Read Lamkang JOHON 5 Bible Online

JOHON 5 - Lamkang bible

JOHON 5

¹Hava diltha Jihudia rek kmaal khat amda, ungbi Jisua Jerusalem tha hangda.

²Tunva Jerusalem thung ngi jao paltong ava be tha dulbuk parnga amda, Hebru pauva Bethjatha mdo dit, ava thu liibum khat amda.

³Havale thung ngi kukoi, mik ktot, khu kseek, kyeng rek kurtuwl pok lamda.

⁴(Mleija mkret mkretti Mukpu Waantamsii ngi liibum thu arjungda, diia tnok kchokda, ungu dii maknat thung ngi ru kri ngi jungkṭum mii ava mo omlai khim khai kdam cha.)

⁵Ava thung ngi kum som kdum lei tret lik thung ngi kukoi kcha miilai khat amda.

⁶Jisu ngi mma deida, ungta mpha roi ksotti koida ava thung ngi ki iip chdaat tdit deida, Mma ngi mhin theda, “Kdamra angei mo?”

⁷Kukoi miilaiji Mhin theda, “Ocha, liibum dii maknat mpha thu, mikṭhi chra ku khat lee thloi chmanu, ungta neiji kjun ṭum slii arlaanni, nei kdu ngi ktlok khatti ṭum chdok khot kchokda.”

⁸Jisu ngi mhin theda, “Kardel, ungu a iina aloura, chet.”

⁹Ungta mpha ava kat thung ngi mma dam chda, ungta mma ngi mi iina louda, ungu chetda. Tunva ava sabath nit kurthuwk da.

¹⁰Ava leiji Jihudia rekki kdam miilai hin theda, “Sabath nit kurthuwkka, a iina ado loa Nowlam dorot pme.”

¹¹Pdainu mma ngi mhin inni arthawngda, “Nei mkapdam Mma ngi ‘A iina aloura echet,’ dida theda.”

¹²Ungbi mmaanni mhin khewl lamda, “ ‘A iina alou ungu echet,’ dida ahin kthe Miia kuda?”

¹³Tunva kdam miiva Mma ava ku tdit dei me, mleija mun ava thu mii mkurtuwl pok leiji Jisua kunsun dok da.

¹⁴Dil thang ro ngi, luwbuk Inn thu Jisu ngi phada, ungu mhin theda, “Asuw, kdam kcha im ptine! kheel sii aleenni mtlaak ma nra, pnu tla kurnowl ma.”

¹⁵Miilai ava ngi sunda mma kapdam ava Jisu tdit Jihudia rek hin songda.

¹⁶Ungta Mma ngi sabath nitti hava mdo tlot leiji, Jihudia rekki Jisua kja kakham pii lamda.

¹⁷Pdainu Jisu ngi mhin inni arthawngda, “Kpah ngi tun kpha thu nong tloda, ungbi Nei rukva nong kdo tlot.”

¹⁸Hava leiji Jihudia rekva kheel sii ngi Mma mdo eayo nraan mlam thlaam lamda, mleija Mma ngi sabath nit daat pkuime, pdainu Isowra Mma Pah pi dida, mdakka Isowr tu kpinṭim da.

¹⁹Ungta Jisu ngi mhin inni theda, “Kindit, kinditti, Neiji ahin inni kthea, Mchapa mthi na ngi do khat lee tlo pchaang me, pdainu Mpah do tlot slii mdo dee ava daat, mleija Mma do tlot khim khaija Mchapa rukva anto lulu ngi mdo tlot.

²⁰Mleija Mpah ngi Mchapa wonsat loda, ungu Mma do tlot slii mkheng Mhin tdet da; ungta anga chaak nraan havale hinva klin sii nong rek Mma ngi akti det raan.

²¹Mleija Mpah ngi kdiyou dok rek pring pardel da rinkhu mdo piik lulu ngi, Mchapa rukva mdo ngei rek hin rinkhu kpii ra.

²²Mpah va ku mii khat lee kṭewl me, pdainu mdo kṭewl ra mkheng nga Mchapa hin mdo piik dok.

²³Mmaanni Mpah mdo kjat chaak in lulu, mii mkheng ngi Mchapa mdo kjat chaak nrang lei kurthuwk. Mchapa kakjat kma miiva Mma arjun ksii Mpah ruk kjat chme.

