Read Lamkang JOHON 6 Bible Online

JOHON 6 - Lamkang bible

JOHON 6

¹Hava diltha Jisua Tibarias truwn mdo dit, Galil truwn raalpha khat tha vangda.

²Ungta kurtuwl mii rekki mdil ṭoida, mleija Mma ngi kukoi mii rek hin titinna rek mdo tlot dei lamda.

³Ungta Jisu ngi lownpii tha hangda, ava tha msiikhu rektu ku ong lamda.

⁴Tunva Jihudia rek kmaal taplaanna ava nai tekda.

⁵Mma ngi tan aanda mmik mpahar thungta, kurtuwl mii rek Mhinni karhang deida, Jisu ngi Philip hin theda, “Tak heppi thenpen ren min don hava mii rekka tapmaal raanda?”

⁶Mmava mdo pirsin nangi hava theda, mleija Mma mdakki mdo tlot rang nga dei dok da.

⁷Ungta Philip pi Mhin arthawngda, “Dinari arjaa kniiva mii pum ktaiji mruk sisi mdo phaak raan ruk khop nime.”

⁸Ungbi msiikhu khat Simon Pitor upah Andrija ngi Mhin theda,

⁹“Tjun thenpen parnga leh tuwlva knii kthloi pselnao khat ka amma; pdainu hava mii knempok arlak va tak hep rangda?”

¹⁰Ungbi Jisu ngi theda, “Mii rekka apkong in.” Tunva mmun ava thu nowmsuwl pa amda; ava leiji pun parnga nga ngi ko ong lamda.

¹¹Ava dilli Jisu ngi thenpen louda, Mma ngi mpanpaak dok dilli, ko kong mii rek hin them pik lamda; mmaan dongei ja ngi tuwlva ruk anto tlo lamda.

¹²Ungta mmaanni poi kpa ngi mmaal dok inle, msiikhu rek hin Mma ngi theda, “Kekleem kṭikka kma liit kma apurkuk dok in.”

¹³Ava leiji mmaanni tjun thenpen parnga, mii do chaak don mkekleem kṭik ava bowr sowm lei knii kdimmi purkuk lamda.

¹⁴Mii rekki titinna rek mdo tlot mdee in thungta, mmaanni the lamda, “Hava dultipaam thung ngi kurjung rangki Khulpu ava kat!”

¹⁵Ava dilli mmaanni arva lamda, namtrom mi kjowngda kruwng mdo tpurthuw nraan mdo tlot in Mma ngi deida, spar jikki lownpii tha mthina ngi Jisu ngi kikneeng dokda.

¹⁶Ungu khuw mjiin thungta, msiikhu rekka truwn leen jung lamda,

¹⁷arkuwng khat leen tuwng lamda, Kaparnahum kphara, truwn kvang arkaan pṭhun lamda. Tunva khuw jiingda, ungta Jisu va arjun pha mlai lamda.

¹⁸Truwn ava tnokda, mleija tirthli kdung ngi raangda.

¹⁹Mmaanni meel kdum mdit mata plii arveel arkuwng tunni mvan slii arlaanni, truwn leen Jisu chetda arkuwng ktongtha mnai dei lamda, kdung ngi piir chlamda,

²⁰Pdainu Mma ngi mhin inni theda, “Nei ping, ṭi maan.”

²¹Mmaanni arkuwng leen mdo tuwn ṭhi nraan leiji kanpa chlam da, ungta kbei sekki mdo phaak raan laan ava thlung lamda.

²²Mupduk nii ngi mii rekva truwn raalpha khat tha ka am arkuwng khdaat chrel dei lamda, ungta Jisua arkuwng thung ngi msiikhu rek luṭhi lamme, pdainu msiikhu rekka mthi naanni sun lamda.

²³Mukpu ngi mpanpaak dok diltha thenpen mdo chaak naan mun be tha Tiberia ki arkuwng rek arvada.

²⁴Ava leiji mun ava thungva Jisu daat don msiikhu rek daat don am lamme tdit mii rekva deida, mmaanni arkuwng leen tuwng lamda, Jisu kthlaam Kaparnahum tha vang lamda.

