Read Lamkang JOHON 2 Bible Online

JOHON 2 - Lamkang bible

JOHON 2

¹Ungta mnii kdumna nitti Galil thungki Kana thu kphal khat amda, ungu Jisu nuh rukka ava tha amdaat da;

²ungta Jisu rukka msiikhu rek tu kphal ava thung ngi kowlla chlam da.

³Rikrou dii mtlan dok thungta, mnuh ngi Jisu hin theda, “Rikrou dii thloi chlamme.”

⁴Ungbi Jisu ngi mhin theda, “O snu, talu mtlot ṭhi nda? Nei ki ṭhang vei mlai.”

⁵Ungta mnuh ngi sra owr rek hin theda, “Mma do the khim khai atlo in.”

⁶Tunva lung ksowr truk thii lamda, mleija Jehudia rek kinditki kartleu nrang leiji ksowr ktaiji uwm som knii nii mdit mata som kdum dum luna.

⁷Ungta Jisu ngi mhin inni theda, “Ksowr rekka dii apdim in.” Ungbi kiplee daatti pdim lamda.

⁸Mma ngi mhin inni theda, “Tunva angṭhe alou inra kmaal supkchil rek hin vang sin in.” Ava leiji mmaanni lou lamda.

⁹Kmaal supkchilli diia mpartem thungta, tunva rikrou dii kur owlda, ungu tva ki kthleng tdit dei lamme, (dii ksuwk sra owr rek va deida.) kmaal sup kchilli kphalpa ownda,

¹⁰ungu mhin theda, “Mii khim khaiva rukri ngi rikrou dii makṭha themda; ungta mii rekki mneek prit thung ro ngi mjasee mdo them; pdainu tun kpha thung ngi rikrou dii kṭha thloi tlit daat tinu.”

¹¹Hava Galil ki Kana thung ngi ru kri reep ki titinna ava Jisu ngi tloda, ungu ava thu mlaarnee kandang da; ungu msiikhu rekki Mhin rin chlam da.

¹²Hava dil tha Mma ngi Kaparnahum tha mnuh leh mnaopale ungu msiikhu rek tu kilṭhida sunda; ava tha mmaanni niikhuw kcheeng bong lamda.

¹³Jihudia rek ki taplaanna ava nai tekda, ungu Jisu ngi Jerusalem tha hangda.

¹⁴Luwbuk Inn thu sil, jao, ungu uṭhuw rek kjur, ungta sum kparthleng rekki sumdowl mdolo in phada.

¹⁵Luwbuk Inn thungki jao, sil ava riijei khat seemda rei pthiida, ungta sum kparthleng rek thiir sum ava ptlong pthii da ungu tebol la parlup parthel pthiida; rei pthii lamda.

¹⁶Ungta uṭhuw rek kjur hin Mma ngi theda, “Hava lea alou pthiin, naanni Kpah Inn na sum dowl adolo naanni ktlo rome.”

¹⁷“Nah Inn kuplung mlut reen leiji makchaa dok ra,” dida mdo kjit ava siikhu rekki bin phaak lamda.

¹⁸Ava dilli Jehudia rekki Mhin the lamda, “Hava ado tlot naki titinna rek talu mti det naan di?”

¹⁹Jisu ngi mhin inni arthawngda, “Hava luwbuk Inn ava ae krep da ungu nii kdum daat thung ngi prip nik di.”

²⁰Ava dilli Jihudia rekki theda, “Luwbuk Inn ava kum somplii lei truk klutti tsak, ungta Nangva nii kdum daat thung ngi prip namo?”

²¹Pdainu Mmava luwbuk Inn ava mdaksaa mdo thena kurthuwk da.

²²Ava ngi mlei kurthuwk da, Mma ngi kdiyou thungki mrin kardel mpha thu, msiikhu rekki hava mdo the ava bin phaak lamda; ungta mmaanni Laaika leh Jisu dothe dok pauna ava rin chlam da.

²³Tunva Mma ava taplaanna kmaal mpha thu Jerusalem tha am daat da, Mma ngi titinna rek mdo tlot mdo dee lei inni, mii maknem mi Mma miing rin chda.

²⁴Pdainu Jisu va mdaksaa ava mmaan hin kalrin chme.

²⁵Ku mii khatti Mii ava ki sakhi mdo ri pik nrangki arleek setti ame, mleija mii mkheng nga Mma ngi dei dok da; mleija miilai thu ka am ava Mma mdakki dei dok da.