Read Lamkang LUK 18 Bible Online

LUK 18 - Lamkang bible

LUK 18

¹Ungta Jisu ngi siikhu rek hin paupurtolli theda, mleija mpha ktai thu mmaanni plung kpinle kma mdo ṭhil chaak nraan kurthuwk.

²Mma ngi theda, “Khuwpii khat thu Isowr kṭi kma, mii ruk tut ksut pik kma kekṭewlpa khat amda.

³Ungta khuwpii ava thungva meikhunuh khat ruk amda, mma ngi mhin thleng kchok da, mma kusnuwm kma rek phuw mdolo pik chaak nra the chda.

⁴Mpha mruk thu mma ngi mat da, pdainu am bong thida mma ngi theda, ‘Neiji Isowr ṭi maang, mii ruk tuk sut maang,

⁵anto daat joso hava meikhunuh va kning mpumul reenna, neiji mphuw lo pik daat ni, anto mkurthut mabi mma ngi thleng thleng donle kning kpumul ra.’”

⁶Ungta Mukpu ngi theda, “Rinkindit kma do kṭewl ava talu tdit aryaa chaan.

⁷Ungta suwn jaanni Mhin kṭap Mma do kchol rek phuw ava lo pik nime mo? Roi ksotti kikrem pik lam rang mo?

⁸Neiji akthe pik inna, Mma ngi kbeiji mphuw klo pik chlam ra. Anto daat joso Mii Chapa ngi murjun mpha thu, dultipaam thung ngi krin kcha mii kpha rang mo?”

⁹Ungta mii mursonna do ksi pme dida kbin, ungu mdaksaa daat rinkindit ping ngi dida kilrin kcha mii angṭhe hin Mma ngi hava paupurtol rukva theda;

¹⁰Luwbuk Inn thu kṭhil chra miilai knii hangda, khatta Pharisi ungu khat ava khasna klou.

¹¹Pharisi ngi rip da mdaksaa hanto kirthe da ṭhil chda, ‘Isowr, akpanpaak chaakka, mleija nea mii murson lulu pmaang, hangmal, kindit kma, snu ktukui, mata hava khasna klou miilai lulu ruk kurthuwk maang.

¹²Neiji hapta khat thung ngi then vei knii ngowl nu, kdo phaak chaak mkheng thungki tholowm ado kpiik chaak.’

¹³“Pdainu khasna klou mii ava ngi lam kla ngi rip da, parwaan hansuw da mmik kapkhap pchaang kma ngi, muplung tpeengda, theda, ‘Isowr, pnu kirvei kcha neia aplungnee mhai tdet cha!’

¹⁴Neiji naan hin kthea, hava miilaiji mdaksaa ava mii murson hinva kindit kdingi mi inn tha jungda; mleija mdaksaa karkhiing nuwm mii pum ktai ava kupchowm pthiira, pdainu mdaksaa kchowm riimmi ka am mii ava kikhiing ra.”

¹⁵Tunva Jisu ngi mdo kmei pik chaak nlam ra kmo rek sisi mmaanni arhai ṭhi lamda; ungu siikhu rekki ava mdee in thungta arkowk lamda.

¹⁶Pdainu Jisu ngi own lam thida, theda, “Kmo rekka ki hinni arva chdaat lamso, khaan maan, mleija Isowr Kruwngpaam ma hava mmaan lulu thung ngi ka am.

¹⁷Kinditti, Neiji ahin thaanni kthea, Isowr Kruwngpaam ava hava kmo rek lulu ngi ku mii khatti marlaan chaak mabi, lut chip pchaang nime.”

¹⁸Ungta paam kpupa khatti Jisu hin theda, “Kṭha, Chukpu, kṭuw knai kma ki rinkhu kdo phaak chaak nrangki neiji talu tlo nik da?”

¹⁹Ungbi Jisu ngi mhin theda, “Talu leiji kṭha diti ado to ownda? Isowr kma donle kṭha ku khat lee ame.

