Read Lamkang LUK 3 Bible Online

LUK 3 - Lamkang bible

LUK 3

¹Tiberia Keisar ri mkum sowm lei parngat na mpaal mpha thu, Pontas Pilat ta Judia rek paam kpupa ngi amda, ungu Herod ti Galil paam kpupa ngi amda, ungta mnaopa Philip va Ituria, Trakhonitia, paam kpupa ngi amda,ungu Lysania va Abilini paam kpupa ngi amda.

²Annas leh Keiphas ti thiimpu kparthaang ngi ma am lam thu, kbowklaiji Sakharija chapa Johon hinni Isowr ki pauna thleng da.

³Ungbi mma ngi Jordon paamkuwl mkheng thung ngi chet da, pnu rek kuptlot pik ki, plung ren hurda baptis ktlo tummi paryaam da.

⁴Khulpu Isaijah pauna rek Laaika thung ngi mdo kjit dok lulu, “Kbowklaiji krowl khatti owngda: Mukpu lam ṭoira apurchuwl, mkhu ther na arjit pik.

⁵Ka aar khim khai kdim ra, ungu lown kchuwng leh lown khim khai kneemra, ungu mkowl kthii karji ra, ungta lam kparthap ava kparnaal ra;

⁶ungta daksaa mkheng ngi Isowr ki kirliinna kdei chra.”

⁷Ava ngi mlei kurthuwk da, mma ngi baptis mdo ptlot ra karva kurtuwl mii rek hin theda, “Doi knei pruwl charuwl naan! Plung thit kthlung rang thungki kchen ra aksi inna ku?

⁸Plung ren kuhur akurhui nraanki athei rek in apchui in, ungta ‘Neenki kpah raan Abraham kthloi in,’ dida adaksaa in thung ngi kthe pṭhun maan; mleija neiji ahin thaanni kthea, Isowr ra hava lung rek thung ki Isowr naole kpur owl ra.

⁹Tun kpha thu ruk va ṭhii rek ava ding rek arjuwng leenni ka am daatta, ava leiji kṭha thei kchui kma ding khim khaija phuwr don le mei thung ngi kvar pthiira.

¹⁰Ungta kurtuwl mii rekki mhin khewl lamda, “Ava mkurthuttu neenni talu tlo ni kaan di?”

¹¹Ungbi mma ngi mhin inni arthawngda, “Phrik knii kthloi mii va kthloi kma mii tu athem so; then kthloi mii ruk va anto heppi atlo so.”

¹²Khasna klou rek rukva baptis ktlo arva lamda, ungu mhin the lamda, “Chukpu, neenva tak tlo ni kaanda”

¹³Ungbi mma ngi mhin inni theda, “Ado lo raan thungki kheelli lou maan.”

¹⁴Rawlmii rek ruk va mhin khewl lamda, “Ungta neenna talu tlo nikaan da?” Ungbi mma ngi mhin inni theda, “Nam trom mi ku mii khat lee lowng maan, mata kindit kma thu mraal pii maan, ungu naan ki arda manni khop in.”

¹⁵Mii rek va arngai chda, ungta mii mkheng va Johon na Khrista daat ngaal mo kdingi muplung in thung ngi karkhewl lamda.

¹⁶Johon ni mii mkheng hin arthawng da, “Neiva dii tu kilṭhi ngi baptis akuptlot in; pdainu kthleng meek mii ava nei kihin nu klin langlang, Mma khu kok rek rii kparthle pik rang ruk neia kurhui chmaang; Mma ava ngi pthla kchiir leh mei tu kilṭhi ngi baptis akuptlot chraan.

¹⁷Mkhut thung ngi bu jaa na sinda, ungta kehu mchang rek ava ktom thu kthii ra, pdainu mparviit ava kṭuw knai kma meiṭhuwm thung ngi kapkaa pthii ra.”

¹⁸Ava leiji mdo kso nlam pau knempok tu kilṭhi ngi kṭha paumin mhin inni paryaam da.

¹⁹Pdainu paam kpupa Herod ti, mnaopa numei Herodia tummi raida, ungu Herod ti kṭha kma mdo tlot rek mkheng,

²⁰hava mkheng mdo tpom kthen ava leiji Johon na rowng inn thung ngi mdo khum pthii.

²¹Tunva mii mkheng nga baptis ptlot dok da, Jisu ruk va baptis tlo da mṭhil chaak slii arlaanni, parwaan kparvang da,

²²ungu pthla kchiir ava daksaa lulu ngi uṭhuw ngi mleen arjung ṭum da, ungta parwaan ki krowl khat thleng da, “Nah Nei Kchapa pti; Nah hin Kning kthlung nga.”

²³Jisu, Mma ngi mnong mupṭhun mpha thungva kum som kdum arveel, Mma Joseph Chapa, (anto ngi tbin in) Heli chapa,

²⁴Mathat chapa, Levi chapa, Meilki chapa, Janai chapa, Joseph chapa,

²⁵Matathia chapa, Amos chapa, Nahum chapa, Esli chapa, Nagai chapa,

²⁶Math chapa, Matathia chapa, Semein chapa, Josek chapa, Joda chapa,

²⁷Joanam chapa, Rhesa chapa, Yerubabal chapa, Sheltil chapa, Neri chapa,

²⁸Melkhi chapa, Addi chapa, Kosam chapa, Elmadam chapa, Er chapa,

²⁹Joshua chapa, Elijar chapa, Levi chapa,

³⁰Simeo chapa, Juda chapa,Joseph chapa, Jonam chapa, Eliakim chapa,

³¹Melea chapa, Mennachapa, Matatha chapa, Nathan chapa, Devid chapa,

³²Jesse chapa, Obed chapa, Boas chapa, Sala chapa, Nashon chapa,

³³Aminadab chapa, Admin chapa, Arni chapa, Heron chapa, Peres chapa, Juda chapa,

³⁴Jakob chapa, Isek chapa, Abraham chapa, Tera chapa, Nahor chapa,

³⁵Serug chapa, Reu chapa, Peleg chapa, Eber chapa, Shela chapa,

³⁶Kainan chapa, Arphakset chapa, Shem chapa, Noah chapa, Lamek chapa,

³⁷Methuselah chapa, Enok chapa, Jared chapa, Mehalalel chapa, Kainan chapa,

³⁸Enos chapa, Seth chapa, Adam chapa, Isowr chapa.