Read Lamkang JOHON 4 Bible Online

JOHON 4 - Lamkang bible

JOHON 4

¹Tunva Mukpu Jisu ngi baptis ptlot lamda, Johon hinva siikhu rek knem mi mseemma tdit ki pau Pharisi rekki mdo aryaak Mukpu ngi deida.

²(Jisu mdak kat va baptis plo lamme, pdainu msiikhu rek daatti plo daat joso),

³Mma ngi Judia paam ma pthii thida Galil tha kunsun nowlda.

⁴Mma ngi Samaria mdo klaan ra kurthuwk da.

⁵Ava leiji Mma ngi Sykhar tdit Samaria khuwpii khat tha, Jakob pi mchapa Joseph hin mdo piik bil ava be thang ngi arvang da.

⁶Ava thu Jakob diirum amda, ava lei Jisua lam kchet kipjiin mkurthut leiji kham chda diirum be ngi karnga da. Ava ṭhang truk arveel.

⁷Ava thu Samaria snu miilai khatti dii ksuwk ra arva da. Ungta Jisu ngi mhin theda, “Kdo neek ra mhai pii cha.”

⁸Mleija msiikhu rekka khuwpii tha then krenra va dok lamda.

⁹Samaria snu ava ngi Mhin theda, “Tak heppi Jihudia khat Nangva, Samaria snu nei kihin ki ado neek ra dii ado ṭhilda?” Mleija Jehudia rek leh Samaria rekka kurchom nlamme.

¹⁰Jisu ngi mhin arthawngda, “Nang ngi Isowr chla deida ungu nah hinni kpau slii Mma ava ku tdit adee tlaangbi, ‘Kdo neek ra dii mpii tidonle,’ nang ngi Mma hinki kring dii ava ṭhil chna di.”

¹¹Snu ava ngi Mhin theda, “Ocha, adii su nra ado thloi makpa, ungta diirum rukka ktlum, Nangva kring diia tva ki pha na da?

¹²Hava diirum mikpii kchaan, ungta mma mdak, ungu mchapa le, ungta msil rek rukva mthungki dii mdo neek, neenki kpah in Jakob hinva Nah klin pti mo?”

¹³Jisu ngi mhin theda, “Hava thungki dii knee mii pum ktaija mning kakraal nowlra,

¹⁴pdainu Neiji kdo piik ra dii ava knee ku mii khat ava, tden thung preva mning kraal nime. Neiji kdo piik ra dii ava mma thung ngi diitlaang kur owl donle, kṭuw knaima rinkhu ngi kphul ra.”

¹⁵Snu ava ngi Mhin theda, “Ocha, neiji kning makraal ma nra, mdit mata dii kdo su ma nra,ava diia mhai pii cha.”

¹⁶Jisu ngi mhin theda, “Vang, a innpu vang ownra, ungu hava thu arhai ṭhi.”

¹⁷Snu ava ngi Mhin arthawngda, “Ki innpu thloi chmaang.” Jisu ngi mhin theda, “Nang ngi ki innpu ame diti mkindit athea;

¹⁸mleija nang ngi innpu miilai parnga ado thloi, ungta tun tunni ado thloija a innpu pme; hava mkindit nang ngi athea.”

¹⁹Snu ava ngi Mhin theda, “Ocha, Nah khulpu khat pti tdit neiji kdee chaakka.

²⁰Neenki kpah leva hava lownpii luwbuk lamda; ungta Nangva mmun Jerusalem tha luw ado buk raan pi ditinu.”

²¹Ungbi Jisu ngi mhin theda, “Snu, naan ki Apah in ava hava lownpii mdit mata Jerusalem tha luw ado buk ma nraanki ṭhang ava karvang sliia.

²²Naanva ado dee maan luwbuk inti; neenva kdo dee in luwbuk innu, mleija kirliing ava Jihudia thung ngi kthuwk.

²³Pdainu tun rukva mkindit luw kbuk rekki Mpah ava pthla leh kindit ava ngi luw mdo buk nraanki ṭhang ava karvang sliia, mleija Mpah rukva Mhin anto lulu ngi luw kbuk ra ava mdo thlaam.

²⁴Isowra Pthla, ungta Mhin luwkbuk miirekva pthla leh rinkinditti luw mdo buk ra.”

²⁵Snu ava ngi Mhin theda, “Masija kurjung nga tdit neiji kdee chaakka. (Mma ava Khrista) Mma ngi murjun mpha thu do mkheng mhai ktidet chraan.”

²⁶Jisu ngi mhin theda, “Nang hinni kpau meek slii Nei ava Mma ping.”

