Read Lamkang LUK 21 Bible Online

LUK 21 - Lamkang bible

LUK 21

¹Mma ngi hansuw da ungbi suwang rekki sumbuwr thung ngi mdo daal in ava deida;

²ungta sra meikhunuh khatti thiir sum sisi knii mdo daal chaak deida.

³Ungta Mma ngi theda, “Kinditti, Neiji ahin thaanni kthea, hava mii mkheng arlak va sra meikhunuh ngi kheel sii mdaal chaakka.

⁴Mleija mmaan mkheng inva mdo thloi in knempok thungki mdo daal in; pdainu mmava mdo thloi chaak suwn lou dek da mdaal chaakka.”

⁵Ungta lung rek kṭha pa daat le mdo piik chaak in ava tija thung ngi kṭha chdaatta, dida mii angṭhe ngi luwbuk Inn mlei thung ngi mthe thungta, Mma ngi theda,

⁶“Naan do sut havale ki mnit rek karvangra, mdo var pthii mara khat lee ame, lung khat leenni lung khat kurtuwn daatti ma nime.”

⁷Ungta mmaanni Mhin pau khewl chlam da, “Chukpu, hava lea tden kthuwk rang da, ungu hava kthuwk rangki titinna rekka talu rang da?”

⁸Ungbi Mma ngi theda, “Lam lele tha mii ngi ado tiṭhi ma nraan, tuk kursut dei chaan; mleija Nei kmiing ngi mii knempok thleng donle, ‘Nea Mma ping!’ ungta ‘Mpha knaija!’ di donle kthera, mmaan dil ṭoi maan.

⁹Ungta naanni rawl rek leh rawlki paujuwn aryaak inki mpha thu, plung purthlowng maan, mleija ru kri ngi havale kthuwk ra, pdainu mṭut nrang ava pme.”

¹⁰Ava dilli Mma ngi mhin inni theda, “Paam khatki mii ngi paam khatki mii mraal kpii ra, ungu kruwngpaam khatti kruwngpaam khat mraal kpiira,

¹¹klin langlang ringnaang kthuwk ra, ungu mmun ktai thung ngi poi tham leh omlai ka amra, ungta parwaan ki tiṭit kirvei kling langlang titinna rek kthuwk ra.

¹²Pdainu hava mkheng mthuw du ngi mmaanni akjowng in donle suwk akupthuwk raan, synagog rek thu, rowng inn thu, ungu paamkpu rek hin, kruwng rek hin Nei kmiing tummi akṭhi raan.

¹³Rinpaumin ado hur nraan hava mpha ava kthuwk kat ra.

¹⁴Naanni ado arthaan nraan ava mdu ngi plung purdun nimaang kdingi abin in.

¹⁵Mleija naan aksnuwm kma rek mata akro kma rekki atun thaanni mri pchaan ma nraan, Neiji ner ungta lousing apii nikaan di.

¹⁶Ungta anuh apah in, a u anao in, arilam in, aplap inni akparlaan pthii raan, ungta mii angṭhea ke eayou lamra;

¹⁷Nei kmiing tummi naanna mii mkheng ngi akipder chraan.

¹⁸Pdainu aluw leen inki sam arjik khdaat pre maang nime.

¹⁹Naanni ava adiil pchaan inbi kring pha chnaan di.

²⁰“Ungta naanni Jerusalem ma rawlmii rek do tkhul dok adee in mpha thu mmaan chaak nra knaija tdit adei chaan.

²¹Ava dilli Judia tha ka am mii rekki lown tha kchen ra, ungta khuwpaam ava tha ka am mii rekva mthu lut mso;

²²mleija mdo kjit dok mkheng mkurkhum nra, phuw klouki nit rek ava havale kurthuwk.

²³Mpha ava thu nao kuhur rek leh nao kakai mii rekka tija thu msuwkthi chdaatta! Mleija dultipaam thung ngi klin sii ki suwkthuwk ungu hava mii rek leen plung thit kthlung ra.

²⁴Mmaanna kaangksaang tun ktla lamra, mmaanna paamsuwk ki chati mkheng thung ngi kṭhi lamra, ungta mpha mkurkhum du khim khai Jerusalem ava ktlok chati rekki kther pthiira.

²⁵“Ungta kniw, ungu thla, leh bursi rek thung ngi titinna rek ka amra, ungta dultipaam ki chati rekki truwn archaang leh dii kakna ngi plung kpurthlown don kṭi chlamra.

²⁶Mṭit lei in leh dultipaam thu talu kthuwk rang tdit mdo bin lei inni ktet lamra; mleija parwaan rutan rekka kunchun ra.

²⁷Ungta Mii Chapa ngi armei thung ngi mrutan klin langlang leh mlaarnee ngi kurjung mmaanni kdei lamra.

²⁸Tunva hava mkheng kthuwk rangki mupṭhun mpha thu, tan aan inra khuw hansuwn, mleija naan kirliin nrang nga knaija.”

²⁹Ungta mhin inni Mma ngi pau purtolli theda, “Kduwt ding leh ding mkheng nga asuwn;

³⁰marnaa muksun daat le, ṭhaal khuw kveija tdit naan adak saanni ado dee in.

³¹Anto hep daatti, havale kthuwk adee in mpha thu, Isowr Kruwngpaam ma knaija tdit adei chaan.

³²Kinditti, Neiji ahin thaanni kthea, hava mkheng mthuw du khim khai, hava charuwlla maang nime.”

³³Parwaan leh dultia kmaang chra, pdainu Nei kpauna rek ava maang nime.

³⁴“Pdainu naan adak saanni hava rinkhu tuk sut da, kheel reenni chaanee da priida, krikki am maan, ungta nit ava ngi ktaang heppi kdei chdok mangi maanni aleen thaanni mthlen ma nra, asut pṭoi dei chaan.

³⁵Mleija hava dultipaam thu ka am mii mkheng leen kthlengra.

³⁶Pdainu kthuwk rangki hava rutan mkheng thungki akarthle nraan, ungta Mii Chapa ava maiṭhuwmmi krip ado pchaan nraan, mpha ktai thung ngi aṭhil chaanra asut pṭoi chaan.”

³⁷Ungta Mma ngi suwn ktaiji luwbuk Inn thung ngi purchuk da, pdainu jaan ktaiva Mma ngi kruwn lown tha han priik da.

³⁸Ungta mii mkheng nga Mma hinni karyaa chra, luwbuk Inn thu jiingsun kpanma ngi thleng lamda.