²⁴Kindit, kinditti, Neiji ahin thaanni kthea, Nei kpauna aryaa da ungta Nei mju ksii Mma krin cha mii ava, kṭuw knai kma rinkhu mthloija, Mma dokṭewl rang thung ngi thleng nime, pdainu kdiyou rang thungki rinkhu tha maklaan chaak dokka.

²⁵“Kindit, kinditti, Neiji ahin thaanni kthea, tun tun rukva kdiyou dok rekki Isowr Chapa krowl mdo aryaak nraan, ungta kdiyou dok rekki kring mdo phaak chaak nraan ki ṭhang karvang sliia.

²⁶Mleija Mpah ngi mdaksaa thung ngi rinkhu mdo thloi lulu ngi, Mchapa rukva mdaksaa thung ngi rinkhu mdo thloi nra Mhin kpii dok.

²⁷Mma ngi Mii Chapa mkurthut leiji mdo kṭewl nra Mhin mdo piik dok.

²⁸Hava ngi ngak chmaan; mleija thlaan thungki mii mkheng ngi Mma krowl mdo aryaak nraanki ṭhang ava karvang nga.

²⁹Ungta kṭha ktlo rekka rinkhu mdo piik nra kring kardel ra, ungu kṭha kma ktlo rek ava mdo kṭewl nrangki ngi kardel ra.

³⁰Neiva kthi naki rutanni do khat lee tlo pchaang maang; Neiji kdo aryaak ava heppi, kdo kṭewl; ungta Nei kdo kṭewl ava mkindi,t mleija Nei mju ksii Mma do ngei kma donle, kthina ki Neiji thlaam maang.

³¹Neiji kdaksaa kthina ki sakhi kpiikbi, Neiki krinpaumin ava kindit me;

³²Neiki sakhi mikpiik pik ktlok khat rukka ka am, mma ngi Neiki rinpaumin mdo piik ava kindit tdit Neiji kdee.

³³Naanni Johon hin mii sii inti, ungu mma ngi kindit sakhi piida.

³⁴Nei kdo arlaan rinpaumin ava mii rek hinki pme, pdainu naan ado tiktlan pik chaak nraan, Neiji hava kdo the.

³⁵Mma ava kṭuwng slii ungu kleng daat meila, ungta naanna mpha mruk tummi Mma ar awng thung ngi kanpa kcha nuwm inpti.

³⁶Pdainu Nei kdo thloi rinpauminna Johon hinki hinva klin sii; mleija Nei kdo pṭut chaak rangki nong rek ava Kpah ngi mrot pik chda, Neiji kdo tlot slii hava nong rek kat daat rukva, Neia Kpah dosii tdit ki sakhi piida.

³⁷Ungta Nei mjuksii Kpah mdak kat rukva, Neiki sakhi mpiik pik chda. Naanni Mma krowlla aryaa liit maanti, mrungchen dei maanti;

³⁸ungta naan plung ril thung ngi Mma pauna arkhii maanti, mleija Mma ngi mdo sii Mii ava naanni rin chmaanti.

³⁹Mleija naanva Laaika rek thung ngi kṭuw knai kma ki rinkhu pha chraan pak innu kdingi thlaam intinu; ungta mmaanva Neiki sakhi kpii kurthuwk;

⁴⁰anto daat joso naanni rinkhu ado phaak chaak nraan, Nei kihinni thleng nuwm maan ti.

⁴¹Neiva mii rek hinki laarnee ava arlaang maang.

⁴²Pdainu Isowr wonsat naanni thloi maanti tdit Neiji kdea.

⁴³Kpah miing ngi Neia kurjung ping, ungta naanva marlaang chmaanti; mdaksaa miing ngi ktlok khat mthlenbi, mma ava arlaang naandi.

⁴⁴Isowr khdaat ava hinki laarnee kthlaam kma ungu khat leh khat hinki laarnee kthlaam miia tak heppi arin chaak inna?

⁴⁵Kpah hinni Neiji araal in kpii rang heppi bin maan; naanki mraal akpii raanna naanni ado bin chaak in Mousi avara.

⁴⁶Naanni Mousi arin chaak inbi, Nei mrin chnaandi, mleija mmava Neiki mlei mdo kjit.

⁴⁷Pdainu naanni mma do kjit arin chaak maannu, tak heppi Nei kpauna rekka rin chnaandi?”