²⁷Ava dilli siikhu rek arvang lamda. Snu miilai khat mdo karbiik ṭhi leiji ngak chlam da, pdainu “Talu angei da?” mdit mata “Talu leiji mma ado karbiik ṭhida?” dida ku khat lee ngi the pchaang me.

²⁸Ava leiji snu ava ngi mdiiuwm ma thida khuwpii tha vangda, ungta mii rek hin theda,

²⁹“Nei kdo tlot mkheng kthethuw Miilai khat ava arva inra asuwn. Hava Khrista ngaal mo?”

³⁰Mmaanni khuwpii ki thuwk lamda Mhin arva lamda.

³¹Ava arlaanni siikhu rekki, “Rabbi, maal,” dilam da Mhin ktham chlam da.

³²Pdainu Mma ngi mhin inni theda, “Naan dodee ma then kdo chaak ra ka am.”

³³Ava leiji siikhu rekki khat leh khatti the lamda, “Mma hinni then ksin ku mii khat ka am ngaal in pti mo?”

³⁴Jisu ngi mhin inni theda, “Nei miksii Mma dongei ktlo dok ava Nei kthen.

³⁵‘Thla plii diltha buh khau pha kveira,’ dida naanva the maanti mo? Neiji akthe pik inna, amik inni tan aan inra hansuwn, bil rekka min dok da buh khau pha kveija.

³⁶Kakhau mii ava ngi marda man karlaang chra, ungta kṭuw knai kma rinkhu tummi thei kpurkuk chra, ava leiji kakhau leh kapṭau ava kanpave lamra.

³⁷Mleija ‘khat do pṭau khatti kakhaura’ dida mdo the kcho ava mkindit kat.

³⁸Naan nonglo nma, ktlok rek nonglo dok nthu kakhaura Neiji aksii inna, ungta naanna mmaan nonglo thung ngi klut kcha in pti.”

³⁹Snu ava rinpaumin ni mlei kurthuwk da, khuwpii thungki Samaria mii knempok ki Mma hin rin chda, “Nei knong tlot mkheng Mma ngi thethuw dokda.”

⁴⁰Ava leiji Samaria rekki Mma hin arva lamda, mmaan hinni makcheen daat nra ktham chlam da, ungbi nii knii kcheengda.

⁴¹Ungta Mma pauna leiji mii knempokki Mhin rin chda.

⁴²Mmaanni snu ava hin the lamda, “Nah apauna leiji neenni kdo rin kurnowl in pme, mleija neen kdak kat inni aryaa chaannu, ungta hava ava ngi dultipaam kaktlan pik ra tdit neenni kdo dee chaak in.”

⁴³Nii knii diltha Mma ngi Galil tha vangda.

⁴⁴Mleija Jisu mdak rukva khulpu khatta mdaksaa ki khuwpaam thangva kjat pik me tdit deida.

⁴⁵Ava leiji Mma ngi Galil tha arvangda, mleija mmaan rukka kmaal mche lei inni, Jerusalem tha kmaal thung ngi mdo tlot mkheng dei lamda, Galil mii rekva Mma kowl chlam da.

⁴⁶Ava leiji Mma ngi Galil ki Kana tha dii ava rikrou dii mdo pur owl na thang ngi arvangda. Ungta Kaparnahum thung ngi nong klin kpuw miilai khat chapa ava kukoi amda.

⁴⁷Jisu ngi Judia ki Galil tha marvan maryaak thungta, Jisu ngi ju da mchapa mdo pdam pik nra, mma ngi hangda Mhin ktham chda, mleija mchapa ava kdiyou daat rang ngi koi chda.

⁴⁸Ava leiji, Jisu ngi mhin theda, “Nang ngi titinna rek leh tngana rek adee du khim khaiji rin chnim ti.”

⁴⁹Nong klin kpuw ngi Mhin theda, “Ocha, knao mdiyo du ngi mhai thlen pik cha.”

⁵⁰Jisu ngi mhin theda, “Jung, achapa kring chra.” Mma ngi Jisu dothe pik pauna rin chda mlam tha jungsunda.

⁵¹Mma ngi hanto mjun slii arlaanni, mma sra owr rekki kurdut ṭhida, achapa kring kcha a kdingi song lamda.

⁵²Ava leiji mma ngi kdam mdo pṭhun na ki ṭhang mhin inni khewl lamda, ungbi mmaanni mhin the lamda, “Janii ngi ṭhang tikheu thu riiphaak va ma da.

⁵³Jisu ngi “Achapa kring chra,” dida mhin mdo thena ṭhang thung katta mpah ngi dei da; ungta mma mdak kat ungu mphungka mkheng ngi Mhin rin chlam da.

⁵⁴Jisu Judia ki Galil tha marvan mpha thung tunva hava mvei knit naki titinna rek mdo tlot.