Read Lamkang JOHON 19 Bible Online

JOHON 19 - Lamkang bible

JOHON 19

¹Ava dilli Pilat ti Jisua louda Tpubun lamda.

²Ungta rawlmii rekki tirliing luwkhum khat her lamda, ungu mluw pkhum lamda, ungta kning ngi ksen buw pihiil lamda.

³Mma hin thleng lamda, “Roi ksotti ring cha, Jihudia rek Kruwng!” kdingi the lamda, ungu mkhut inni tpeeng lamda.

⁴Pilat ti vangthuwk nowlda mhin inni theda, “Asuwn, neiva Mma doparma do khat lee dei chmaang tdit naan ni ado dee nraan, neiji Mma naan hin kupthuw a.

⁵Ava lei Jisua tirliing luwkhum khumda, ungu kning ngi buw ksen hiilda, arvang thuwkda. Ungta Pilat ti mhin inni theda, “Asuwn Miilai ava!”

⁶Thiimpu kinreel rek leh nong klin kpuw rekki Mma mdee in thungta, mmaanni owng lamda, “Khros leen apthoi in, khros leen apthoi in!” Pilat ti mhin inni theda, “Naan adak kat inni alou inra khros leenva apthoi chaan, mleija neiva Mma doparma pha chmaang.”

⁷Jihudia rekki mhin arthawng lamda, “Neenki Nowlam khat ka am, ungta ava Nowlam dil kṭoiji mdiyo kat ra, mleija Mma mthina ngi Isowr Chapa kpurthuw da.

⁸Ungta Pilat ti hava pauna maryaak thungta, kdung ṭi da;

⁹mma ngi lusang inn thu vanglut nowlda, ungu Jisu hin theda, “Nah tva ki ptida?” Pdainu Jisu ngi arthaan pik me.

¹⁰Ava ngi mlei kurthuwkda, Mma hin theda, “Ki hinni the nimti mo? Nah akupthuwk rangki rutan ungu khros leen akupthoi rang ki rutan kdo thloi ava dei mtimo?”

¹¹Jisu ngi mhin arthawngda, “Nah hinni tun knungki ava ngi atpiik matlaangbi, rutan kthloi akurthut ma rang nga; ava ngi mlei kurthuwkda, nah hinni kparlaan mii ava ngi klin siiki pnu marve chaakka.

¹²Hava leen Pilat ti mdo pthuw pthii nrangki mlam thlaamda, pdainu Jihudia rekki owng lamda, “Nang ngi hava Miilai apthuw pthiibi, Keisar plap kurthuwk mti; mdaksaa mthina ngi kruwng kpurthuw nuwm mii pum ktaiva Keisar tun kpaulu.”

¹³Pilat ti hava pauna rek maryaak thungta, mma ngi Jisua duwn pthuwk thida, lung tsak Hebru pauvi Gabbatha tdit mun thu kekṭewl longkhom tun ko ongda.

¹⁴Ungta ava taplaanna mdo purchuwl naanki nit; ungta ṭhang truk arveel kurthuwkda. Mma ngi Jihudia rek hin theda, “Asuwn, naanki Kruwng!”

¹⁵Mmaanni owng lamda, “Aṭhi pthuwk in, aṭhi pthuwk in, Mma khros leen apthoi in. Pilat ti mhin inni theda, “Naanki Kruwng nga neiva khros leen pthoi nimo?” Thiimpu kinreelli mhin arthawngda, “Keisar kma donle neenki Kruwng ame.”

¹⁶Ava dilli Mma khros leen mdo pthoi nraanki mhin inni parlaan pthiida.

¹⁷Ava leiji mmaanni Jisua lou lamda mdaksaa ki khros mthina ngi kdomda, Hebru pauvi Golgotha mdo dit luwru kdimna mun mdo dit ava tha hang ṭhi lamda.

¹⁸Mmun ava thu mmaanni ktlok miilai knii rek mlaiṭimmi khros leen pthoi kthen lamda.

¹⁹Pilat rukva jiik khat kjit da, ungta khros leen daarda; mdo kjitta, “Nasareth ki Jisu, Jihudia rek Kruwng,” dida.

²⁰Ungta jiik ava Jihudia rek mii maknemmi pa da mleija Jisu khros leen mdo pthoi naan mun ava khuwpii tnel tek da; ungta jiik ava Hebru, Letin, ungu Grik pauvi kjitda.

²¹Ava leiji Jihudia rek thiimpu kinreel rekki Pilat hin the lamda, “ ‘Jihudia rek Kruwng,’ dida kjit ma,” Pdainu “Hava Miilaiji, ‘Neia Jihudia rek Kruwng ping,’ dida theda, adira akjit.”

