Read Lamkang JOHON 18 Bible Online

JOHON 18 - Lamkang bible

JOHON 18

¹Jisu ngi hava pauna rek mthe dok diltha msiikhu rek tu kilṭhi ngi Kidron daamjowl raalpha tha vang lamda, ava thungki innbil khat thung ngi msiikhu rek tu lut lamda.

²Tunva Mma krokma Judas rukva msiikhu rektu maknem ava thu kurdu kchok tdit deida.

³Ava leiji Judas ava ngi rawlmii rek lop khat, ungta thiimpu kinreel nong klin kpuw rek, ungu Pharisi rek ṭhida, kla leh klachoi sin lamda, ungta rawl dona tu thleng lamda.

⁴Ava dilli Jisu ngi Mma thu kthuwk ra mkheng dei dok da, mhin inni vada theda, “Ku kthlaam in pti da?”

⁵Mmaanni Mhin arthawng da, “Nasareth ki Jisu.” Jisu ngi mhin inni theda, “Nei ping.” Mma kro kma Judas ava mmaan tu rip sap daat lamda.

⁶“Nei ping,” dida Mma ngi mthe thungta dil kursown lamda ungu dul leen tluw tir lamda.

⁷Mma ngi khewl nowl lamda, “Ku kthlaam in pti?” Ungbi mmaanni theda, “Nasareth ki Jisu.”

⁸Jisu ngi arthawngda, “Neia Mma ping ngi dinu ado kthe pik dok in; ava leiji naanni Nei atathlaam inta, hava mii rekka sun chlamso.”

⁹Mma do the dok hava pauna mkurkhum na ngi, “Nah dopiik chaak rekka khdaat pre pmaang maang.”

¹⁰Ava dilli Simon Pitor ri mdo arkeen daat mkaangksaang maklee thungta, thiimpu kparthaang suwk owr knaa khat mchang ktongki sel bukda. Suwk owr miing ava Malkas.

¹¹Jisu ngi Pitor hin theda, “Akaang ksaang nga mkok thung ngi adaal dok; Kpah do piik tong nga Neiva nee nimaang mo?”

¹²Ungta rawlmii rek lop ungta mmaanki berksu ungu Jihudia rek nong klin kpuw rekki Jisua kjowng lamda ungu bowl lamda.

¹³Rukri reeppi mmaanni Annas hin ṭhi lamda, mleija mma ngi kum ava thu thiimpu kparthaang ngi ka am Keiphas ava puh kurthuwk da.

¹⁴Miilai khatti mii rek tummi mdiyo ava ngi mchangha siira dida Jihudia rek hin Keiphas ava ngi kthe pik lam kurthuwk da.

¹⁵Simon Pitor leh ktlok siikhu khatti Jisu dil ṭoi lamda, ktlok siikhu khat ava thiimpu kparthaang maide mkurthut leiji, thiimpu kparthaang dulbuk kpha dekki Jisu vanglu ṭhida.

¹⁶Pitor ra duwnki thurngot be ngi rip daatda. Ava leiji thiimpu kparthaang maide ktlok siikhu khatti vangthuwk da thurngot ksut pṭoi snu ava karbiik ṭhida, ungu Pitor ra vanglu ṭhi chda.

¹⁷Thurngot ksut pṭoi snu ava ngi Pitor hin theda, “Nang rukka hava Miilai siikhu rek thungki khat ptimo?” Mma ngi theda, “Nei pmaang.”

¹⁸Tunva sra owr rek leh nong klin kpuw rekki mei ai pchok lamda, mleija kjiil sikda, ungta rip lamda mdaksaan kpurlum lamda; Pitor rukka mmaan tu rip sap lamda, ungu mdaksaa kpurlum da.

¹⁹Ungta Jisua thiimpu kparthaang ngi msiikhu rek leh mdo purchu mlei thung ngi paukhewlda.

²⁰Jisu ngi mhin arthawngda, “Neiva dultipaam thu kandang ngi kpauping, Jihudia rek mkheng mthuw kurkuna synagog rek leh luwbuk Inn thu mpha ktai thu Neiji kdo purchu; Neiva tuprut pau khat lee the maang.