²⁰Paureen rekka nang ngi ado dee: ‘Nala tukui chma, mii eayou ma, pruma, kindit kma thu ripik ma, apah leh anuh akjat cha.’ ”

²¹Ungta mma ngi theda, “Hava mkheng nga neiji keksenao daatki kdo pṭoi chaak.”

²²Ungu Jisu ngi ava maryaak thungta, mhin theda, “Kvaat do khat ka am daatta, ado thloi mkheng ajur dok thira sra hinni athem pik, ungta parwaan tha alrou nang ngi thloi chna di; ungu arvara Nei kdil aṭoi cha.”

²³Pdainu mma ngi hava maryaak thungta, suwang mkurthut leiji kdung ngi muplung pja chda.

²⁴Jisu ngi mma msut chunni theda, “Suwang rekki Isowr Kruwngpaam mlu rang nga tija thung ngi kparsa chdaat ta!

²⁵Mleija suwang miilai khatti Isowr Kruwngpaam mlu rang kchang nga, ut khatti prou khor thung ngi mlu ava ngi ko ol sii ra.”

²⁶Karyaa mii rekki theda, “Ava mkurthut tu mdo ktlan rang nga kule rang da?”

²⁷Pdainu Mma ngi theda, “Mii rek hin kurthuwk pchaang kma lu ava Isowr hinva kurthuwk lu.”

²⁸Ungta Pitor ri theda, “Asuw, neenni ki inn ma pthii thiinnu Nah dil kdo ṭoi chaak in.”

²⁹Ungbi Mma ngi mhin inni theda, “Kinditti, Neiji ahin thaanni kthea, Isowr Kruwngpaam tummi inn,mata mnumei, mata mu u mnao, mata mnuh mpah, mata mnaole kma pthii ku mii khat ma ambi,

³⁰mma ngi hava mpha thu mtum ava kheelli kpha chra, ungu karvang ra kum thung ngi kṭuw knai kma rinkhu karlaang chra.”

³¹Ungta sowm lei knii ṭhida Mma ngi mhin inni theda, “Asuwn, nenni Jerusalem kphara kahang in min, ungu Mii Chapa mlei thung ngi khulpu rek do kjit mkheng ava kurkhum ra.

³²Mleija Mma ava ktlok chati rek khut thung ngi kparlaan pthii ra, ungu kipnii chaak lamra, ungta ningkja kuhui rakki tlo lamdonle kupthot lamra;

³³mmaanni prei lam donle ke eayoura; ungu mnii kdumna nitti kring kardel ra.”

³⁴Pdainu hava lea mmaanni khat lee pre deipandi chlamme; mdo the ava mmaan thungki kurdowl kcha a, ungta Mma do the ava talu tdit mmaanni dei chlamme.

³⁵Jisu ngi Jerikho mhai nai thungta, then kṭhil miktot khat ava lam siir ri ko ong daat da.

³⁶Ungu kurtuwl mii rek kchet mma ngi maryaak thungta, hava talu leiki da kdingi mma ngi mii khewl chda.

³⁷Mmaanni mhin theda, “Nasareth ki Jisu kthleng.”

³⁸Ungbi mma ngi owngda, “Devid Chapa, Jisu, aplungnee mhai tdet cha!”

³⁹Ungu mma dusukki ka am mii rekki arkowk lamda, rim kdi jiam, kdingi the lamda; pdainu mma ngi kheel set setti owngda, “Devid Chapa, aplungnee mhai tdet cha!”

⁴⁰Ungbi Jisu ngi rip da, ungta Mma hinni mdo arhai ṭhi nraan paureenda; ungu mma ngi mhai nai thungta, Jisu ngi khewl da,

⁴¹“Talu ado ktlot pik ra angeija?” Mma ngi theda, “Mukpu, khuw dei chni.”

⁴²Ungbi Jisu ngi mhin theda, “Khuw adei cha; ado rin chaakki kdam im pti.”

⁴³Ungta tun kat daatti mma ngi khuw deida, Isowr panpaak da mdil ṭoi chda, ungu mii mkheng ngi ava mdee thungta Isowr panpaak chlam da.