Read Lamkang JOHON 11 Bible Online

JOHON 11 - Lamkang bible

JOHON 11

¹Tunva Mery leh mu unu Martha khuw Bethania tha Lasar tdit miilai khat ava koida.

²Mukpu khu tun thao ptlongda ungu ṭap da mkhu ava msammi kuknuwl Mery ava ṭahpa Lasar ra koi chda.

³Ava leiji Mma hinni mnaonu vasii da, theda, “Mukpu, Nah wonsat lo mma kukoi kcha a.”

⁴Pdainu Jisu ngi ava maryaak mpha thu, theda, “Kukoi ava kdiyou rang lei pme, ava ngi Isowr Chapa mdo tpunlor nrang lei, Isowr laarnee.

⁵Tunva Jisu va Martha leh mnaonu ungta Lasar ava kdung wonsat lo chlam da.

⁶Mma ngi Lasar kukoi maryaak dok dil tha, Mma ngi ma am ndaat thung ngi nii kcheeng bongda.

⁷Ava dilli hava diltha Mma ngi msiikhu rek hin theda, “Nenni Judia tha vang nowl inche.”

⁸Siikhu rekki Mhin theda, “Rabbi, Jihudia rekva tun tunni lung ngi akdeeng youra athlaam slii lamda, ungu ava tha vang nowl nmo?

⁹Jisu ngi arthawngda, “Nii khatta ṭhang somlei knii pmemo? ku mii khatti suwnni mchebi, mma ngi khusiir parthi nime, mleija mma ngi hava dultipaam ar awng mdo dee.

¹⁰Pdainu jaanni ku mii khatti mchebi, mma ngi khusiir kparthira, mleija mma thung ngi mar awng ame.”

¹¹Mma ngi mpau dok le mhin inni theda, “Nenki nplap in Lasarra ki iip chdokka, pdainu Neiji vangda ki iip thungki pardel nikdi.

¹²Siikhu rekki Mhin theda, “Mukpu, mma ngi mi ii bi, kdam chmunra.”

¹³Tunva Jisuva mdiyo dok mdo thena kurthuwk da, pdainu mmaanva ki iip karnga kcha ngaal the pak da kdingi bin lamda.

¹⁴Ava leiji Jisu ngi kindit the pik lamda, “Lasar ra kdiyou dokka;

¹⁵naan do rin chaak nraan, naan tummi ava tha ka amma kdung ngi kanpa kchaam ping, pdainu mma vanpha inche.”

¹⁶Kinphiir mdo dit Thomas ava ngi mmiiṭhi rek hin theda, “Mma tu kilṭhi ngi tdiyo nraan nen rukka vang inche.”

¹⁷Tunva Jisu marvan thungta, Lasar ra thlaan thung ngi mnii plit nangi phada.

¹⁸Bethania khuw ava Jerusalem thungki meel knii arveelli lam karlat,

¹⁹Mṭahpa inni mlei kurthuwkda, Martha leh Mery plung ngam kpiira Jihudia rek mii knempok thlengda.

²⁰Jisu karvang slii Martha ngi maryaak thungta, Mery ngi inn thu mkon daat arlaanni, mma ngi lam tha vadu chda.

²¹Martha ngi Jisu hin theda, “Mukpu, hava tha a am daat tlaangbi kṭahpa inna kdiyou kma rang nga.

²²Ungta tun rukva Isowr hin tha Nang ngi ado ṭhil chaak khim khai ava akpii chra.”

²³Jisu ngi mhin theda, “Aṭahpa ava kring kardel nowlra.”

²⁴Martha ngi Mhin theda, “Mṭutna ki kring karheel thung ngi mma kring karheel nowlra tdit neiji kdee.”

²⁵Jisu ngi mhin theda, “Neia kring karheel, ungu rinkhu ava ping; Nei mikrin kcha mii ava mma ngi diyou daat joso kringra,

²⁶ungta kring mii leh Nei mikrin kcha mii pum ktai ava diyou nime. Hava arin chakka?”

²⁷Mma ngi Mhin theda, “Oji, Mukpu, Nah Isowr Chapa Khrista dultipaam thung ngi kurjung tdit neiji krin chaak pi.”

²⁸Martha ngi hava mthe dok diltha, Mery hin vangda, ungu ownda, tuprutti mhin theda, “Chukpua hava tha ka am daatta, ungu nah ato ownna.”

²⁹Ungta mma ngi ava maryaak thungta rip tengda Mma vaphada.

³⁰Tunva Jisua khuw thu klut mlaiji, Martha do kurdut na mun thung ngi am daatda.

³¹Mma hin lungam piida inn thu ka am daat Jihudia rekki, Mery ngi rip tengda mhaithuw dei lamda, thlaan tha kṭap va pakda kdingi mmaan rukva mdil vaṭoi lamda.

