Read Lamkang JOHON 14 Bible Online

JOHON 14 - Lamkang bible

JOHON 14

¹“Naanni plung pjada am maan, Isowr arin chaan.

²Kpah hin thangva innka knempokki ka am; anto mkurthut mau, Neiva hung nik don naan tumra mun apurchuwl pik nikaandi dida the nikmo?

³Ungta Neiji hungda mun khat kpurchuwl dok le, veikhat arjung kinleda, Nei ka am ntha naan ruk a am nraan, ungu Nei kdak katti alou nikaan di.

⁴Ungta Neia tva tha kchet slii imping tdit naanni ado dee in.”

⁵Thomas ti Mhin theda, “Mukpu tva tha ṭoi nadi tdit neenva dei chmaan ring, tak heppi Nah lamma dei nikaanda?”

⁶Jisu ngi mhin theda, “Neia lam, ungta kindit, ungu rinkhu ava ping; Nei kihin kma donle ku mii khat lee ngi Kpah hin thleng pchaang me.

⁷Naanni Nei atidee inbi, Kpah ruk dei naandi, tunva Mma ava adee inna ungu Mma ava adee chaak dok inna.”

⁸Philip pi Mhin theda, “Kpah in ava mhai tdet chaan, ungta kuplung in kngam ra.”

⁹Jisu ngi mhin theda, “Hava mpha roi ksot thung ngi Neiva akurthlo ṭhi daat innu, ungu nangva mdei liit mti mo Philip? Nei mikdei kcha miiva Kpah ruk mdo dee; tak heppi, ‘Kpah mhai tdet chaan,’ ditinu athea?

¹⁰Neiji Kpah hin ungu Kpah ngi Nei kihin ka am tdit rin cha mtimo? Neiji ahin inni kdo the pau ava kthina ki rutanni kdo the ava pme; pdainu Nei kthung ngi ka am Kpah ngi Mma nong rekka mdo tlot.

¹¹Neiji Kpah hin ungu Kpah ngi Nei kihin ka am tdit arin cha; mdit mata nong rek ava leiji mhai rin cha.

¹²Kindit, kinditti, Neiji ahin thaanni kthea, Nei mikrin kcha miiva Neiji kdo tlot nong rek mma ngi ktlora, mleija Neia Kpah hin hung nikdi.

¹³Naanni Nei kmiing ngi aṭhil chaak in khim khai thu, Neiji atlot pik nikaandi, mleija Mchapa thung ngi Mpah ava kpunlor ra.

¹⁴Nei kmiing ngi ado ṭhil chaak in khim khaija Neiji atlot pik nikaandi.

¹⁵“Naanni Nei wonsat atulo inbi, Nei kpaureen rek arkhii naandi.

¹⁶Ungta Neiji Kpah hin ṭhil nikdi, ungu akbom chraanni Mma ngi ktlok khat,

¹⁷ditta kṭuw knai liit kma akṭhi chraanki kindit pthla ava akpii chraan, dultipaam va arlaang pchaangme, mleija Mma tdee ruk deime kdei ruk kurthuwk me; naanva adee in, mleija Mma ngi naan thung ngi akurthlo ṭhi tlit inda, ungu naan thung ngi ka am.

¹⁸“Neiva asui nimaan ring, Neiji naan hin arjung nikdi.

¹⁹Anto daat joso mpha mruk tummi dultipaamva mdei bong nime, pdainu naanva mdei naandi; mleija Nei krin leiji naan ruk ring naandi.

²⁰Nit ava thu Neiji Kpah hin, ungta naanni Nei kihin, ungu Neiji naan hinni ka am ava dei ronaandi.

²¹Nei kpaureen rek arlaangda, avale karkhii cha miia Kpah ngi wonsat klora, ungu Neiji wonsat lo nikdi ungta mhin Neiji kdaksaa kat tdet nikdi.

²²Iskariot kma Judas ava ngi Mhin theda, “Mukpu, adaksaa katta mtidet chaanti, ungu dultipaam hin pme diti tak heppi ado theda?”

²³Jisu ngi mhin theda, “Ku mii khatti Nei wonsat mtulobi, mma ngi kpauna rek karkhii ra, ungta Kpah ngi wonsat klora, ungu neenni Mhin thleng nikaan di, Mma tu kilṭhi ngi ta am nraan inn sa nikaandi.

²⁴Nei wonsat muklo kma miiva kpauna rek arkhii me; ungta naan do aryaak pauna ava Nei kihin ki pme, pdainu Nei mjuksii Kpah Mma hinki.

²⁵“Neiji aka am ṭhiin slii thu hava lea ahin inni kthea.

²⁶Pdainu Nei kmiing ngi akbom raan Kpah dosiira Pthla Kchiir Mma ngi do mkheng akpurchuk chraan, ungta Neiji ahin thaanni kdo the mkheng akpibin paphaak chraan.

²⁷Naan hinni Neiji kdaai akmaak pik inna, Neiki kdaai ava akpiik chaak inna, dultipaam do piik lulu ngi Neiva apii maan ring, aplung in pja maan ungu ṭi maan.

²⁸‘Neia sun nikdi, ungta ahin thaanni thleng nikdi,’ dinu Neiji naan hin kdo the aryaa naandi, naanni Nei wonsat atolo inbi, Neiji Kpah hin kuhun leiji kanpa naandi, mleija Nei kihinva Kpah ngi klin sii.

²⁹Ungta mthuw mpha thung ngi ado rin chaak nraan, tun mthuw du ngi Neiji akthe pik inna.

³⁰Neiji ahin thaanni knemmi pau saam bong nimaang, mleija dultipaam ki paamkpu kthleng nga; mmava Nei kleen rutan thloime;

³¹pdainu Neia Kpah wonsat kdolo, Kpah ngi Nei kihin mdo tpiik paureen ava heppi Neiva kdo tlot mleija dultipaam ava ngi mdo dee nrang lei. Kardel in hava thungki sun in che.