Read Lamkang LUK 19 Bible Online

LUK 19 - Lamkang bible

LUK 19

¹Jisu ngi Jerikho lut da, ungta sethleng ngi chet da.

²Ungta mmiing Sakhaja tdit kinreel miilai khasna klou suwangpa khat amda.

³Ungta mma ngi jisua ku tdit dei chnuwm da, pdainu kurtuwl mii rekki mlei kurthuwk da pchaang me, mleija mma ava toi da.

⁴Ava leiji mma ngi mdu sukki va chenda, Mma mdo dee chaak nra, bungba ding khat lownda, mleija lam ava ktong tha Jisu ngi chet da.

⁵Ungta Jisu ngi mun ava thung ngi marvan thungta, hansuw thida, mhin theda, “Sakhaja, koknotti arjun ṭum; mleija sniiva nah inn thung ngi kthlun ma rome.”

⁶Ava leiji kok notti mma ngi arjungṭum da, ungta kanpa ngi Mma ava arlaang chda.

⁷Ungu mmaanni ava mdee in thungta, mkheng inni karseel sop sop lamda, “Mma ava pnu kirvei miilai ava hinni malpa khatti kvang nga.”

⁸Ungta Sakhaja ngi rip thida Mukpu hinni theda, “Asuw, Mukpu, kdona thloi mṭim ava neiji sra hin pii chnu, ungu kindit kma ngi ku mii khat hinki do klo cheva, kret vei plii ngi kdo pinlet pik.”

⁹Ungbi Jisu ngi mhin theda, “Sniiva hava inn thung ngi kirliinna kurjung nga; mleija mma rukka Abraham chapa khat kurthuwk.

¹⁰Mleija Mii Chapa ava kmaang kcha kthlaam ra ungu kaktlan pik ra kurjung.”

¹¹Mmaanni hava le maryaak slii arlaanni, Mma ngi pau purtol khatti the purjom da, mleija Mma ngi Jerusalem naida, ungta mmaanni Isowr Kruwngpaam ava kbeiji kandang rang pak da kdingi bin lam da.

¹²Ava ngi mlei kurthuwk da Mma ngi theda, “Klin nong kpuw miilai khatti kruwngpaam khat karlaang chra khuwpaam lamkla tha kthlung kinle rangki pjiin da.

¹³Ungta mma ngi msra owr rek miilai sowm own thida, mhin inni jeering sum pii lamda, ungta mhin inni theda, ‘Nei kthlun du khim khai hava ngi sumdowl alo naan.’

¹⁴Pdainu mma ava mii rek va pder chda, ungu mdil pṭoi lamda pau pthla lamda, ‘Neen ktun inni hava miilaiji mpaal ra ava ngei maan ring,’ kdingi the lamda.

¹⁵Mma ngi kruwngpaam arlaang da mkinlet mpha thu, mma ngi jeering sum mdo piik sra owr rek ava, talu sumdowl lo nlamda tija mphaak chaak inna tdit mdo dee nra, mma hin mdo own lam nra pau pṭum da.

¹⁶Ru kri ki ava ngi arvangda mmaiṭhuwm mi rip da, theda, ‘Mukpu, nah do piik jeering sum ava ngi sowm lot tpom chnu,’ dida.

¹⁷Ungbi mma ngi mhin theda, ‘Kṭha deekki atlotta, kṭha sra owr, nang ngi nong kdil suwn thung ngi trin chaak akurhui leiji, khuwpii rek sowm tun ni nang ngi rutan thloi ndi.’

¹⁸Ungta miknit na ngi arvang da, theda, ‘Mukpu, nah do piik jeering sum ava ngi parnga lot tpom chnu.’

¹⁹Ungbi mma ngi mhin theda, ‘Ungta nah khuwpii rek parnga tun ni am ndi.’

²⁰Ava dilli ktlok khat nowlli arvang da, theda, ‘Mukpu, nah ajeering summa hei, buwlaak khatti klumnu kdo arkhiik daat.

²¹Mleija nah aril khaa reenda, nang ngi ado thiik ma lou tinu, ungu ado pṭau ma ava khau tinu, ava leiji aṭi chnu.’

²²Mma ngi mhin theda, ‘Kṭha kma sra owr nang, aner kat dothe ava ngi neiji araal lou nik di! Neia kril kakhaa miilai kurthuwk nu, kdo thiik ma lounu, kdo paṭau ma kdo khau ava nang ngi adee mo?

