Read Lamkang JOHON 17 Bible Online

JOHON 17 - Lamkang bible

JOHON 17

¹Jisu ngi hava pauna rek mthe dok diltha, ta aanda parwaan hansuwda ungta theda, “Apah, ṭhang nga kvei dokka;

²Nang ngi Mhin ado piik chaak mkheng leen kṭuw knai kma rinkhu ado piik chaak nra, Achapa Neia mhai punlor cha.

³Ungta khdaat kurthuwk, kindit Isowr ungu Nah do arjuk sii Jisu Khrista hava mmaanni deida kṭuw knai ma ki rinkhu kurthuwk ka.

⁴Neiji dultipaam thu aju punlor doknu, kdo tlot ra nong ado tpiik chaak ava kupṭut chaakka;

⁵ungta tunva, Apah, dultipaam mapṭhan du liitti Nangtu ta amve thungki Nei klaarnee ka am ava ngi Nah a awng katti mhai punlor cha.

⁶“Nang ngi dultipaam thungki Nei kihin ado tpiik chaak mii rek hin Nah amiing kpandan chaakka; mmaanna Nah ado, ungta mmaan ava Nei kihin mpii chti, ungu mmaanni apauna markhiik chaak inna.

⁷Nang ngi Nei kihin ado tpiik chaak do khim khai ava Nah hinki tdit tunva mmaanni mdee chaak inna.

⁸Mleija Nah dopiik chaak pauna rek ava Neiji mmaan hin pii chnu, ungta mmaanni arlaang chda, ungu Neia Nah hinki kurjung tdit mkindit dei chlamda, ungu Neia Nah dosii tdit mmaanni mrin chaak inna.

⁹Mmaan tummi kṭhil chaakka; Neiva dultipaam tummi kdo ṭhil ava pme, pdainu Nah do piik chaak rek tum, mleija mmaanna Nah ado,

¹⁰Nei kdo thloi mkheng nga Nah ado, ungta Nah ado thloi ava Nei kdo, ungu mmaan thung ngi Neia kunlor cha ping.

¹¹Neia dultipaam thu am kurnowl nimaang, pdainu mmaanna dultipaam thu ka am daat lamra, Ungta Neia Nah hinni kurhung chrang ping. Kchiir Apah, Neenve ngi khdaat tkurthut lulu ngi khdaat mkurthut nraan, Nah do piik chaak mmaan hava Nah miing ngi mhai arkhiik pik cha.

¹²Neiji ka am ṭhi lam mpha thu, Nang ngi Nei kihin ado tpiik chaak hava mmaan ava, Neiji Nah amiing ngi kdo arkhiik chaak lam, Neiji kdo seel chaak lam, ungta laaika mkurkhum nra, kmaang chapa ava kma donle, mmaan ku mii khat lea maangme.

¹³Pdainu tunva nea Nah hinni kurhung chrang ping; ungta mmaan mdaksaa thuwn Neiki kanpa mkurkhum nra, hava lea dultipaam thu Neiji kthe kcha ping.

¹⁴Neiji Nah apauna kpiik chaak lamma, ungta dultipaamva mmaan ava pder chlamda, mleija Neiji dultipaam thungki kukurthut ma lulu, mmaan rukka dultipaam ki pme.

¹⁵Neiva dultipaam thungki mhailo pik pthii lam kdingi kdo ṭhil chaak ava pme, pdainu Nang ngi mmaan ava kṭha kma thungki mhai arkhiik pik chlam kdingi kṭhil cha ping.

¹⁶Neiji dultipaam thungki kukurthut ma lulu ngi, mmaan rukka dultipaam thungki lam pme.

¹⁷Mmaan ava Nangki kindit ava ngi apartleu pik chlam; Nah apauna ava kindit.

¹⁸Nang ngi dultipaam thu Nei ado tsii lulu ngi, Neiji mmaanna dultipaam thu ksii chaak lamma.

¹⁹Ungta mmaan rukva kindit ava mkarpiik de nraan, Nei kdaksaa kat ava mmaan tummi kpiik chaakka.

²⁰“Neiva hava le tum daatti ṭhil chmaang, pdainu mmaan pauna krin cha tum ruk,

²¹mmaan mkheng ngi khdaat mkurthut nraan kṭhil cha ping, Neia Nah dosii tdit dultipaammi mdo rin chaak nra, Apah, Nang ngi Nei kihin, ungta Neiji Nah hin ta amve lulu ngi, mmaan rukka Nen Nthung ngi ma am nraan kṭhil chaakka.

²²Neenve ngi khdaat tkurthut lulu ngi, mmaanni khdaat mkurthuw nraan, Nang ngi Nei kihin ado tpiik chaak laarnee ava mmaan hinni kpiik chaakka.

²³Neiji mmaan hin tha ungu Nang ngi Nei kihin ka am ava mmaanni kinreel mkurthut nrang lei, mleija Nang ngi Nei mjusii ti, wonsat ado,talo chaak lulu ngi, mmaan rukka wonsat mloa tdit dultipaammi adeiso.

²⁴Apah, dultipaam mapṭhan du liitti wonsat mlo chtinu, ado tpiik chaak Neiki klaarnee ava Nei kihin Nah dopiik chaak rek ava ngi mdo dee chaak nra, Nei ka amna mun thu mmaan ruk kdo amṭhi lam ra Neiji kngei chaakka.

²⁵O, rinkindit Apah, dultipaamva Nah adeime, pdainu Neiva akdee chaak, ungta Neia Nah dosii tdit mmaanni deime.

²⁶Nang ngi Nei wonsat ado talo chaak ava mmaan thung ngi ma am nra, ungta Neiji mmaan thung ngi ka am nra, Neiji Nah amiing mhin inni tdet nu, ungta tdet lam nikdi.