Read Lamkang JOHON 7 Bible Online

JOHON 7 - Lamkang bible

JOHON 7

¹Hava diltha Jisua Galil tha vangda, Judia tha Mma ngi hang nuwm me; mleija Jihudia rekki Mma ke eayou rangki thlaam lamda.

²Tunva Jihudia rek buw inn kmaal ava nai tekda.

³Ava lei mnaopale ngi Mhin the lamda, “Hava ama thira Judia tha hang, mleija asiikhu rekki anong tlot adei lamso.

⁴Mleija miilai ava ngi kaplaar ra mthlaambi, ku khat lee ngi tuprut nong tlo nime. Naan adaksaan ni havale atlot nuwm inta, adaksaan na hava dultipaam atidet chaan.”

⁵Mleija mnaopale rukva Mma rin chlamme.

⁶Jisu ngi mhin inni theda, “Nei ki mpha arjung mlai, pdainu naanki mpha ava kdet liit kma hava thung ngi ka am daat ra.

⁷Dultipaamva naan apder in nime, pdainu Nei mkipder ra, mleija mnong rek inna ṭha me tdit Neiji kparteel dokka.

⁸Kmaal rang nga naan hang daat in, Neia kmaal thu hang nimaang, Neiki mpha ava arjung kurkhum mlaija.

⁹Ava leiji Mma ngi anto theda Galil tha kcheeng daat da.

¹⁰Pdainu mnaopale ngi kmaal mhan dok dil thaan, Mma rukka sparjitti hangda.

¹¹Kmaal thung ngi Jihudia rekva Mma suw thlaam lamda, the lamda, Mma tva thang da?

¹²Ungta Mma mlei thu mii rekva msingreel inni mkho the chu chu lamda. Mii angṭheva, “Mma kṭha,” dida mthe slii arlaanni, angṭhe rek nowlva “Eme, Mma ngi lele tha mii ṭhida,” kdingi the lamda.

¹³Anto daat joso mmaanni Jihudia rek mdo ṭit chaak lei inni ku khat lee ngi kandang ngi pau theme.

¹⁴Kmaalli mṭim lop mphaak le Jisu ngi luwbuk Inn thu hangda purchuk da.

¹⁵Jihudia rekva Mhin ngak chlam da, the lamda, “Hava Miilaija kurchuk liit kmapava tak heppi mdo dee daat da?”

¹⁶Ava leiji Jisu ngi mhin inni arthawngda, “Nei kdo purchua Nei kdo pme, pdainu nei mju ksii ava do;

¹⁷ku mii khatti Mma dongei mtlotbi, hava kdo purchua Isowr hinki mo, mdit mata Nei kthina ki rutanni kdo the mo tdit mma ngi kdeira.

¹⁸Mthina ki rutanni kpau mii ava mthina ki laarnee kthlaam kcha; Pdainu Mma laarnee kthlaam Mii ava Mma dosii kindit ava daat, ungta Mma thu karmak ame.

¹⁹Mousi ngi Nowlam ado tpiik in pmemo? Anto daat joso ku khat lee ngi Nowlam ava arkhii me. Talu leiji Nei mke eayoura atathlaam inna?”

²⁰Mii rekki arthawngda, “Nah tarnam arve chaakka! Nah ake eayoura ku ngi atathlaam da?”

²¹Jisu ngi mhin inni arthawngda, “Nei knong tlot khat ava ngi naan akheng ngak chnaan di.

²²Mousi ngi vunmor apreen inda, (ava Mousi hinki pme pdainu apah leen hinki), ungta naanni miilai khat ava sabath nitti mvunmor adoreen in.

²³Sabath nitti miilai khatti vunmor kreen mdo phaak chaak ava ngi Mousi Nowlam kupkui mkurthut mau, sabath nitti miilai khat mdak mkheng Neiji kdo pdam leiji aplung in kthi mo?

²⁴Naanni mduwn daat kṭewl maan, pdainu kindit deek do kṭewlli akṭewl in.

²⁵Ava ngi mlei kurthuwk da Jerusalem thungki mii angṭheva theda, “Hava Miilaija mmaanni ke eayoura mdo thlaam in ava pmemo?

²⁶Ungta Mma va hava thung ngi kandang ngi pausaam da, ungu Mma hin do khat lee the lamme! Rutan kthloi rekva hava Khrista kat pi tdit kdei lam rang mo?