²³Neiji kthlun kinlet mpha thu sum mdo lot tpom tu kdolo chaak nra, talu leiji ksum ava sum lot na thung ngi thii mti?’

²⁴Ungta mma ngi mbe krip rek hin theda, ‘Mma hinki jeering sum ava alou inra, jeering sum sowm kthloi hinni apiin.

²⁵(Ungbi mmaanni mhin theda, ‘Mukpu mma jeering sum sowm mdo thloi ma!’)

²⁶‘Neiji ahin thaanni kthea, ditta kthloi ku mii khat hinni kheel betti kpii ra; pdainu kthloi kma mii ava mdo thloi chaak mruk suwn rukka klou pthiira.

²⁷Pdainu mmaan tun ni nei kpaal ra kngei kma nei mukusnuwm kma rekka hava tha arvan ṭhiinra kmaiṭhuwm mi asur you tir in,’ ”

²⁸Ungta Mma ngi hava the thida mdu bet inni Jerusalem tha hang da.

²⁹Mma ngi kruwn lown tdit Bethphas leh Bethania mnai thungta, siikhu rek knii Mma ngi va siida,

³⁰theda, “Adu suk inki khuw ava thung ngi va lut in, naanni ava lu inbi, ku mii khat lee ko on nma skowlraam suwn khat kupsuk daat pha naan di, ava aparthlet inra, hava tha arvan ṭhiin.

³¹‘Talu leiji aparthle inna? dida ku mii khatti mthe ta, Mukpu ngi kriing da,’ adiinra atheen.”

³²Ungu Mma dosii rekki mhai in thungta, mdo the pik lam ava hep heppi pha chlam da.

³³Ungu mmaanni mparthle in thungta, mma kpupa ava ngi mhin inni theda, “Talu leiji skowlraam ma aparthle inna?”

³⁴Ungbi mmaanni theda, “Mukpu ngi kriing da.”

³⁵Ungta mmaanni Jisu hin arvan ṭhi lamda, skowlraam leenni buw phat lamda, mleenni Jisua ko ongda.

³⁶Ungta Mma ngi hanto mche slii arlaanni, miirek va lam thung ngi buw phat lamda.

³⁷Mma ngi arjung naida, kruwn lown thang ngi murjun thungta, kurtuwl siikhu rek mii mkheng va Mma nong tlot klin klin mdo dee lei inni, kanpa pṭhun lamda, ungu krowl khdaatti Isowr panpaak chlam da,

³⁸the lamda, “Mukpu miing ngi kurjung Kruwng ava msuw kṭha! Parwaan tha kdaai ungu kheel sii ngi kparthaang ekurthuwk so!”

³⁹Ungta kurtuwl mii rek thungki Pharisi rek mii angṭhe ngi Mhin theda, “Chukpu, asiikhu rekka arai lam.”

⁴⁰Mma ngi arthawngda, “Neiji naan hinni kthea, hava mmaanni rim kdi ma ambi, lung rek katti ko owng pthuwk lamra.”

⁴¹Ungta Mma ngi arjung naida khuwpii ava mdee thungta ṭap da,

⁴²theda, “Snii kat rukva nang ngi kdaai adee chaak daat tlaangbi! Pdainu tunva amik sut na thungki kurdowl kcha lamma.

⁴³Mleija aleen nit rek ava kurjungra, nah aksnuwm kma rekki aploi donle rowng aktlot psuk ra, aktu khul dokra, markil plii thung ngi karkam pthii ra;

⁴⁴ungu nang leh anaolea dul akikcheen nraan, ungu nah athung ngi lung khat leenni lung khat kurtuwn daatti am nime; mleija nah ado tvel nra mpha ava dei chi mti.”

⁴⁵Ungta Mma ngi luwbuk Inn thu lut da kjur rekka krei pthii pṭhun da,

⁴⁶mhin inni Mma ngi theda, “Mdo kjit dok, ‘Nei Ki inn na tiṭhil chaak na Inn khat ra; pdainu naanva kup pru rek khur apurthut pthiinna.’ ”

⁴⁷Ungta Mma ngi luwbuk Inn thung ngi mnii ktaiji purchuk da. Thiimpu kinreel rek leh Nowlam chukpu rek, ungu nong klin kpuw rekki mdo eayo nraan mlam thlaam lamda.

⁴⁸Pdainu mdo tlot raan ava mmaanni do khat lee pha lamme, mleija mii mkheng ngi Mma pauna plung plut da.