Read Lamkang JOHON 3 Bible Online

JOHON 3 - Lamkang bible

JOHON 3

¹Tunva Jihudia rek paam kpupa khat mmiing Nikodimas tdit Pharisi miilai khat amda.

²Hava miilaiji jaanni Jisu hin arva da ungu Mhin theda, “Rabbi, Nah Isowr hinki kurjung Chukpu khat tdit neenni kdee chaak in; mleija Isowr ri ado tiṭhi kma donle, Nah dotlot hava titinna rekka ku khat lee ngi tlo pchaang me.”

³Jisu ngi mhin arthawngda, “Kindit, kinditti, Neiji ahin kthea, miilai khat ava renni kṭou kma donle, Isowr Kruwngpaam mma ngi dei chip pchaang nime.”

⁴Nikodimas ava ngi Mhin theda, “Miilai khat ava mder chaakku tak heppi kṭou rangda? Mvei knitna ngi mnuh poi thu lut da mma kṭou rang mo?”

⁵Jisu ngi arthawngda, “Kindit, kinditti, Neiji ahin kthea, miilai khat ava dii leh pthla ngi mṭou mabi, Isowr Kruwngpaam lut chip pchaang nime.

⁶Mleija dakki kṭou ava dak, ungta pthla ngi kṭou ava pthla.

⁷Nah hinni hava kdo the leiji ngak chma, ‘Ren ni aṭouma rome.’

⁸Tarthli ngi mraan nuwm na thung ngi kraang, ungta nang ngi marchaang ava aryaa nadi, pdainu nang ngi tva ki kthleng mdit mata tva tha kchet tdit dei mti; ava leiji pthla ngi kṭou mii pum ktaija anto lu hep daat.”

⁹Nikodimas ava ngi Mhin theda, “Tak heppi hava kthuwk rang da?”

¹⁰Jisu ngi mhin arthawngda, “Nah Isreel rek chukpu khat pti, ungu tak heppi hava dei pandi mti da?

¹¹Kindit, kinditti, Neiji ahin kthea, neenva kdo dee in ava ktheen ping, ungta kdo dee chaak in ava sakhi kpii in ping; pdainu neenki rinpauminna naanni arlaang chmaan ti.

¹²Neiji dultipaam ki do kdothe ava nang ngi arin chaak mau, tak heppi parwaan ki do kdothe ava nang ngi rin chna di?

¹³Ku khat lee ngi parwaan tha hung pchaang me, pdainu Mii Chapa ava parwaan ki kurjung kṭum.

¹⁴Kbowk laiji Mousi ngi pruwl mdo khiin heppi, Mii Chapa mdo khiin ma rome.

¹⁵Mleija Mma krin kcha ku mii khat ava kṭuw knai kma rinkhu kpha chra.

¹⁶Mleija Isowr ri dultipaamma tija thu wonsat loda, ditta Mchapa khat chrel pii chda, Mma krin cha ku mii khat ava mawng nime pdainu kṭuw knai ma rinkhu kpha chra.

¹⁷Mleija Isowr ri Mchapa ava dultipaam thung ngi arjun siida, dultipaam mraal kpii rang lei pme, pdainu Mma ngi dultipaamma kaktlan pik ra.

¹⁸Mma krin cha mii ava mraal pii nime, Isowr Chapa khat chrel miing krin kma mii ava mma ngi mdo rin chaak ma leiji mraal mdo piik dok.

¹⁹Ungta mdo kṭewlla hava, ditta dultipaam thu mar awng arjungda, ungta mii rekva mar awng ava kchang nga, kjiingnu wonsat loda, mleija mnong tlot inna ṭha me.

²⁰Mleija kṭha kma ktlo mii pum ktaiva mar awng pdar chda, mnong tlot in mdo pandan nuwm maan leiji, mar awng tha arvang nuwm lamme.

²¹Pdainu kindit ktlo miia Isowr ri mrot pik tdit mar awng ngi mdo tdet nra, mar awng tha karvang.

²²Hava dil tha Jisu leh msiikhu rekka Judia paam tha vang lamda; Mma ngi avatha mmaan kcheen ṭhida baptis ptlot lamda.

²³Johon rukva Salim be tha Aenon thung ngi baptis ptlot slii da, ava thu dii mnem bet leiji, mii rek arva lamda, ungta baptis ptlot pik chlam da.

²⁴Mleija Johon na rowng inn thu am mlai.

²⁵Tunva Johon siikhu rekki Jihudia miilai khat hin kartleu mlei thu karteen ṭhi lamda.

²⁶Ungta mmaanni Johon hin arvang lamda, ungu mhin the lamda, “Rabbi, Jordon raalpha ngi nang tu kilṭhi, nah sakhi hurpik, Mma ava tha ka am daatta, Mma hin kthleng mii mkheng Mma ngi baptis ptlot pik lamda.”

²⁷Johon ni arthawngda, “Parwaan ki ngi Mhin kpii kma donle, ku khat lee ngi do khat lee arlaang nime.

²⁸Neia Khrista pmaang, pdainu Mma du sukki nea mdo tsii dinu ado kthe pik dok in, ava naan adaksaan katti sakhi.

²⁹Jur kphal la kphalpa; ungta ripda karyaa kcha rek kphalpa plap rekki kphalpa krowl aryaa da, kdung ngi kanpa kcha a; ava ngi mlei kurthuwk da, hava ngi neiki kanpa ava kurkhumma.

³⁰Mma klin thang ra, pdainu nea kdil thang kat rang ping.

³¹Tun knungki kurjung Mma ava mkheng leenni tun knung ra; dultipaam ki mii ava dulti mii do, ungta dulti mii pauvi kpau; parwaan ki kurjung Mma ava mkheng tun riimmi ka amra.

³²Mma va mdo dee leh mdo aryaak ava sakhi mdo piik, anto daat joso Mma rinpaumin na ku mii khat lee ngi arlaan pik me.

³³Mma rinpaumin karlaang cha miia, kindit kdiki Isowr kbiinam mi mdo nam pik dok.

³⁴Mleija Isowr dosii Mma va Isowr pauna rek mdo the, mleija tparte, na thung ngi parte da pthlava Mhin mdo piik pme.

³⁵Mpah ngi Mchapa ava wonsat loda, ungta do mkheng nga Mma khut thu mdo piik dok.

³⁶Mchapa hin krin cha miia kṭuw knai ma rinkhu kpha chra; Mchapa kleek miia rinkhu dei nime, pdainu Isowr plung thit mleen kthlung ra.