Read Lamkang LUK 24 Bible Online

LUK 24 - Lamkang bible

LUK 24

¹Ungta hapta ki mnii khat na thok jiingsun kpanma ngi, mmaanni mdo purchuwl chaak in reidii sin lamda, thlaan tha va lamda.

²Ungbi thlaan thung ki lung nga kpurlup dokki pha lamda.

³Ungu mthung ngi mvan lu in thungta, mukluwng ava mmaanni pha chlam mda.

⁴Mmaanni hava mlei thung ngi mnga chaak slii arlaan inni, asuwn, mbe thaanni mdo mna kipleu dang dang miilai knii rip daat lamda.

⁵Ungbi mmaanni ṭi chlamda, dul tunni mju tpet tir chaak arlaan inni, miilai knii rekki mhin inni theda, “Talu leiji kdiyou rek arlakki kring karheel ava naanni ado thlaam inda?

⁶Mma ngi Galil thung ngi ma am daat mpha thu, tak heppi ahin inni mthe tdit abin phaak in.

⁷Mii Chapa ava pnu kirvei rek khut thung ngi kparlaan pthira, ungu khros leen kupthoi lamra, ungta mnii kdumna nitti kring kardel ra.”

⁸Ungbi mmaanni Mma pauna ava bin phaak lamda.

⁹Ungta mmaanni thlaan thungki mdil kinle lamda, hava mkheng nga sowm lei khat leh mii murson rek hin song chlam da.

¹⁰Tunva kenyee rek hin hava ksong rekka Magdaleni Mery, Joana, Jeems leh nuh Mery ungu mmaan doṭhi snu rek murson;

¹¹pdainu hava pauna rek ava do ksikma bin lamda, ungta mhin inni rin chlam me.

¹²Pdainu Pitor ra rip daat da thlaan tha vachen da; tpeda mthu mhai sut thungta, buw daat kma donle do khat lee dei me, ungbi kthuwk nong ava leiji kngak tleiji inn tha vangda.

¹³Ungta ava nit katti miilai knii rek ava Jerusalem thungki ngi meel tikheu arveel karlat, Emmaus tdit khuw khat tha chet slii lamda.

¹⁴Ungta kthuwk dok hava nong rek mkheng mlei thung ngi khat leh khatti pau saam lamda.

¹⁵Mmaanni pau saam lamda, mkarteen meek slii arlaanni, Jisu mdak katti mbe thaan nai da, mmaan tu van kilṭhi lamda.

¹⁶Pdainu mmaan mikki suwtin chdei lam mda.

¹⁷Ungta Mma ngi mhin inni theda, “Naanni ache slii chun inni khat leh khatti theen tinu ado saam inna talu da?” Ungbi mmaanni kurnung lamda rip mer chdaat lamda.

¹⁸Ungta mmiing Kleupas tdit marlak inki khatti Mhin arthawngda, “Harvaiji kthuwk nong rek kdei kma, Jerusalem kvel mii ava nang daat ra?”

¹⁹Ungbi Jisu ngi mhin inni theda, “Tak kthuwk da?” Ungta mmaanni Mhin the lamda, “Nasareth ki Jisu mlei thu, Mma ava Khulpu khat ungu mnong tlot leh mpauna ava Isowr leh mii mkheng maiṭhuwmmi klin langlang khat.

²⁰Ungta nenki thiimpu kinreel rek leh paamkpupa rek va tak heppi mraal pii lamda, khros leen pthoi lamda, mdo eayo nraan mdo parlaan pthiin varple.

²¹Pdainu Isreel kpirliing ra ava Mma daat kdingi neenva kdo bin chaak in. Oji, ungu hava mkheng daat kma, nong mthuwna ava snii ngi mnii kdumna mphaakka.

²²Ava daat nowl kma, snu rek angṭhe ngi mhai pngak tir chaanda. Jiinsun kpanma ngi mmaanni thlaan tha va lamda,

²³ungbi mukluwng ava pha chlam mda; ungta mmaanni arvang kinle lamda, Mma kring kinle dok pi dilam da, Waantamsii ruk dei innu kdingi song lamda.

²⁴Neen kmiiṭhiin angṭhe rukka thlaan tha va lamda, ungbi snu rek pau son hep heppi pha nowl lamda; pdainu mmaanva dei chlam me.”

²⁵Ungbi Jisu ngi mhin inni theda, “O, ka aak rek, khulpu rek mkheng pau son dok ava tija thu ktappi arin chaak daat inna!

