii khat lee ngi Neiki kmaal ava partem chlam nime.’ ”

²⁵Tunva klin langlang kurtuwl mii rek tu kilṭhi da, ungbi Mma ngi kinle da mhin inni theda,

²⁶“Ku mii khatti Nei kihin marvan rang bi, mpah, mnuh, mnumei, mnaole, mṭapa, mchernu, mdo maak ra, Oji, mma mdak kat rinkhu ruk mapder chaak mabi, Nei ksiikhu kurthuwk pchaang nime.

²⁷Mdaksaa khros hurda Nei kdil kṭoi kma mii ava, Nei ksiikhu kurthuwk pchaang nime.

²⁸Mleija innmai kchuwng ngi ksa rangki ku mii khatva, ava mdo pṭut nrang ki mman tai donle ungu khop mo khop nime di don ru kri ngi ku ongda plung parseel nime mo?

²⁹Anto mkurthut mabi, mma ngi berkcho phun dok thida, ungta mupṭut pchaan mabi, kdei mii mkheng va kipnii chaak pṭhun donle,

³⁰kthera, ‘Hava miilai va ksara pṭhun dok thida pṭuw pchaang me.’

³¹Mata rawlmii rek mii punsowm daat kthloi kruwng khatti rawlmii rek mii pun som knii kthloi kruwng khat hin rawl mdo karnaak ṭhi rang ava, mma dothloi limva pchaang mo pchaang nime di donle ru kri ngi ku ong da plung parseel nime mo?

³²Mma ngi mapchaanma rangbi, ktlok khat ava ngi lam mkarlat slii daat thung ngi mdo pdaai dok nra pau ksongra mii ksira.

³³Ava hep daat lulu ngi naan ku mii khat rukva, mdo thloi mkheng mmaak pthii mabi, Nei ksiikhu kurthuwk pchaang nime.

³⁴“Ptih ava kṭha; pdainu ma al mmaan chaakbi, tak heppi ka al nowl rang?

³⁵Ptih ava paam tum daat don, haar rang daat don do sime, mii ngi mdo var pthii. Taryaak na knaa kthloi ku mii khatti aryaa chso.”