Read Lamkang JOHON 15 Bible Online

JOHON 15 - Lamkang bible

JOHON 15

¹Neia kindit rikrou dii ava ping, ungta rikrou kpurthlot ava Kpah.

²Thei kchui kma mbaak khim khaija kapra pthiira, ungta thei kchui mbaak khim khaija knem betti mchui nra kardiin pik ra.

³Naanna Neiji pauna ado kthe pik dok lei inni kartleu dok in pti.

⁴Nei kihin kbaang chaan, ungta Neiji ahin inni am nikdi. Rikrou baak ava mdingtu mkurjom mabi, mthina ngi thei mchui pchaan ma lulu ngi, naanni Nei kihin akbaan tlit chaak maanbi, thei chui pchaang nimaanti.

⁵Neia rikrou ping, naanna mbaak in pti. Nei kihin kak baang tlit, ungta Neiji mma hin ka am tlit mii ava thei knemmi kchui, mleija Nei ktaakki naanni do khat lee tlo pchaang nimaanti.

⁶Ku mii khatti Nei kihin makbaan tlit chaak mabi, mma ava mbaak lulu kipthira, tuṭon ruk kṭong chra, ungta mbaak rekka purkukda meithung ngi var pthi donle kukbung chra.

⁷Naanni Nei kihin kbaang tlit da, ungta Nei kpauna ngi naan hin makbaan tlitbi, naanni ado ṭhil nuwm in aṭhil chaan, ungta ava akurthut pik raan.

⁸Naanni thei chuida, ungta Nei ksiikhu akurthut in hava ngi Kpah mdo punlor.

⁹Kpah ngi Nei wonsat mdo talo lulu ngi, Nei rukva wonsat ado klo chaak in, Nei kwonsat thung ngi kbaang tlit chaan.

¹⁰Neiji Kpah paureen rek arkhinu Mma wonsat thung ngi kakbaan tlit lulu ngi, naanni Nei kpaureen arkhii inra, Nei kwonsat thu jiam in.

¹¹Nei kakanpat ava naan thung ngi ma am nra, ungta akanpat in mkurkhum nra, hava lea Neiji ahin inni kdo the.

¹²“Neiji naan wonsat ado klo in lulu ngi, naan rukva khat leh khat wonsat kurlo in, ditta hava Nei kpaureen.

¹³Maplap tummi ku mii khatti mrinkhu kpii cha hava kheelli wonsat kthloi ku khat lee ame.

¹⁴Nei kpaureen ava naanni atlot inbi, naanna Nei kaplap in pti.

¹⁵Neiji naanna sra owr rek dida a own kurnowl in nimaang, mleija mma kpupa ngi talu mtlot tdit sra owrva deime; pdainu Neiva naanna plap ado kdit in, mleija Neiji Kpah hinki kdo aryaak mkheng naan hin ado ktidet dok in.

¹⁶Naanni Neia mukchol maanti, pdainu Neiji naanna ado kukchol in, ungta nong ado kpupuwk in, naanni chetda thei achui nraan, ungta naanki thei makbaan tlit daat nra, Nei kmiing ngi naan doṭhil chaak khim khai, Mma ngi akpii chraan.

¹⁷Naanni khat leh khat wonsat akurlo nraan Neiji hava pau ado kreen pik in.

¹⁸Naanna dultipaam mii ngi atipder chaak inbi, naan atipder chaak du inni Nei mdo tipder chaak tdit adei in.

¹⁹Naanna dultipaam ki akurthut inbi, dultipaam va mthina ngi wonsat kurlo chra, pdainu naanna dultipaam ki akurthut maan leiji, naanna Neiji dultipaam thungki ado kukchol dok in, ava ngi mlei kurthuwk da dultipaam ava ngi ado tipder chaak in.

²⁰‘Sra owr ava mma kpupa hinnu klin kurthuwk me,’ dinu Neiji ahin thaanni kdo the pau ava abin phaak in. Mmaanni Nei suwk mtupthuwbi, naan ruk suwk akupthuwk raan; mmaanni Nei kpauna markhiik inbi, naan hinki ruk kirkhii lamra.

²¹Pdainu Nei kleiji mmaanni hava le mkheng nga naan leenni klou lamra, mleija Nei mjuksii Mma ava mmaanni dei me.

²²Neiji arjungda mhin thaanni kpau tlaang mabi, mmaanni pnu arvei nime, pdainu tunva mmaan pnu tonna ptlot pik nime.

²³Nei mkipder cha miiva Kpah ruk mdo pder chaak.

²⁴Ku mii khat lee dotlot mlai nong rek ava Neiji mmaan arlakki ktlot ma tlaang bi, mmaanni pnu arvei nime; pdainu tunva mmaanni dei lamda, ungta Nei ruk Kpah ruk mapder chaanda.

²⁵‘Mlei ktaak liitti mmaanni Neia mapder clam da,’ dida mmaan Nowlam thu mdo kjit dok pauna ava mkurkhumna.

²⁶Pdainu Neiji naan hin kdo siira Kpah hinki kbom ava, ditta Kpah hinki kthuwk kindit pthla ava murjun mpha thu Mma ngi sakhi muku hur pik chra.

²⁷Ungta naan rukka sakhi kurthuwk in pti, mleija mupṭhun daatki naanna Nei tu tkilṭhi daat in.