²⁷Anto daat joso Mma tva ki kthleng tdit nenni ndee in; ungta Khrista mthlen mpha thu ku khat lee ngi tva ki kthleng tdit dei nime.

²⁸Ava leiji luwbuk Inn thu Mma ngi mpurchu mpha thu Jisu ngi paryaam da, “Naanni atidee in, ungta tva ki kthleng ping tdit adee inmo? Pdainu Nei kthina ki rutanni kthleng pmaang; Nei mjuksii Mma ava kindit ungta Mma ava naanni dei maanti.

²⁹Mma Neiva kdee, mleija Neia Mma hinki kthleng ping, ungta Mma dosii ava ping.”

³⁰Ava leiji mmaanni ku kjowngra thlaam lamda, pdainu ku khat lee ngi mleen khut bel pchaang me; mleija Mma ki ṭhang ava vei mlai.

³¹Anto daat joso mii knempokki Mma rin chda, “Khrista mthlen mpha thu hava Miilai dotlot kheelli titinna rek tlo nime mo?”

³²Kurtuwl mii rekki Mma mlei thung ngi mdo the chuchu in Pharisi rekki aryaa lamda. Ungta thiimpu kinreel rek leh Pharisi rekki Mma kukjowng rang ki nong klin kpuw rek vasii lamda.

³³Ava dilli Jisu ngi theda, “Ksot bong ngi aju amṭhi daat nikaan di, ungta ava dil rongi Nei mjuksii hin hung nikdi;

³⁴naanni Nei mthlaam naandi, ungu mpha nimaanti; Nei ka amna thangva naanna thleng pchaang nimaanti.”

³⁵Jihudia rekki khat leh khatti the lamda, “Nenni tphaak pchaanma tva tha hava Miilaija kchet rangki da? Grik rek arlakki nmii rek in kmaang cha Grik rek hin chet da mpurchu nuwm mo?

³⁶‘Naanni mthlaam naandi ungu mpha nimaanti, ungta Nei ka amna thangva thleng pchaang nimaanti,’ hava talu mdo the ndaat da?”

³⁷Kmaal mṭutna nitta klin langlang kurthuwk da, Jisu ngi ripda ungu paryaam da, “Ning kakraal ku mii khatti arva sora anee chaso.

³⁸Laaika do the heppi, Nei mikrin kcha ku mii khat ava ‘Muplung thu kring dii kreng ngi kluwngra.’ ”

³⁹Tunva krin cha rekki pthla mdo arlaan chaak nraan Mma ngi kthe kurthuwk da; mleija Jisua mkunlor mlai leiji pthla kpii mlai kurthuwk da.

⁴⁰Mmanni hava pauna rek maryaak in thungta, mii angṭhe ngi theda, “Hava Khulpu mkindit kat.”

⁴¹Mii angṭhe rek nowlva theda, “Hava Khrista.” Pdainu mii angṭhe ngi theda, “Khrista Galil ki kthleng rang mo?

⁴²Khrista Devid charuwl thungki, ungu Devid khuwpii Bethlehem thungki kthleng rang pi dida laaika va the memo?

⁴³Ava leiji Mma mlei thung ngi mii rek arlakki kinṭhen khat amda.

⁴⁴Mma mii angṭheva kjowng nuwmda, pdainu mleen khut kbel khat lee ame.

⁴⁵Ava leiji nong klin kpuw rekka thiimpu kinreel rek leh Pharisi rek hin vang kinle lamda, “Talu leiji Mma arvan ṭhi maanti?” dilamda mmaanni the lamda.

⁴⁶Nong klin kpuw rekki arthawng lamda, “Hava Miilai pau heppi ku khat lee ngi kpau ame!”

⁴⁷Pharisi rekki mhin inni arthawngda, “Naan rukka lele dung ngi ati ṭhiinmo?

⁴⁸Rutan kthloi rek mdit mata Pharisi ku khat lee ngi Mma krin cha ka ammo?

⁴⁹Pdainu Nowlam kdei kma hava kurtuwl mii rekka pauhur kbukra.”

⁵⁰Rukri ngi mmaan arlak thung ki khat Mma hinni kthleng, Nikodimas ava ngi theda,

⁵¹Rukri ngi Mma dotlot karyaak pik kma ungu kurchuk kma donle Nowlamva mii makṭewl mo?”

⁵²Ungta mmaanni mhin arthawngda, “Nang rukka Galil ki pti mo? Athlaambi dei nadi, Galil ki khulpu ku khat lee thuwk me.”