Read Lamkang LUK 15 Bible Online

LUK 15 - Lamkang bible

LUK 15

¹Tunva khasna klou rek leh pnu kirvei rekva Mhin karyaa chra nai lamda.

²Ungta Pharisi rek leh Nowlam chukpu rekki tuprutti karseel psuk lamda, the lamda, “Hava miilaiva pnu kirvei mii rek kowl lamda mmaal ṭhi lamma.”

³Ava leiji Mma ngi hava paupurtol li mhin inni theda:

⁴“Naan ku mii khatti jao arjaa khat mdo thloi thungki khat mmaan chaakku, som tku lei tku ava kbowk laiji mapthii donle, kmaang cha khat ava mphaak du khim khaiji mdil ṭoida thlaam ni memo?

⁵Ungu mma ngi mphaak thungbi, kanpa da, mlukou leen thiida.

⁶Ungta mma ngi inn thlungda maplap rek leh mveen rek own purkuk da, mhin inni theda, ‘Mhai kanpat ṭhi chaan, mleija kmaang dok kcha nei kjao ava pha chnu.’

⁷Neiji ahin thaanni kthea, hava hep hep daatti, plung ren mdo hur nra arleek setti ka am kma, rinkindit dok rek mii som tku lei tku hinva pnu kirvei khatti plung ren mdo hur ava tummi parwaan tha kanpa ka amra.

⁸“Mata snu miilai khatti thiir sum sowm mdo thloi thungki khat mmaan leiji meila pchuk da innruwt da mphan du khim khai ktippi suwda thlaam ni memo?

⁹Ungta mma ngi mphaak thungta maplap rek leh mveen rek own purkuk da theda, ‘Mhai kanpat ṭhi chaan, mleija neiji kdo pmaan chaak dok thiir sum ava pha chnu.’

¹⁰Neiji ahin thaanni kthea, anto hep daatti, pnu kirvei khatti plung ren mdo hur leiji Isowr waan tamsii rek maiṭhuwm mi kanpa ka am.”

¹¹Ungta Mma ngi theda, “Chapa knii kthloi miilai khat amda.

¹²Ungu mnaopa ava ngi mpah hin theda, ‘Apah nei ktum alrou ava mhai pii cha.’ Ungta mdo thloi rek ava mikniing inni them pik lamda.

¹³Ungu nii mruk diltha mchapa kmova mtum mkheng purkuk thida, khuwpaam lamkla tha pveet chda, ava tha mma alrouva do kipsit kma partlai tir krep da.

¹⁴Ungta mma ngi do khim khai mpartlai dok diltha, khuwpaam ava thung ngi poi tham klin langlang khat amda, ungta mma ngi kikriing pṭhunda.

¹⁵Ava leiji mma ngi chetda khuwpaam ava thungki miilai khat hinni am chda; mma ava bil thung ngi vak kapmaal siida.

¹⁶Ungta vak rek do chaak vak then ava kdung ngi chaa chnuwm da; ungu mma ava ku mii khat lee ngi do khat lee pii chme.

¹⁷Pdainu mma mthi na ngi hanto theda, ‘Knemmi kpah dovai sra owr rek va thenpen kekleem lut lutti chaa lam imde, pdainu nea hava tha poi kthammi kmaang chra kthea.

¹⁸Neiji kurlou nira kpah hin vang nira ungu mhin the chni, Apah, parwaan leh nah amaiṭhuwm mi neiji pnu kirve chaakka;

¹⁹nah achapa rang nga kurhui chmaang, asra owr rek khat lulu ngi mhai kowl cha.’

²⁰Ungta mma ngi rip daat da mpah hinni arvangda. Pdainu mma ngi arvang da leer khatti ma am daat arlaanni, mpah ngi deida ungu wonsat lo chda, ungta mma ngi vachenda arpom thida put da.

²¹Ungu mchapa ngi mpah hinni theda, ‘Apah, neiji parwaan leh nah amaiṭhuwm mi pnu kirve chaakka; neia nah chapa rang nga kurhui chmaang.’

²²Pdainu mpah ngi msra owr rek hin theda, ‘Kbeiji dona kṭha arvan sin inra, mleen apnaak in; ungta mkhut leen panthla khat apnaak in, ungta mkhu tun ni khu kok rek apnaak in;

²³thiinra silsuwn kmar dam khat arvan sin inra, akihe you in, nenni chaa in chera kanpa inche;

²⁴mleija kchapa hava kdiyou kcha thungki kring nowl; mma ava kmaang kcha thungki kdo phaak chaak.’ Ungta mmaanni kanpa pṭhun lamda.

²⁵“Tunva mchapa kver ava bil tha am daat da; ungu mma ngi arvangda inn mnai thungta, khung kdum leh kardaam aryaa da.

²⁶Ungta mma ngi sra owr rek thungki khat ownda, hava talu lei kida kdingi paukhewl da.

²⁷Ungbi mma ngi mhin theda, ‘Anaopa thlungda, apah ngi silsuwn kmar khat eayou da, mleija mma ngi kuhui deekki pha chda.’

²⁸Pdainu mma ngi plung pthit da vanglut nuwm mda. Mpah ngi arva da theem da,

²⁹pdainu mchapa ngi mpah hin theda, ‘Asuw, hava kum tija thung ngi neiva sok alo chnu, apaureen rekka neiji leek liit maang, anto daat joso neiji kaplap rek kdo kanpat ṭhira keelsuwn khdaat ruk mpii mti.

³⁰Pdainu achapa khatti ado thloi ava ko ok kma rek tu partlai dok thida, marvanna silsuwn kmar khat eayo pik chti nu!’

³¹Ungbi mpah ngi mhin theda, ‘Kchapa, mpha ktai thu nangva ado ta am ṭhi daat, ungta nei kdo thloi mkheng ava nah ado.

³²Ungu plung kngammi tkanpat kat raan, mleija hava anaopa ava kdiyou thungki kring, mma ava kmaang kcha thung ki tphaak chaak.’ ”