²⁵Ungta truwn raalpha khat ktong tha mmaanni pha chlamda, Mhin the lamda, “Rabbi, hava thangva tden ni karvang ptida?”

²⁶Ungbi Jisu ngi mhin inni arthawngda, “Kindit, kinditti, Neiji ahin thaanni kthea, naanni Nei ado tathlaam in ava, titinna rek ado dee lei inpme, pdainu poi kpa ngi thenpen ado chaak lei in.

²⁷Kmaang chrangki tummi nong lou maan, pdainu Mii Chapa ngi ado tpiik chaak raan, kṭuw knai ma rinkhu ado phaak chaak raan ki tummi alou in, mleija Mma leenni Isowr ri kbiinam namda mdo piik dok.

²⁸Ava dilli mmaanni Mhin theda lamda, “Isowr, Nah anong rek ktlo kukurthut nraan neenni tak tlo chnikaan di?”

²⁹Jisu ngi mhin inni arthawngda, “Mma ngi mdosii Mii ava naanni arin chaak inbi, hava Isowr nong.”

³⁰Ava leiji mmaanni Mhin the lamda, “Ava mkurthuttu, neenni deida kdo rin chaak nraan, titinna talu tlo nadi? Talu nong tlo na?

³¹Mdo kjit dok lulu ngi, kbowklaiji neenki kpah leva manna chaa lamda, ‘Mdo chaak raan parwaan ki thenpen Mma ngi pii chlamda.’ ”

³²Ava dilli Jisu ngi mhin inni theda, “Kindit, kinditti, Neiji ahin thaanni kthea, parwaanki thenpen na Mousi do piik pme; kindit thenpen ava Kpah ngi parwaanki ado tpiik chaak in.

³³Mleija Isowr thenpen na parwaanki kurjung, ungta dultipaam thung ngi rinkhu mdo piik.”

³⁴Ungta mmaanni Mhin the lamda, “Mukpu, hava thenpenna mpha ktai thung ngi mhai pii chaan.”

³⁵Jisu ngi mhin inni theda, “Neia rinkhu thenpen ava ping; Nei kihin karvang miia mpoi tham nime, ungu Nei mikrin kcha miia mning kraal nime.

³⁶Pdainu Neiji ahin thaanni kthea, mleija naanni mdei daat jown ti mrin chni maanti.

³⁷Kpah do piik mkheng Nei kihin karvangra; ungta Mma hinni karvang mii ava Neiji reipthi nimaang.

³⁸Mleija Neia kthina ki kdongei ktlora parwaanki kurjung pmaang, pdainu Nei mjuksii Mma plungbin ktlo rangki kurjung ping.

³⁹Ungta Nei kihinni mdo tpiik chaak mkheng kdo pmaan ma nra; ungu mṭutna nitti kdo prin pardel lam nrangki ava Nei mjuksii Mma plungbin kurthuwk.

⁴⁰Mleija Mchapa deida ungu Mma hin krin cha mii pum ktai ava kṭuw knai ma rinkhu kpha chra; ungta mṭutna nitti Neiji pring pardel nikdi, hava Nei Kpah plungbin.”

⁴¹Ava dilli Jihudia rekki mkho the chlam da, mleija “Neia parwaanki kurjung ṭum thenpen ava ping,” dida Mma ngi theda.

⁴²Mmmaanni theda, “Hava Joseph Chapa, mpah leh mnuh nenni tdee in, Jisu ava pmemo? Tak heppi Mma va tunva ‘Parwaanki kurjung ping,’ dida mdo theda?”

⁴³Jisu ngi mhin inni arthawngda, “Asingreel inni kukho the maan.”

⁴⁴Nei mju ksii Kpah dohowl kma donle, ku khat lee ngi Nei kihinni arvang nime; ungta mṭutna nitti Neiji pring pardel nikdi.

⁴⁵Khulpu rekki hanto kjitda, ‘Ungta mmaan mkheng nga Isowr ri kpurchuk ra,’ Kpah hin karyaa kcha ungu kurchuk mii pum ktai ava Nei kihinni karvangra.

⁴⁶Isowr hinki Mma ava kma donle ku mii khat lee ngi Mpah ava deime; Mmava Mpah ava mdo dee dok.

