Read Lamkang JOHON 16 Bible Online

JOHON 16 - Lamkang bible

JOHON 16

¹Naanni khusiir ado parthit ma nraan, hava mkheng nga Neiji ado kthe pik dok in.

²Mmaanni synagog thungki akikneng pthii raan; naan ake eayou in ku mii khatti Isowr hin tlaai downnu sok klo chaakka dida mdo bin nrangki ṭhang ava karvang nga.

³Ungta mmaanni hava ktlora, mleija mmaanni Kpah ruk Nei ruk mdei inme.

⁴Pdainu mmaanki ṭhang marvan thung ngi Neiji naan hin kdo son dok pau ava ado bin phaak nraanni hava lea kdo the. “Neiji akṭhi daat inki, mupṭhun daatki hava lea naan hin kdo the liit pme.

⁵Pdainu tunva Nei mjuksii Mma hin kuhung rang imping; tun rukku naan ku mii khat lee ngi, ‘Tva tha ṭoi nada?’ dida mkikhewl am maanti.

⁶Pdainu Neiji naan hin havale kdo the leiji plung kja ngi kdim kcha in pti.

⁷Anto daat joso Neiji kindit ado kthe pik in; Nei ksun rang nga naan ṭhat nra, mleija Nei ksun mabi, kbom ava naan hin arjung nime; pdainu Nei ksunbi, Mma Neiji ahin thaanni sii nikdi.

⁸Ungta Mma murjun mpha thu pnu mlei leh rinkindit mlei ungu kekṭewl mlei thung ngi dultipaam ava mraal ktidet ra:

⁹mmaanni mdo trin chaak ma lam leiji, pnu mlei thu mdo parma in;

¹⁰rinkindit mlei thungva Neia Kpah hinni hung nikdi, ungta naanni mdei kurnowl nimaanti;

¹¹kekṭewl mlei thungva dultipaam ki paam kpu rek ava mdo kṭewl dok.

¹²“Naan hinni do knempok kdo thera ka am daatta, pdainu tunva naanni hur pchaang nimaanti.

¹³Kindit pthla murjun mpha thu, Mma ngi kindit mkheng thu akṭhi chraan, mleija Mmava mthina ki rutanni pau the nime, ungta Mma ngi kthuwk rang rek ava akthe pik chraan.

¹⁴Mma ngi Neia mukpunlor ra, mleija Mma ngi Nei kihinki lou donle ungu naan hin akti det chraan.

¹⁵Kpah dothloi mkheng nga Nei kdo; ava leiji Nei kdo ava Mma ngi lou donle aktidet chraan dinu Neiji kdo the.

¹⁶“Mpha mruk suwn diltha naanni Neia mdei kurnowl nimaanti; ungta mpha mruk diltha naanni mdei ro naandi.”

¹⁷Msiikhu rek angṭhe ngi khat leh khatti the lamda, “Mpha mruk thu naanni mdei nimaanti, ungu mpha mruk dil tha mdei nowl naandi; mleija ‘Neia Kpah hintha hung nikdi’ dida mdothea tak mdo the nda?”

¹⁸Mmaanni the lamda, ‘Mpha mruk khat,’ ava tak mdo thena da? Mma ngi tak mdo thena tdit nenni dei maan min.”

¹⁹Mmaanni Mhin mdo khewl nuwm in ava Jisu ngi deida; ava leiji Mma ngi mhin inni theda, “Mpha mruk khat thu naanni mdei nimaanti, ungu mpha mruk khat diltha naanni mdei nowl naandi, dinu Neiji ahin thaan kdo the leiji asingreel inni karkhewl in ptimo?

²⁰Kindit, kinditti, Neiji ahin thaanni kthea, naanni kurnung karbaangda ṭap naandi; pdainu dultipaam ma kanpa ra; naanni karbin kur oida amnaandi, pdainu akarbin akur oi in ava kanpa tha kur owlra.

²¹Snu khatti nao kuplu rangki mukdung mṭou mpha thu karbin kur oilu, mleija mmaki ṭhang veida; pdainu mma ngi dultipaam thu kṭouva tdit mdo dee leiji mukdung ava bin kurnowl me.

²²Anto heppi naan rukka karbin kur oi in pti, pdainu Neiji veikhat adei nowl in nikdi ungu aplung ril in kanpa chra, ungta ku mii khat lee ngi akanpat inna alowng in nime.

²³Nit ava thu naanni do khat lee mkhewl nimaanti. Kindit, kinditti, Neiji ahin thaanni kthea, Nei kmiing ngi naanni Kpah hin ado ṭhil in khim khaija akpii chraan.

²⁴Tun kpha thu naanni Nei kmiing ngi do khat lee ṭhil chmaanti; aṭhil chaan, akanpat in mkurkhum nra arlaang chnaandi.

²⁵“Neiji ahin inni paupurtol nu kdothe; naan hin purtol da kdothe kurnowl ma nra pdainu Kpah mlei thung ngi kandang ngi ado kthe pik nraanki ṭhang ava karvang nga.

²⁶Nit ava thu naanni Nei kmiing ngi ṭhil chnaandi; ungta naan tummi Neiji Kpah hin aṭhil pik nikaandi dinu Neiva ado kthe pik dok in;

²⁷mleija Kpah mdak katti naanna wonsat ado tolo chaak in, mleija naanni Neia Kpah hinki diinti wonsat mlo inti ado trin chaak in.

²⁸Neia Kpah hinki arjungnu dultipaam thung ngi kthleng ping; veikhat nowlli Neiji dultipaam ma thida Kpah hin hung nikdi.”

²⁹Mma siikhu rekki theda, “Oho, tunva pau kpurtol kma kandang ngi atithe pik chaak inna!

³⁰Tunva Nang ngi do mkheng deiti, ungta neenni ado kikhewl chaak raan do khat lee ame tdit neenni kdee chaak inna; hava ngi Nang ava Isowr hinki kurjung di innu krin chaak inna.”

³¹Jisu ngi mhin inni arthawngda, “Tunva naanni arin chaak inna?

³²Tunva naanni ksang tlaak ki mma pthii thida ainn ainn thaanni akinvei tir chaak nraanki ṭhang ava karvang nga, kvei chdokka, anto daat joso Neia ksangtlaak pmaang, mleija Kpah ngi mdo tiṭhii daat.

³³Naanni Nei kihin kdaai ado phaak chaak nraan Neiji hava naan hin kdo the. Dultipaam thu naanni suwkthuwk in pti, pdainu kṭha ngi plung apngam daat in, Neiji dultipaam kap chaanna.”