Read Lamkang JOHON 10 Bible Online

JOHON 10 - Lamkang bible

JOHON 10

¹Kindit, kinditti, Neiji ahin thaanni kthea, ku mii khatti jao luwng thurngot thung ngi klut ma, pdainu lam lep da kakal mii ava kupru ungu daku khat kurthuwk.

²Pdainu thurngot thung ngi klut mii ava jao krung do ruwn jao rek kurthuwk.

³Mma ava paltong kseel rekki mdo pvan pik, jao rekki Mma krowl mdo aryaak in, ungu mjao rekka mmiing mmiing inni ownda, mdo pthuw pik chaak lam.

⁴Mkheng kheng ngi Mma ngi pthuwk thida, Mma ngi ruri da, ungu jao rekki mdil ṭoida, mleija mmaanni mukrowl mdo aryaak in.

⁵Mmaanva mal rek dil ṭoi lamme; pdainu mmaanni mhin ki kchen chlam, mleija malrek krowl mmaanni aryaa pindit pikme.”

⁶Mmaan hin Jisu va hava pau purtolli theda, pdainu Mma ngi mhin inni mdo the ava deipindi lam mda.

⁷Ava leiji Jisu ngi mhin inni theda, “Kindit, kinditti, Neiji ahin thaanni kthea, Neia jao rek thurngot ava ping.

⁸Nei kdusukki karvang mii mkheng nga kupru leh daku rek lam, pdainu jao rekva aryaak pik me.

⁹Neia thurngot ava ping; Nei kthung ngi ku mii khatti mlu chaakbi, mma kaktlan pikra, ungu Mma thung ngi lut don thuwk donle suwl kpha chra.

¹⁰Kupruva mdo alrowt ra, mdo aeyo ra, ungu ke eakrep rang lei kthleng; Neia mmaanni rinkhu mdo phaak chaak nrang lei kthleng ping, ungta kheelli kpha chlamra.

¹¹Neia kṭha jao krung ava ping; kṭha jao krung ngi mjao rek tummi mrinkhu mdo piik chaak.

¹²Jao rek kpupa kma, mdo vai mii va tkei rek kthleng mdee mpha thu jao rek ma pthiida, kchen kcha; ungta tkeiji kjowng lamda ṭheek pinṭheu pthi tir da.

¹³Mma tvai mkurthut leiji kchen cha, ungta jao rek tuk sut pik me.

¹⁴Neia kṭha jao krung ava ping; Neiji kjao rek deinu, ungta kjao rekki Neia mdo tdee lam,

¹⁵Kpah ngi Nei mdeida Neiji Kpah kdo dee chaak ava lulu; ungu jao rek tummi Neiji krinkhu kdo piik chaak.

¹⁶Ungta ktlok jao ruk Neiji kdo thloi, mmaanna hava mluwng thu ame, mmaan rukka Neiji kdo ṭhi ma rome, ungta mmaanni kukrowl karyaa chlam ra.

¹⁷Ditta hava ngi mlei kurthuwkda, Neia Kpah ngi wonsat mloda, mleija Neiji wonsat kdolo kurnowl nra krinkhu kdo piik chaak.

¹⁸Ku mii khat lee ngi Nei kihinki mlowng nime, pdainu kjao rek tummi Neiji kdo piik chaak, Neiva kpii ki rutan kthloi, ungta klou pthii ki rutan ruk kdo thloi; hava Kpah ngi Nei kihinni mdo tsil chaak ndok.

¹⁹Hava pauna rek leiji Jihudia rek arlakki kinṭhek khat am nowlda.

²⁰Mii maknem mi theda, “Mma tarnam mdo thloi leiji mong kukto kcha a; talu leiji Mhin ni aryaak pik inna?”

²¹Mii murson rekki theda, “Hava tarnam kthloi khat pauthe lu pme, tarnamva mik ktot maplen pchaan mo?”

²²Phalbi kat thung ngi Jerusalem thung ngi taplaanna kmaal khat amda;

²³ungta Jisua Solomon dulbuk ki, luwbuk Inn thu kurlon da.

²⁴Ava leiji Jihudia rekki klop dok lamda, Mhin the lamda, “Tak pang roi ksotti makrem naandi? Khrista akurthut ta mhai the pik in.”

²⁵Jisu ngi mhin inni arthawngda, “Neiva akthe pik dok in, ungta naanva rin chmaanti, Kpah miing ngi Neiva nong rekka kdo tlot, mmaanni Neiki sakhi mdo tpiik pik lam;

²⁶pdainu naanni rin chmaanti, mleija naanna Nei kjao rek kurthuwk maanti.

²⁷Nei kjao rekva kukrowl mdo aryaak in, ungu Neiji kdee lam, ungta mmaanva kdil mdo ṭoi chaak in;

²⁸Ungta Neiji kṭuw knai kma ki rinkhu kdo piik chaak lam, ungu mmaan ava maang nime, ungta Nei kukhut thungki ku khat lee ngi mlowng pchaang nime.

²⁹Nei kihinni mikpii kcha Kpah ava mkheng thungki klin sii kurthuwk, ungta Kpah khut thungki ku khat lee ngi lowng pchaang nime.

³⁰Kpah leh Neia khdaat in ping.

³¹Jihudia rekki lung chom lamda kdeeng ra kurthlong lamda.

³²Jisu ngi mhin inni arthawng da, “Neiji Kpah hinki nong kṭha rek ado ktidet in leiji havale thungki tva pi dida lung ngi mdeeng naandi?”

³³Jihudia rekki Mhin arthawngda, “Kṭha nong rek leiji neenva lung ngi akdeeng ra kurthlong maan ring, pdainu Isowr kjowm kcha ngi apau lei, mleija miilai khat kurthuwkki Isowr ping ngi kardi tinu.”

³⁴Jisu ngi mhin inni arthawngda, “Neiji kthea, naan Nowlam thung ngi naanna isowr rek in pti dida kjit memo?

³⁵Isowr pauna arjun narek hinni Mma ngi mukpu rek dida (ungu laaika ava kui me),

³⁶Mpah ngi kcholda dultipaam thu mdo arjun sii Mma hin, ‘Naanni Isowr kjowm changi kpauva,’ kdingi atheennu, ‘Neia Isowr Chapa ping,’ kdo dit leimo?

³⁷Neiji Kpah nong rek ktlo kma kukurthutbi, naanni mrin chni maanti.

³⁸Pdainu Neiji ktlo kukurthut bi, naanni rin cha mjown tiva, Kpah Nei kthung ngi amda, Neiji Kpah thung ngi ka am tdit ado dee nraan, knong tlot rekka arin chaan.”

³⁹Veikhat nowlli mmaanni kukjowng ra kurthlong lamda, pdainu Mma ngi mkhut thuwnki karthlet chda.

⁴⁰Mma ngi Jordon arkaanda, chodu ngi Johon ni baptis mdo tlot na mun tha vang nowlda, ungu ava thu kcheeng chdaat da.

⁴¹Ungta Mma hinni mii knempok thleng da, “Johon va titinna rek tlome, pdainu hava Miilai mlei thung ngi Johon ni mdo the khim khaija kindit kat kurthuwkka.”

⁴²Ungta ava thung ngi mii knempokki Mma rin chda.