⁴⁷Kindit, kinditti, Neiji ahin thaanni kthea, krin kcha mii ava ngi kṭuw knai maki rinkhu mthloi chaakka.

⁴⁸Neia rinkhu thenpen ava ping.

⁴⁹Naan pah leva kbowk laiji manna mchaak in, ungta mmaanna kdiyou chlam.

⁵⁰Mii ngi chaa da mdiyo ma nra; hava thenpen na parwaan ki kurjung ṭum.

⁵¹Neia parwaanki kurjung ṭum kring thenpen ava ping; ku mii khatti hava mchaakbi, kṭuw knaima kringra; ungta dultipaam tumra kdo piik thenpen ava Nei kdaksaa.”

⁵²Ava dilli Jihudia rek thung ngi msingreel inni karteen psuk lamda, the lamda, “Tak heppi hava Miilai va tchaak raanni mdaksaa mikpii raanda?”

⁵³Ava leiji Jisu ngi mhin inni theda, “Kindit, kinditti, Neiji ahin thaanni kthea, naanni Mii Chapa ava daksaa chaada, ungta mhii aneek du in khim khai rinkhu thloi nimaan ti;

⁵⁴Nei ki kdaksaa ava chaada, Nei kihii knee mii ava kṭuw knai kma rinkhu kpha chra, ungta mṭutna nitti Neiji pring pardel nikdi.

⁵⁵Mleija Nei kdaksaa ava tchaak rangki kat, ungta kihii ava tneek kat ra.

⁵⁶Nei kdaksaa chaada, ungta kihii knee mii ava, Nei kihinni ka am, ungu Neiji mma hin ka amping.

⁵⁷Kpah ngi Neia msiida, ungta Kpah leiji Neiji ringnu ka am lulu ngi, Nei mhai kchaa mii ava Neiji mlei kurthuwk nu kringra.

⁵⁸Hava parwaanki kurjung ṭum thenpen ava, apah leenni chaada mdiyo ava lulu pme; hava thenpen kchaa mii ava kṭuw knai kma kring ra.”

⁵⁹Hava Kaparnahum thung ngi mpurchu mpha thung, synagog thung ngi mdo the.

⁶⁰Msiikhu rek mii maknem mi maryaak thungta the lamda, “Hava kparsa lang lang khatti mthea, ku do aryaak pik rang da?”

⁶¹Pdainu msiikhu rekki mkho mdo the chaak ava Jisu mdak katti dei da, mhin inni theda, “Hava leiji plung apinlet pthiinmo?

⁶²Anto mkurthuttu Mii Chapa ngi chodu ki ma amna tha mhun kinlet dei naan mo?

⁶³Rinkhu kpii ava pthla, daksaa ava do ksi pme; Neiji ahin thaanni kdo the pauna rek ava pthla ungu rinkhu.

⁶⁴Pdainu naan mii angṭhe ngi rin chmaanti.” Mleija krin kma mii ava Jisu ngi mdu ngi mdo dee dok, ungta Mma kro kmara mii ava ku tdit mdo dee dok.

⁶⁵Ungta Mma ngi theda, “Kpah do rot pik mii ava kma donle, Nei kihin ku khat lee karvang rome dinu Neiji ado kthe pik dok in.

⁶⁶Hava diltha msiikhu rek mii ma knemmi mdil kinle chlam da, Mma tu kilṭhi da chet kurnowl lamme.

⁶⁷Jisu ngi sowm lei knii rek hin theda, “Naan rukka ksun nuwm in ptimo?”

⁶⁸Simon Pitor ri Mhin arthawng da, “Mukpu ku hin sun nikaan da? Kṭuw knai kma ki rinkhu pauna pda Nang ngi thloi ti;

⁶⁹ungta neenni ava rin chaannu, ungu Nah Isowr ki Kchiir khat pti tdit neenni dei chaannu.

⁷⁰Jisu ngi mhin thaanni arthawngda, “Neiji sowm lei knii akchol maanring mo? Ungta arlak inki khat ava dijabowl pmemo?”

⁷¹Iskariot Simon chapa Judas mlei thung Mma ngi theda, mleija sowm lei knii thungki khatti mro nime dida Mma ngi theda.