²⁶Khrista ngi suwkthuwk parteel thidonle, Mma laarnee thung ngi trin kma mlu rang pme mo?”

²⁷Ungta Mousi thung ki ngi khulpu rek mkheng thu pṭhunda, Mma mlei thung ngi laaika mkheng thungki ava the purlu pik lamda.

²⁸Ungu mmaanni mlu nraan khuw ava mnai thungta, Jisu va lamkla bet thang ngi kchet rang heppi tloda.

²⁹Pdainu mmaanni Mhin kdung ngi thlot chlam da, the lamda, “Neen tu kcheeng sap in che, mleija nit sowt dok da khuw kjiing chra.” Ava leiji mmaan kiprii ṭhi rang ngi vanṭoi lamda.

³⁰Jisu ngi mmaan tu kilṭhi ngi kmaal ra tebol be ngi mkon thungta, Mma ngi thenpen louda phowl kṭha parlaan thida, khuida, mhin inni pii lamda.

³¹Ungbi mmik in kparvang da, Mma tin chlam da, pdainu Jisua mmaan do sut na thungki maang dok da.

³²Mmaanni khat leh khatti the lamda, “Mma ngi lam tha paumin mi tsaam pik in thu, laaika rek mpvan mpha thu, nuplung inna kdung mdo pkaak pda?”

³³Ungta ṭhang ava kat thu mmaanni kurlou lamda Jerusalem tha kinle lamda, sowm lei khat rek leh mmiiṭhiin kthuwk kurkuk pha lamda.

³⁴“Do dak kat katti Mukpua ring kardel da Simon hin ktardet da,” dilam da the lamda.

³⁵Ava dilli lam tha kthuwk nong ava leh thenpen khuida mhin inni tak heppi ktardet tdit ki pau song chlam da.

³⁶Ungta mmaanni hava mthe slii arlaan inni Jisu mdak kat ava marlak inni rip daat da.

³⁷Pdainu mmaanna raothla khat kdei heppi kdung ngi piir lamda ṭi chlam da.

³⁸Ungta Mma ngi mhin inni theda, “Talu leiji kunchun in pti, ungu talu leiji aplung inna kinṭheekki ado reel in?

³⁹Nei kukhut leh kukhu asuwn, Nei kat ping; mhai kmei inra asuwn, mleija ru leh dak pummi ado dee in lulu ngi pthla va kurthuwk me.”

⁴⁰Mma ngi hava the thida mkhut mkhu mhin inni tdet lamda.

⁴¹Ungta mmaanva krin khot cha kma kdung reenni kanpa lamda, ungu mnga tlei arlaan inni mhin inni Mma ngi theda, “Hava thu tchaak raan do athloi in mo?”

⁴²Ungbi mmaanni tuwlva tro khat Mhin ni pii lamda,

⁴³ungbi Mma ngi louda mmaiṭhuwm inni chaa da.

⁴⁴Ava dilli Jisu ngi mhin inni theda, “Neiji naan tu kilṭhi ngi ka am mpha thu, Nei kdo the pauna rekka havale, mleija Neiki mlei thu Mousi Nowlam thung ngi, ungu khulpu rek leh laa rek thung ngi mdo kjit khim khaija kurkhumma.”

⁴⁵Ava dilli laaika rek mdo dee pandit chaak nraan, Mma ngi muplung in pvan pik lamda.

⁴⁶Ungta mhin inni theda, “Khrista ngi suwkthuw parteel thi donle, mnii kdum na thung ngi kdiyou rek thungki kring kardel ra,

⁴⁷ungu Jerusalem thu pṭhunda, chati mkheng thu Mma miing ngi plung ren hurda, ungta pnu rek kuptlot pik ava karyaam ra, dida anto mdo kjit dok.

⁴⁸Naanna havale ki sakhi rek in pti.

⁴⁹Ungta asuwn, Nei ki Kpah paureel dok ava aleen thaanni arju sii nik di, pdainu naanna kparthaang sii ki rutan atpihiil du in khim khai khuwpii hava thung ngi am daat in.”

⁵⁰Ava dilli Jisu ngi Bethania kpha dekki ṭhi lam thida, mkhut khiing da phowl kṭha parlaan chlam da.

⁵¹Mma ngi phowl kṭha mparlaan slii chunni mmaan hinki sunda, ungu parwaan tha hunkal chda.

⁵²Ungta mmaanni kdung kanpa kcha ngi Jerusalem tha mdil kinle lamda,

⁵³ungu luwbuk Inn thu kdet liit kma Isowr panpaak chlam da.