Read Lamkang JOHON 20 Bible Online

JOHON 20 - Lamkang bible

JOHON 20

¹Tunva hapta ki mnii khat na thok, jiingsun kpanma ngi, khuw mutmul daat arlaanni Magdaleni Mery ngi thlaan tha arvada, ungbi thlaan leenki lung nga kurlou dok deida.

²Ava leiji mma ngi vang chenda Simon Pitor leh Jisu wonsat lo siikhu khat hin songda, “Nenki Mukpua mmaanni thlaan thungki mlo dok inna, ungu mmaanni talu thu mthiik in tdit nenni dei maan min.

³Ava leiji Pitor leh ktlok siikhu khatti kurlou lamda thlaan tha va lamda.

⁴Mmaanve mikniing inni vachen lamda, pdainu ktlok siikhu khatti Pitor vakheelda ungu rukri betti thlaan vathlung da.

⁵Ungta tpeda msut thungta plabuw ktarnaal dang kurthluwng daat deida, pdainu mma vanglut me.

⁶Ava dilli Simon Pitor ri mma dil ṭoida arvada, thlaan thung ngi vanglut da, ungbi plabuw ktarnaal dang,

⁷ungu mluwthlun tha lukhaang ava plabuw ktarnaal dang tu kthii ve kma mun msik ki karthlep daat deida.

⁸Ava dilli rukri ngi thlaan va kthlung dok siikhu khat rukka vanglut da, ungta mma ngi deida ungu rin chda.

⁹Mleija Mma kdiyou thungki kring kinlera dida laaika dothe ava mmaanni dei pandi lam me.

¹⁰Ava dilli siikhu rekki mi inn thaanni vang kinle lamda.

¹¹Ungta Mery ava thlaan duwn tha ṭapda rip daat da, ungu mma ngi mṭa chunni thlaan khur mhai sut thungta;

¹²Jisu kluwng mdo thiik naan mun thung ngi, kpowl dang dang ngi kurthlong Waantamsii knii, khatti mluwthlun tha ungta khatti mkhu therri kuk ong daat mma ngi vadei lamda.

¹³Mmaanni mhin theda, “Snu, talu leiji kṭap ptida?” Mma ngi mhin inni theda, “Mleija mmaanni neiki Mukpu lou dok lamda, ungu tva tha mthiik dok in tdit neiji dei chmanu.”

¹⁴Hava mthe chunni mma ngi mdil kinle da, ungbi Jisu krip daat deida, pdainu ava Jisu tdit mma ngi tin chme.

¹⁵Jisu ngi mhin theda, “Snu, talu leiji kṭap ptida? Ku kthlaam pti da?” Mma ava innbil kseel cha mii pakda kdingi, Mhin theda, “Ocha, Nang ngi alo pthi dokta ado thiik na mun mhai the pik cha, neiji lou chni.”

¹⁶Jisu ngi mhin theda, “Mery,” Mma ngi mdil kinle da Hebru pauvi Mhin theda, “Rabboni!” (Chukpu mdo dit na)

¹⁷Jisu ngi mhin theda, “Mhai arpom ma, mleija Neiji Kpah hin hung mlai ring; pdainu ku u knao rek hin vangra pau ava ason pik chlam, Neia Neiki Kpah ungu naanki Isowr ava hinni kuhung imping.

¹⁸Mery Magdaleni ngi vangda siikhu rek hin theda, “Neiji Mukpu dei chnu”; Mma ngi kihinni hava le theda, kdingi mhin inni song chda.

¹⁹Ungta hapta ki mnii khatna thok, kjiing tha, Jihudia mii rek mdo ṭit lei inni siikhu rekva ma am naan thurngot arkam lamda, ungu marlak inni Jisu thlengda mhin inni theda, “Kdaai ava ngi aju kurthlo ṭhiinso.”

²⁰Mma ngi hava mthe mpha thu mhin inni mkhut leh mjii tdet lamda. Ava dilli siikhu rekki Mukpu tdit mdee in thungta kanpa chlam da.

²¹Jisu ngi mhin inni the nowlda, “Kdaai ava ngi aju kurthlo ṭhi chaanso. Kpah ngi Nei mdo tsii lulu ngi aksii inna.

²²Ungta Mma ngi hava mthe dok le, Mma ngi tdaalli muwt lamda, mhin inni theda, “Pthla Kchiir arlaang chaan.

²³Naanni ku mii khat pnu ton aptlot pik inbi, mmaanna kuptlot pikra, naanni ku mii khat pnu tong aptlot pik maanbi, ava ptlot pik nime.

²⁴Tunva kinphiir mdo dit Thomas, sowm lei knii thungki khat, mma ava Jisu mthlen mpha thungva mmaan tu kilṭhi me.

²⁵Ava leiji siikhu murson rekki mhin theda, “Neenni Mukpu kdee chaak in.” Pdainu mma ngi mhin inni theda, “Neiji Mma khut jotpi kbii deida, ungu kukhut chelli jotpi kbii thunda, ungta kukhutti mjii kikmei du khim khai, neiji rin chni maang.”

²⁶Nii tret diltha, siikhu rekka Thomas tu kilṭhi ngi inn thu am daat lamda. Thurngot sul dok lamda, pdainu Jisu thlengda marlak inni ripda ungu theda, “Kdaai ava ngi aju kurthlo ṭhi chaan so.”

²⁷Ava dilli Mma ngi Thomas hin theda, “Nah akhut chelli hava kukhut rek athunra asuw; ungta akhut akhiingra kjii tha akmei; nang ngi krin kma tloma, pdainu arin cha.”

²⁸Thomas ti Mhin arthawngda, “Neiki Mukpu, ungu neiki Isowr!”

²⁹Jisu ngi mhin theda, “Nang ngi ado dee leiji arin chaakka? Dei mjoso krin cha rek ava msuwkṭha.”

³⁰Tunva hava laaika thu tikjit ma titinna rek murson knempok ruk Jisu ngi siikhu rek maiṭhuwmmi tloda.

³¹Pdainu Jisua Isowr Chapa Khrista tdit naanni ado rin chaak nraan ungta rin chda Mma miing ngi naanni rinkhu ado phaak chaak nraan hava lea kikjit kurthuwk.