Read Lamkang JOHON 12 Bible Online

JOHON 12 - Lamkang bible

JOHON 12

¹Jisua taplaanna nii truk mkanthan daat arlaanni, Jisu ngi kdiyou dok mdo prin pardel Lasar amna Bethania tha arvangda.

²Ava tha mmaanni kjiingki von vailamda; Martha ngi sok lo lamda, ungta Lasar ra Mma tu tebol tun kuk ong khat kurthuwk da.

³Mery ngi mman klu langlang nard tdit reidii kpanchel deek mkhung mṭim louda, Jisu khu pbul pik da, ungta msammi mkhu knuwl pikda, ungu inn thung nga reidii krimmi dim chda.

⁴Pdainu msiikhu rek thungki khat Iskariot Judas (Mma kro kma) ava ngi theda,

⁵“Talu leiji hava reidiia dinari arjaa kdum mi jurda sra hin pii meda?”

⁶Mma ngi sra tuk msut kat na mdo the ava pme, pdainu mma ngi sumbuwr arkhii da, kupru khat mkurthuwk leiki, mthung ngi mdo daal ava mma ngi mdolo chaak lu.

⁷Jisu ngi theda, “Mma ama dok in, Nei mdo tulruwl na mma ngi arkhii chaso.

⁸Naanni sra ava mpha ktai thung ngi ado amṭhi daat in, pdainu mpha ktai thung ngi Neia mthloi ni maanti.”

⁹Kurtuwl klin langlang Jihudia rekki Mma ava tha ka am daatta tdit maryaak in thungta, arva lamda, Jisu lei daat kma pdainu Mma ngi kdiyou thungki mdo prin pardel Lasar ruk suw nuwm lamda.

¹⁰Ava leiji thiimpu kinreel rekki Lasar ruk mdo eayo nraan tlo lamda.

¹¹Mleija mma leiji Jihudia rek knempok sun chda Jisu rin chlam da.

¹²Mupduk niiva Jerusalem tha kmaal rangki Jisu karhang nga tdit kurtuwl mii rekki aryaa da.

¹³Ava leiji mmaanni sipra ding baak lou lamda, ungta Mma kurdut ṭhira chet lamda, owng lamda, “Hosanna! Mukpu miing ngi kthleng Mma ava msuwkṭha, Isreel rek Kruwng ava msuwkṭha.

¹⁴Ungta Jisua skowlraam suwn khat phada, mleen ko ongda; ava hanto mdo kjit dok,

¹⁵“ṭi ma, Sijon chanu; asuw, nah akruwng nga kurjung nga skowlraam suwn leen kuk ong nga!”

¹⁶Rukriva msiikhu rekva hava dei pandi chlamme; pdainu Jisu mkunlor dilli Mma mlei thung ngi mdo kjit, leh Mma thu kthuwk bin phaak ro lamda.

¹⁷Ungta thlaan thungki Lasar mo own mpha thu Mma tu kilṭhi kurtuwl mii rekki kdiyou thungki mdo prin pardel naki sakhii hurpik lamda.

¹⁸Kurtuwl mii rekki Mma kurdut ṭhira mhai naanki mlei ava titinna mdo tlot lei.

¹⁹Ava dilli Pharisi rek khat ti the da, “Naanva do khat lee tlo pchaang maanti, asuwn, dultipaamva Mma dil mṭoi chaakka.”

²⁰Tunva kmaal thung ngi luwkbuk ra kahang mii rek arlakki Grik mii angṭhe amda.

²¹Galil ki Bethsaida thungki Philip hinni havalea thleng lamda, mhin the lamda, “Ocha, neenni Jisu kdee nuwm chaak inna.”

²²Philip pi vangda Andrija hin songda, ungta Andrija ngi Philip tu vave lamda, mmaanni Jisu hin song lamda.

²³Ungta Jisu ngi mhin inni arthawngda, “Mii Chapa kunlor nrangki ṭhang ava kvei dokka.

²⁴Kindit, kinditti, Neiji ahin thaanni kthea, kehu muh khatti dul leen tla da mdiyo mabi, anto ka am chdaatra, pdainu mdiyobi, thei knempokki kchuira.

²⁵Rinkhu wonsat klo miia kmaang chra; ungu hava dultipaam thu rinkhu kipder miia rinkhu ava tummi kṭuw knai kma markhiik chaakka.

²⁶Ku mii khatti Nei wonsat mtalobi, mma ngi kdil aṭoi chaso; ungta Nei ka am na thung ngi ksra owr rek rukka ka amra; ku mii khatti Nei sok mtalo chaakbi, Kpah ngi kakjat pik ra.

