Read Lamkang JOHON 21 Bible Online

JOHON 21 - Lamkang bible

JOHON 21

¹Hava diltha Jisu ngi mdaksaa ava Tibaria truwn be ngi siikhu rek hin ktardet nowlda; ungta Mma ngi hanto ktardet da.

²Simon Pitor, kinphiir mdo dit Thomas, Galil ki Kana thungki Nathaniel, Yebedi chapa rek, ungu siikhu murson miilai knii rek, mmaan ava kurkuk lamda.

³Simon Pitor ri mhin inni theda, “Neia tuwlva kukjowng chet ni.” Mmaanni mhin the lamda, “Neen rukva aju ṭoi chaanni.” Mmaanni chet lamda arkuwng leen tuwng lamda; pdainu ava jaanva mmaanni do khat lee kjowng chlamme.

⁴Khuw mtlei thungta, diibiing ngi Jisu rip daat da, anto daat joso siikhu rekva Jisu tdit deipandi chlamme.

⁵Jisu ngi mhin inni theda, “Kmo rek tuwlva ka am ngaal mo?” Mmaanni Mhin arthawng lamda, “Eme.”

⁶Mma ngi mhin inni theda, “Arkuwng machang ktong tha kchak adeeng in, ungu naanni mruk kjowng chnaandi.” Ava leiji mmaanni deeng lamda, ungbi tuwlva mnemreen leiji mmaanni ṭen pchaang lam mda.

⁷Jisu wonsat lo siikhu ngi Pitor hin theda, “Ava Mukpu!” Mukpu tdit Simon Pitor ri maryaak thungta mnonglona dona parthleng da, mdo mna naa tengda ungu truwn thung jun khuwngda.

⁸Pdainu siikhu rek mursonva tuwlva ngi kdim kchak ava arkuwng thung ngi ṭen lamda, mleija mmaanna laan tu lam karlat pame, pdainu khutuk arjaa khat arveelli karlat.

⁹Mmaanni laan tha mhunkal dok in thungta, ava thung mei ai kchok amda, mleenni tuwlva leh thenpen ka am daat dei lamda.

¹⁰Jisu ngi mhin inni theda, “Tun katti ado kjown in tuwlva mruk arvan sin in.”

¹¹Ava leiji Simon Pitor ri vada tuwlva klin klin arjaa khat som parnga lei kdummi kdim kchak ava laan tha ṭenpthuwk da, ungta tuwlva nempok daat joso kchak kilṭet me.

¹²Jisu ngi mhin inni theda, “Arvang inra emaal in.” Mma ava Mukpu tdit mmaanni dei lamda, siikhu ku khat lee ngi, “Nah ku pti da?” dida pau khewl nuwmme.

¹³Jisu ngi arvangda ungu thenpen louda ungu mhin inni piida, tuwlva ruk anto tloda.

¹⁴Jisu ngi kdiyou thungki mrin kardel diltha siikhu rek hin maktardet ava hava ngi mvei kdumna.

¹⁵Mmaanni mmaal dok inle, Jisu ngi Simon Pitor hin theda, “Johon chapa, Simon, hava le kheelli Neia wonsat ataloa?” Mma ngi Mhin theda, “Oji, Mukpu, neiji wonsat ado klo ava Nang ngi ado dee.” Mma ngi mhin theda, “Kjao nao rekka mhai pmaal pik cha.”

¹⁶Mvei knitna ngi Mma ngi mhin theda, “Johon chapa, Simon, Neia wonsat ataloa?” Mma ngi Mhin theda, “Oji, Mukpu; neiji wonsat ado klo ava Nang ngi ado dee.” Mma ngi mhin theda, “Kjao rekka mhai sut pṭoi pik cha.”

¹⁷Mma ngi mvei kdumna mhin ni theda, “Johon chapa, Simon, Neia wonsat ataloa?” Vei kdum chak thung, “Neia wonsat ataloa?” dida mdo khewl leiji Pitor plung jada. Ungta mma ngi Mhin theda, “Mukpu, Nang ngi do mkheng adodee; wonsat ado klo ava Nang ngi adodee.” Jisu ngi mhin theda, “Kjao rekka mhai pmaal pik cha.”

¹⁸Kindit, kinditti, Neiji ahin kthea, nang ngi akset lai akurthut mpha thu, adaksaa ki arkowl kparyeel ti ungu ache nuwm natha kchet pti; pdainu nang ngi ader mpha thu, nang ngi akhut arjii tidon nah dongei nma tha akṭhira.”

¹⁹(Tak hep kduki diyo ngi diyou donle Pitor ri Isowr kpunlor rang tdit mdo tdet nangi Mma ngi hava mdo the.) Ungta hava diltha Mma ngi mhin theda, “Kdil aṭoi cha.”

²⁰Pitor ri mdil mkinlet thungta jisu wonsat lo siikhu ngi mdil in mdo ṭoi deida, mmaanni kjiing ki then mmaal slii arlaan inni, Mma plung tun kbeuda, “Mukpu, Nah akparlaan pthii rang nga kuda?” dida kthe ava kurthuwk.

²¹Pitor ri mma mdee thungta, mma ngi Jisu hin theda, “Mukpu hava miilaija tak hep rangda?”

²²Jisu ngi mhin theda, “Nei kurjun du khim khai mma ngi ma am daat ra kngeiju, ava ngi nah hin tak kurthuwkka? Kdil aṭoi cha!”

²³Hava siikhua diyou nime tdit ki pau ava mu u mnao rek thung ngi kurjouda; anto daat joso mma ava diyou nime dida Jisu va mhin mdo the ava pme, pdainu “Nei kurjun du khim khai mma ngi ma am daat ra ava Neiji kngei ju, ava ngi nah hin talu kthuwkka?” mdo ditna.

²⁴Havale sakhi kpii, ungta havale kikjit; siikhu ava hava; ungu Mma rinpaumin ava kindit tdit nenni ndee in.

²⁵Pdainu Jisu ngi mdo tlot do knempok ruk ka am daat; khat khatti kikjit ra nkurthutbi, tikjit ra laaika mkheng nga dultipaam thung rukva chel pchaang nime kdingi kbin chaakka.