²²Pilat ti arthawngda, “Neiji kdo kjit dok ava kdo kjit dok.”

²³Jisua rawlmii rekki khros leen mupthoi in mpha thu mdo mna ava lou lamda, rawlmii khatti khat khat kpurtum lamda, plii ngi trat lamda; mdiir ruk lou lamda. Pdainu mdiir ava tpurdut na ktaakki, karthak kingi kurdu kpha turkhown kthen.

²⁴Ava lei khat leh khatti mmaanni theda, “Nenni kṭet maan che, ku ngi kpha chrang kdingi pchel piik sut naan che.” Hava Laaika mkurkhumna, “Mmaanni Nei kdona ava marlak inni them lamda, ungta kdonaak daat tummi pchel piik sut nlamda.”

²⁵Ava leiji rawlmii rekki hava tlo lamda, pdainu Jisu be tha Mnuh, ungta Mnuh naonu Klopas numei Mery, ungu Magdaleni Mery rip daat lamda.

²⁶Jisu ngi Mnuh leh Mma wonsat lo msiikhu khat mbe ngi krip daat mdee thungta, Mma ngi Mnuh hin theda, “Snu, asuw, nah achapa!”

²⁷Ava dilli Mma ngi msiikhu hin theda, “Asuw, nah anuh!” Ungta ṭhang ava kat thung ngi siikhu ava ngi mnuh ava mi inn tha vanṭhi da.

²⁸Hava diltha Jisu ngi nong mkheng kupṭut dokka tdit deida, (laaika mkurkhumna ngi) theda, “Kning kakraalla.”

²⁹Ava thu ju kdor ri kdim uwm khat am daat da; ava leiji mmaanni buwphown kdimmi ju kdor thu puhuwm lamda, hyssop tdit kchung leen daar lamda, ungu mner thu han pneek lamda.

³⁰Ungbi Jisu ngi ju kdor nee thida, Mma ngi theda, “Kṭuw kcha a,” Ungta Mma ava tngeng da, ungu diyou chda.

³¹Ungta mdo purchuwl naan nit mkurthut thungta, kluwng rek ava sabath nitti khros leen ma am daat ma nra (mleija sabath nitta kparthaang kurthuwkda), mkhu in pbeng pthii thida mdo lo dok nraan, Jihudia rekki Pilat hin ṭhil lamda.

³²Ava leiji rawlmii rekki thleng lamda, ungta Mma tu kilṭhi ngi khros leen mdo pthoi kthen in rukri thokki khu pbeng lamda ungu ktlok khat khu pbeng lamda;

³³pdainu mmaanni Jisu mphaak in thungta Mma kdiyou dokki dei lamda, Mma khua pbeng lamme.

³⁴Pdainu rawlmii rek thungki khatti mjii tha kcheiji thunda, ungbi tun kat daatti hii leh dii ngi phulda.

³⁵Mleija naan rukva ado rin chaak nraan, mik ki kdei mma ngi sakhi piida, mma rinpaumin ava kindit, ungu Mma ngi kindit mdo the tdit mma ngi deida.

³⁶Mleija ‘Mma ru khat lee beng nime,’ dida laaika dothe mkurkhum nangi hava lea kthuwk.

³⁷Ungta ktlok laaika ngi the nowlda, ‘Mmaanni mdo thun naan mjii ksuw lamra.’

³⁸Hava diltha Jisu siikhu khat Arimathia Joseph pi, Jihudia rek mdo ṭit leiji, tuprutti Pilat hin Jisu kluwng mdolo chaak nra ṭhil chda, ungbi Pilat ti rot pik da sun da. Ava leiji mma ngi arva da Jisu kluwng nga lou chda.

³⁹Ungta jaanni Mma hinni rukri ngi karva Nikodimas rukva myrrh leh aloes tdit reidii tpurchuwm sum arjaa khat arveelli krik ava hurda arvada.

⁴⁰Mmaanni Jisu kluwng nga lou lamda, Jihudia rek nopa dil kṭoiji reidii tu kurthloppi plabuw ktarnaal dang ngi klum lamda, alruwl chlam da.

⁴¹Tunva khros leen Mma mdo pthoi naan ava thu innbil khat amda, ungta ku mii khat lee mdo alruwl na mlai thlaan ren khat amda.

⁴²Ava leiji Jihudia rek do purchuwl naan nit mkurthut leiji, mmaanni Jisua alruwl chlam da, mleija thlaan ava nai tekda.