Read Lamkang JOHON 13 Bible Online

JOHON 13 - Lamkang bible

JOHON 13

¹Tunva taplaanna kmaal ava dutha Jisu ngi hava dultipaam thungki Mpah hin tha msun chaak nrangki ṭhang kvei dok mdee thungta, dultipaam thungki Mma mii rekka kdung ngi wonsat lo chda, Mma ngi mṭutna kpha dekki wonsat lo chlamda.

²Ungta dijabowlli Simon chapa Iskariot plung thung ngi mdo ro ma nrangki mdaal dok diltha, kjiingki kmaal mpha thu,

³Jisu ngi hava do mkheng nga Kpah ngi kukhut thu mdo tpiik chaak dok, ungu Kpah hinki kurjung ping, ungta Kpah hintha hung nikdi tdit dei dokda,

⁴Mma ngi kmaal thungki ripda, mdomna msiirri thii thida, ungta Mma mdaksaa ki buw liple suwn ava kparyeelda.

⁵Ava dilli Mma ngi arkuw khat thung ngi dii ptlongda, ungta siikhu rek khu kulṭhu pṭhunda. Ungta Mma doyeel daat buw liple suwn ava ngi knuwl pik lamda.

⁶Mma ngi Simon Pitor hin arvangda,; ungbi Pitor ri Mhin theda, “Mukpu, kukhu mhai alṭhut pik namo?”

⁷Jisu ngi mhin arthawngda, “Tun tunva Neiji tak ktlotta tdit dei nimti, pdainu dil thang rongi deipandi nadi.”

⁸Pitor ri Mhin theda, “Nang ngi kukhu kulṭhu ro nime.” Jisu ngi mhin arthawngda, “Neiji akhu kulṭhut mabi, Neitu mri am mti.”

⁹Simon Pitor ri Mhin theda, “Mukpu, kukhu hehe daat kma, kluw ruk mhai alṭhut pik cha.”

¹⁰Jisu ngi mhin theda, “Kulṭhu dok miia mkhu daat kma donle arleek setti mkulṭhut nra amme, pdainu mdak mkheng nga kartleu chdok, ungta nah kartleu dok pti, pdainu naan mii pum ktai ava pme.”

¹¹Mleija Mma kro kmara miia dei chda; ava leiji Mma ngi akheng inva kartleu maanti,” dida theda.

¹²Mma ngi mkhuwn mulṭhut dok le mdomna rek louda, ungu mkonna arsang thida, mhin inni theda, “Neiji ahin inni kdo tlotta adee inna?

¹³Naanva Chukpu, ungu Mukpu, kdingi ado to own in, ungu ava mkindit kat kurthuwk, mleija Neia ava ki tum ping.

¹⁴Ava mkurthut tu naanki Mukpu leh Chukpu ngi akhuwn mulṭhutbi, naan rukva khat leh khat khu akulṭhut raan.

¹⁵Mleija Neiji purtolnu ado kpiik in, Neiji naan hin kdo tlot heppi naan rukva atloin.

¹⁶Kindit, kinditti, Neiji ahin thaanni kthea, sra owr khatti mma ki chukpu ava hin klin ava pme; mdit mata mdo haisii mii ngi ksii ava hinni klin ava pme.

¹⁷Naanni hava lea deida atlot inbi, naanna suwkṭha in pti.

¹⁸Neiva akheng in hinni pau the maang, Nei kdo kcholla Neiji kdo dee; laaika mkurkhum nra, ‘Neiji thenpen kdo maalṭhi mii ava ngi mkhu pkhong khiing donle kraal mikpii ra.’

¹⁹Nong mthuw du ngi tun tunni hava akthe pik dok inna, mleija nong mthuw thu rongi Neia Mma thide kdingi mrin cha ro naandi.

²⁰Kindit, kinditti, Neiji ahin thaanni kthea, Nei kdosii thungki khat karlaang cha miiva, Nei mdo tarlaan chaak, ungta Nei mkarlaang cha miiva Nei mjuksii Mma mdo arlaan chaak.”

²¹Jisu ngi hanto mthe dokle, Mma pthla ngi ja chda, ungu the thuwda, “Kindit, kinditti, Neiji ahin thaanni kthea, naan arlakki miilai khat ava ngi mro nime.”

²²Ku mdo thena tdit mkindit ma leiji, siikhu rekka khat leh khat kursuw lamda.

²³Ava leiji Jisu wonsat lo, Jisu plung tnelda kikbeu, siikhu rek thungki khat,

²⁴Simon Pitor ri mmik pkhapda, ungu theda, “Mma kuda, mhai the pik chaan.”

²⁵Jisu plung tun kikbeu ava ngi Mhin theda, “Mukpu ku da?”

²⁶Jisu ngi mhin arthawngda, “Neiji thenpen kṭik puhuwmda kdo piik mii avara.” Ava leiji Mma ngi thenpen kṭik puhuwm thida, Iskariot ki Simon chapa Judas ava hinni piida.

²⁷Ava leiji thenpen kṭik diltha mma thung ngi seitaan lutda. Jisu ngi mhin theda, “Nang ngi ado tlot nuwm slii ava kbeiji atlo dok.”

²⁸Tunva tebol be ngi kuk ong mii khat lee ngi talu lei mhin anto mdo the tdit deipandi chlamme.

²⁹Mii angṭhe rekva Judas ava ngi sumbuwr mdo sin lei pakda kdingi bin lamda, mleija Jisu ngi mhin theda, “Kmaal tummi tikriin inna aren dok.” Mata sra hin mrukjown mdo them pik nra theda.

³⁰Ava leiji mma ngi thenpen kṭik marlaan dok diltha, duwn tha thuwk tengda, ungu mpha ava jaan.

³¹Mma msun dok diltha Jisu ngi theda, “Tunva Mii Chapa ava kpunlor ra, ungu Mma thung ngi Isowr ra kunlorra.

³²Mma thung ngi Isowr mkunlorbi, Isowr rukka Mma mdaksaa thung ngi kpunlorra, ungta Mma kuknot ti kunlor ra.

³³Kmo sisi rek, naanna mpha mongtek pang thu Neiva aju kurthlo ṭhi nikaandi, naanni mthlaam naandi; Neiji Jihudia rek hin kdo the lulu ngi tun rukku ahin thaanni Neiji kthea, ‘Nei ksun nra mun ava tha naanna thleng pchaang nimaanti.’

³⁴Neiji paureen ren khat akpiik inna, khat leh khat wonsat ekurlo in; mleija Neiji wonsat ado klo in heppi, khat leh khat wonsat kurlo chaan.

³⁵Naanni khat leh khat wonsat akurlo inbi, naan ava Nei ksiikhu rek tdit hava mii mkheng ngi kdei rora.”

³⁶Simon Pitor ri Mhin theda, “Mukpu tva tha ṭoi nadi?” Jisu ngi arthawngda, “Tun tunva kche nrang thangva mṭoi pchaang nimti; pdainu dil thang ngi mṭoi ro nadi.”

³⁷Pitor ri Mhin theda, “Mukpu talu leiji tun tunva aṭoi pchaang ni maangda? Nah tummi krinkhu var nikdi.”

³⁸Jisu ngi arthawngda, “Nei ktummi arinkhu var namo? Kindit, kinditti, Neiji ahin kthea, nang ngi vei kdum atmat du khim khai harkhuwng ngi khuwng nime.