Read Lamkang LUK 17 Bible Online

LUK 17 - Lamkang bible

LUK 17

¹Ungta Jisu ngi msiikhu rek hin theda, kepthleemmi pnu thung ngi ktlara ava kthuwk kat ra; pdainu mii ngi khusiir mdo pirthit nra ktlo mii ava msukthi!

²Mma ngi hava kdil sisi hin pnu mdo ptlaak rang kchang nga, mlowl leenni lung krik pthoida truwn thung ngi tvar pthii ava ngi mma tumva kursuk siira.

³Naan adak saanna tuk kursut chaan, naanki a u anao in khatti pnu marveta, mma ava arkowk in, ungta mma ngi plung ren mhurta, aptlot pik chaan;

⁴ungu nii khat thung vei tikheu aju psul in sora pnu mtlaak ta, ahin inni vei tikheu vi kinle da, plung ren kuhur chaakka, dida mthe ta, mma ava ado ptlot pik raan.

⁵Kenyee rekki Mukpu hin theda, “Neen kdo rin chaak in mhai pnem pik chaan!”

⁶Ungbi Mukpu ngi theda, “Naanni anruwng muw di pang arin chaak inbi, kaprang ding nah kurphui ra truwn thu kurphun cha, dida naanni athe inbi, naan akupṭoi raan.

⁷“Naan arlakki sra owr khat kthloi ku mii khatti, mma ngi bil hoida, jao seel da, bil ki mthlun mpha thu, ‘Arvang teng ra tebol be ngi kmaalra eko ong dida kthe ka am in pti mo’?

⁸Ava kchang mma ngi, ‘Kjiing von mhai vai pik, ungu neiji kchaak kneek dok du khim khaiji, arkowl apnet ra sok mhailo, ungta ava dil thang ro ngi nang ngi chaanee ndi, didonle mhin the nime mo?

⁹Mma paureen sra owrri mdo tlot leiji mhin mpanpaak mo?

¹⁰Ava leiji naan rukva ahin inni pau mdo reen mkheng atlot dok inle, neenna kurhui kma sra owr rek in ping, neenni kdo tlot kat raan ava ktlo kcha in ping, kdingi atheen.”

¹¹Jisu ngi Jerusalem kphara kchetti, Galil leh Samaria arlakki lam ṭoida.

¹²Ungu Mma ngi khuw khat thu mlu thungta, leer khatti krip daat raaichii kthung miilai sowm kurdut ṭhida

¹³ungta mmaanni owng lamda the chlamda, “Jisu, Chukpu, aplungnee mhai tdet chaan.”

¹⁴Mma ngi mdee lam thungta mhin inni theda, “Vang inra adak saanna thiimpu rek hin ktardet chaan.” Ungta mmaanni mvan slii arlaan inni kartleu chlam da.

¹⁵Ava dilli mmaan thungki khat va kartleu kchaam ping tdit mkardee thungta, mdil kinle da kdung ngi owngda Isowr panpaak chda.

¹⁶Ungta mma ngi Jisu khu ther ri tluw teng da, Mhin panpaak chda. Tunva Mma ava Samaria mii.

¹⁷Ava dilli Jisu ngi theda, “Kartleu va miilai sowm pmaan ti mo? Miilai tku rek be?

¹⁸Paam ktlokki miilai hava kma donle, Isowr kpanpaak ra mdil kinle khat lee amemo?”

¹⁹Ungta Mma ngi mhin inni theda, “Kardel ra alam tha vang; ado rin chaakki kdam kcha im pti.”

²⁰Pharisi rekki Isowr Kruwngpaam ava tden kurjung rang kdingi Mhin mkhewl in thungta, Mma ngi mhin inni arthawngda, “Isowr Kruwngpaam ava titbit rim rang kingi titinna rek tu kilṭhi ngi arjung nime.

²¹Mmaanni ‘asuwn, hava tha,’ mata ‘Va tha!’ di donle kthera, mleija asuwn, Isowr Kruwngpaam ma naan arlakki ka am.”

²²Ungta Mma ngi siikhu rek hin theda, “Mii Chapa ava naanni ado dee nuwm in nit rek thungki nii khatti kurjung ra ungu naanni dei chni maan ti.

²³Ungta mmaanni ahin thaanni kthera, ‘Asuwn, va tha!’ mata ‘Asuwn, hava tha!’ kdi lamra pdainu chet maan, mdil in ṭoi maan.

²⁴Mleija kowl kiplekki parwaan khat ktong kingi khat ktong tha mlen ava lulu ngi, Mii Chapa nit rek rukka anto hep daat kurthuwk ra.

²⁵Pdainu Mma ava ru kri reeppi kjakakham kparteel ra ungu hava charuwl rekki kipthlei ra.

²⁶Noha nit rek thungki lulu ngi Mii Chapa nit rek thung rukka kurthuwk ra.

²⁷Noha ngi arkuwngpii thung ngi mlu du ki nit kpha thu, mmaanni chaanee lamda, phal lamda, innknei snu klou tlo lamda, ungta diipa kinle da mkheng inni kmaang kcha lam.

²⁸Anto hep daatti Lot nit thung ruk va mmaanni chaanee lamda, ren lamda, jur lamda, phun lamda, sa lamda,

²⁹pdainu Lot ti Sodom thungki msun nitti parwaan ki mei leh kantup tla da mkheng kheng inni kmaang chlam.

³⁰Ava lulu ngi Mii Chapa mkandan nit thung rukva anto hep daatti kthuwk ra.

³¹Ava nit thu innthlun leen ka am miiva inn thungki mdo mna kloura jungṭum mso; ungu ava lulu ngi bil thu ka am mii rukva mdil kinle mso.

³²Lot numeija abin phaak in.

³³Mrinkum kakal ra kthlaam mii ava kmaang chra, pdainu mrinkum kmaang mii ava kpurhui ra.

³⁴Neiji ahin thaanni kthea, Ava jaan va kowm khat leen miilai knii ka amra, khat lou thidonle khat ava kma pthiira.

³⁵Snu miilai knii ngi buh ksura, khat lou thidonle khat ava kma pthiira.

³⁶Bil thu miilai knii ka amra, khat lou thi donle khat ava kma pthiira.”

³⁷Ungta mmaanni Mhin theda, “Tva thung rang da, Mukpu?” Mma ngi mhin inni theda, “Daksaa kluwng amna thung ngi laanta rek kthuwk kurtuwl ra.”