²⁷Tunva kraothla kja kcha a. Ungta Neiva tak the nikda? ‘Apah hava ṭhang thu mhai ktlan nim timo? Eme, Neia hava ṭhang tummi kthleng ping.

²⁸Apah Nah amiing kunlor kurthuwk so.” Ava dilli parwaanki krowl khat thlengda, “Neiji akpunlor dokka, ungu punlor nowl nikdi.

²⁹Mma be ngi krip kurtuwl mii rekki aryaada, ungbi the lamda, “Khuw kipria,” kdingi the lamda. Angṭhe rekva theda, “Waantamsii ngi mkarbiik ṭhia.”

³⁰Jisu ngi arthawngda, “Krowl hava Nei ktum pme naan tummi kthleng.

³¹Tunva hava dultipaam mdo kṭewl nra, hava dultipaamki paamkpu rek duwn tha mdo var pthi nra;

³²ungta Neia dulti thungki mtikhiin mpha thu, mii mkheng ava Nei kdaksaa thung ngi howl nikdi.”

³³Hava mdo the ava Mma ngi tak hep kdu ki diyo ngi kdiyou rang tdit mdo tdet na.

³⁴Kurtuwl mii rekki Mhin arthawngda, “Khrista kṭuw knai kma ka am ra tdit Nowlam thung ngi neenni karyaak in. Mii Chapa ava kikhiing rangpi diti tak heppi Nangva athea? Mii Chapa kuda?”

³⁵Jisu ngi mhin inni theda, “Mpha roi ksot bong kira mar awng ngi ado tiṭhiin, aleen thaanni kjiingnu mthlun ma nra, mar awng athloi slii thuwnni chet in; kjiing thu kchet miiva Mma tva tha kchetta tdit deime.

³⁶Mar awng athloi daat in mpha thu, naanni mar awng chapa rek akurthut nraan, mar awng ava arin chaan.” Jisu ngi hava the thida, sun chda, mmaan thungki mthina ngi kurdowl chda.

³⁷Mma ngi titinna rek knempok mmaiṭhuwm inni tlo daat joso, mmaanva Mma rin chlam me;

³⁸Khulpu Isaijah dothe pauna ava hanto kurkhumda: “Mukpu neen kpausaam chaak inna ku ngi rin chdon, ungu ku ngi Mukpu rawl dona ava kpunlor rangda?”

³⁹Ava ngi mlei kurthuwkda, mmaanni rin chliit lamme. Mleija Isaijah ngi hanto the nowlda,

⁴⁰“Mma ngi mmik in ptotda, ungu muplung in tapchai da, mmik inni dei lam mso, muplung ril inni deipandi lam mso, ungta mdam nraan Nei ki hin kinle lam mso.”

⁴¹Isaijah ngi hava mdo the naki mleija, mma ngi Mma laarnee deida, ungu Mma mlei thu kpau.

⁴²Anto daat joso rutan kthloi mii knempokki Mma rin chda, pdainu mmaanna synagog duwn tha mdo knen pthi ma nraan, Pharisi rek mdo ṭit lei inni thethuw lamme;

⁴³mleija mmaanva Isowr do panpaak kchang nga mii rek do panpaak ra ngei lamda.

⁴⁴Ungta krowl kparyaa ngi Jisu ngi owngda, theda, “Nei mikrin cha mii va Nei mdo trin chaak ava pme; pdainu Nei mjuksii Mma krin cha kurthuwk.

⁴⁵Ungta Nei mhai kdei cha miiva Nei mjuksii Mma ava kdei cha kurthuwk.

⁴⁶Nei mhai krin cha ku mii khat ava ngi kjiingnu thu ma amma nra, Neia dultipaam thung ngi mar awng khat lulu ngi kurjung ping.

⁴⁷Ku mii khatti Nei kdo the hava aryaada, ungu markhiik mabi, mma Neiji kṭewl maang, mleija Neia dultipaam kekṭewl kurjung pmaang, pdainu dultipaam kaktlan ra kurjung ping.

⁴⁸Nei mapthleida kpauthe karlaang cha kma mii ava kekṭewlra; Nei kdo the dok pauna ava ngi mma mṭutna nitti kekṭewlra.

⁴⁹Mleija Neiva kthina ki rutanni the maang, Nei mjuksii Kpah mdak katti, tak the nikdi ungu tak heppi pau nikdi tditki paureen mdo tpiik chaak dok.

⁵⁰Ungta Mma paureen ava kṭuw knai kma ki rinkhu tdit Neiji kdee chaak. Ava leiji Nei kdo the ava Kpah dothe ava kthe cha ping.”