³²Ava leiji Meryva Jisu am ndaat mun tha arva da, ungu Mma mdee thungta mkhu therri tluwda, Mhin theda, “Mukpu hava tha a am daat tlaangbi, kṭahpa kdiyou kma rang nga.”

³³Mery leh mmiiṭhi Jihudia rek kṭap mdee thungta, Jisua pthla ngi muplung kdung ngi thowngda, ungu muplung khamda;

³⁴ungta Mma ngi theda, “Tva thung ngi alruwl inda?” Mmaanni Mhin theda, “Mukpu arva ra asuw.”

³⁵Jisu ṭapda.

³⁶Ava leiji Jihudia rekki the lamda, “Asuwn, tija pang thu Mma va wonsat mlo chaak daatta!”

³⁷Pdainu mii angṭhe ngi theda, “Mik ktot rek kiplen pik Mma va mdiyo ma nra tlot pik pchaang nimemo?”

³⁸Ava dilli Jisua kdung reenni muplung thowng nowlda, thlaan tha arvada, khur khat leen lung khat tipnen amdaat da.

³⁹Jisu ngi theda, “Lung alou pthiin.” Ungbi kdiyou ava chernu Martha ngi theda, “Mukpu, tunva kapnam reenra, mleija mdiyona nii plii mphaak dokka.”

⁴⁰Jisu ngi mhin theda, “Nang ngi arin chaakbi, Isowr laarnee dei chnadi, dinu athe pik maangmo?”

⁴¹Ava leiji mmaanni lung nga lou pthi lamda, ungta Jisu ngi tan aanda theda, “Apah ado taryaak pik leiji akpanpaak chaakka.

⁴²Mpha ktai thu Nah do aryaak pik Neiji kdee chaak, pdainu hava kdo the ngi Neia Nah do arju sii tdit kbe tha krip daat rekki mdo dee nraan.”

⁴³Mma ngi hava mthe diltha, krowl kparyaa ngi owngda, “Lasar arhun thuwk.”

⁴⁴Kdiyou miilai ava mkhut mkhu ungta mmai buw kurlum dokki arhun thuwkda. Jisu ngi mhin inni theda, “Aparjee pik chaan, ungta mma ngi vang chaso.”

⁴⁵Ava ngi mlei kurthuwkda Mery do ṭhi Jihudia rek mii knempokki, Mma do tlot dei lamda, Mma rin chlam da.

⁴⁶Pdainu mii angṭhe ngi Pharisi rek hin vangda, Jisu nong tlot song lamda.

⁴⁷Ava leiji thiimpu kinreel rek leh Pharisi rekki karseelra kurkuk lamda, the lamda, “Nenva tak tlo chenaan di? mleija hava Miilaiva titinna rek knempok mtlotta.

⁴⁸Mma ngi hanto mtlot kurnowl tlit daatbi, mii khim khaiva Mma krin chra, ungta Romia rekki thleng donle mmun kchiir ruk nmii rek in ruk mikniing ngi ki ae krep ra.”

⁴⁹Pdainu mmaan arlakki khat, ava kum thung ngi thiimpu kparthaang ngi ka am, Keiphas ava ngi mhin inni theda, “Naanni do khat lee dei maanti;

⁵⁰mleija mii rek tummi khat kdiyoura, ungta chati rek mkheng nga maang nime tdit kurthut chak ava naanni dei maanti.”

⁵¹Mmava mthina ki rutanni the me, pdainu kum ava thung ngi thiimpu kparthaang ngi amda, chati rek tummi Jisu kdiyoura tdit ki mma ngi mdo phuwn.

⁵²Ungta chati tum daat rang pme; pdainu duwn tha Isowr naole ṭheek kinṭheu ava khdaatti ma am nrang lei.

⁵³Ava leiji nit ava thungki pṭhun lamda, tak heppi te eayo raan kdingi karseel psuk lamda.

⁵⁴Ava ngi mlei kurthuwkda, Jisua Jihudia rek arlakki kandang ngi chet kurnowl me, pdainu kbowk lai ktinel khuwpaam, Ephrahim mdo dit khuwpii tha vangda; ungta msiikhu rektu ava tha am lamda.

⁵⁵Tunva Jihudia rek taplaanna ava nai tekda, taplaanna du ngi mdaksaan mkartleu chaak nraan; khuwpaam ava thungki mii knempok Jerusalem tha hanglamda.

⁵⁶Mmaanni luwbuk Inn thung ngi mri daat in mpha thu Jisua suw thlaam lamda, khat leh khatti the lamda, “Tak heppi abin inna? Kmaal thung ngi thleng nime mo?”

⁵⁷Tunva thiimpu kinreel rek leh Pharisi rek va, ku mii khatti Mma mdee ta, tukjown nraan mihai the pik inso kdingi pau pṭum lamda.