²¹Neia talu leiji nangva pau atikhewlla? Neiji mmaan hin tak kthe tdit ava karyaa rek hin akhewl cha; Neiji tak kthe tdit mmaanni mdee in.”

²²Mma ngi hava mthe thungta, nong klin kpuw rek thungki krip daat khatti, Jisu tpeengda theda, “Nang ngi thiimpu kparthaang nga anto arthawng namo?”

²³Jisu ngi mhin arthawngda, “Neiji karmak pau kthe ta, mkarma naki sakhi apii, pdainu Neiji kindit pau kthe ku kurthut tu, talu lei nangva ati tpeenna?”

²⁴Ava dilli mdo bowl in ava Annas va thiimpu kparthaang Kaiphas hin vasiida.

²⁵Tunva Simon Pitor va krip daatti mdaksaa kpurlumda. Mmaanni mhin theda, “Nang rukka msiikhu rek thungki khat pti ma?” Mma ngi mat da theda, “Nei pmaang.”

²⁶Pitor ri maknaa mdo sel buk thiimpu kparthaang sra owr khat ava rilam kthuwk miilai khatti khewlda, “Innbil thung ngi Mma tu kilṭhi kdo dee ava pti ma?”

²⁷Pitor ri eme, dida mat nowlda; ungbi tunkat daatti harkhuwng ngi khuwngda.

²⁸Ava dilli Jisua Kaiphas inn thungki lusang inn ava thu vanṭhi lamda. Ungta ava jiingsun kpanma kurthuwkda. Ungu mmaanni kbuwr kma taplaanna mmaal nraanki, mmaan mdak inna lusang inn thu lut lamme.

²⁹Ava leiji Pilat ti vangthuwk da mhin inni theda, “Hava Miilai hin ado plaal naan tak ka amda?”

³⁰Mmaanni mhin arthawng lamda, “Hava Miilaiji kṭha kma ktlo mkurthut mabi, neenni Mma aṭhi psuk nimaan ring.”

³¹Pilat ti mhin inni theda, “Naan adaksaan katti aṭhi chaan, ungu naanki Nowlam dil kṭoiji akṭewl chaan.”

³²Jisu ngi hava tak hep kdu diyo ngi kdiyou rang ping dida mdo the ava mkurkhumna.

³³Pilat ti lusang inn thu vanglut thida Jisu own nowlda, ungu Mhin theda, “Nah Jihudia rek Kruwng ptimo?”

³⁴Jisu ngi arthawngda, “Ava nah dothe mo mdit mata murson rekki Nei klei thu ahin mdo sonda?”

³⁵Pilat ti arthawngda, “Neia Jihudia khat ping mo? Nah amii rek leh thiimpu kinreel rekki nei kihin ado tiṭhi psuk lam; Nangva tak atlot da?”

³⁶Jisu ngi arthawngda, “Nei ki Kruwngpaam ma hava dultipaam ki ava pme; Nei ki Kruwngpaam ava hava dultipaamki mkurthutbi, Jihudia mii rek hin mdo tparlaan ma nra Nei ksra owr rekki kurduk ṭhi lamra, pdainu Nei ki Kruwngpaam ava hava dultipaam thungki pme.”

³⁷Pilat ti Mhin theda, “Ava leiji Nah Kruwng khat ptimo?” Jisu ngi arthawngda, “Kruwng khat diti adothe ava ping. Mleija hava tummi Neia kṭou ping, ungta kindit sakhi kpiira, hava tummi Neia dultipaam thu kurjung ping. Kindit mii pum ktaiji Nei kukrowl karyaa chra.”

³⁸Pilat ti Mhin theda, “Kinditta talu da?” Mma ngi hava mthe dok le, Jihudia rek hin vangthuwk nowlda, ungu mhin inni theda, “Mma doparma neiva pha chmaang.

³⁹Pdainu taplaanna thu neiji naan tumra miilai khat khat kdo pthuw kcholu; atum raanna neiji Jihudia rek Kruwng ava pthuwk nimo?”

⁴⁰Mmaanni owng nowl lamda, “Eme, hava Mma rang pme, Barabas ra!” Tunva Barabas ava kuppru khat kurthuwk.