Read Lamkang JOHON 8 Bible Online

JOHON 8 - Lamkang bible

JOHON 8

¹Mmaanni mi inn mi inn thaanni sun lamda, pdainu Jisua kruwn lown tha hangda.

²Mma ngi jiingsun kpanma ngi luwbuk Inn thu arjung nowl da; mii mkheng nga Mma hin thlengda, ungta Mma ngi ko ongda purchuk lamda.

³Ungta Nowlam chukpu rek leh Pharisi rekki losang kṭhi snu khat kjowng lamda ṭhi lamda, ungta mma marlak inni thii lamda,

⁴mmaanni Mma hin the lamda, “Chukpu, hava snua losang kṭhi slii kdo kjown in.

⁵Tunva hantolu miia Mousi va lung ngi adeeng you in dida Nowlam thu pau mreen pik inda. Mma mlei thu Nangva tak heppi athea?”

⁶Mlei murson thlaamda Mma ki mraal mdo piik nraan mdo pirsin naanni hava the lamda; ungbi Jisu ngi tpee da mkhut chelli dul leen kjit da.

⁷Ungta mmaanni kurnowl lamda Mhin mkhewl in thungta, Mma ngi ripda mhin inni theda, “Naan arlakki pnu ktong kma mii ava ngi rukri ngi adeeng so.”

⁸Ungta Mma ngi tpee nowlda dul leenni kjit da.

⁹Pdainu mmaanni ava maryaak in thungta, khat khatti kver ki ngi pṭhunda sun tir chlam da, ungu Jisua mthina daatti mmaiṭhuwmmi snu krip daatti ma pthii lamda.

¹⁰Jisu ngi suw thida mhin theda, “Snu, tu ung tir lamda? Ku khat lee ngi araal apii memo?”

¹¹Snu ava ngi theda, “Ku khat lee ame, Mukpu.” ungta Jisu ngi theda, “Nei rukva araal apii maang; vang, ungu pnu thu tla kurnowl ma.”

¹²Veikhat nowlli Jisu ngi mhin inni pausaam da, theda, “Neia dultipaam ki mar awng ava ping; Nei kdil kṭoi cha miia kjiing thu chet nime, pdainu rinkhu mar awng kthloira.”

¹³Ava dilli Pharisi rekki Mhin theda, “Nah adaksaa athina ki sakhi kirpii tinu, Nah arinpauminna kindit ava pme.”

¹⁴Jisu ngi arthawngda, “Neia kdaksaa kthina ki sakhi kuhur kurthuwk joring, Nei krinpaumin ava kindit, mleija Neiji kthlen na leh ksun nra ava kdo dee, pdainu naanva Nei kthlen na leh ksun nrang nga dei maanti.

¹⁵Naanva daksaa dil kṭoiji ado kṭewl in, Neiva ku khat lee kṭewl maang.

¹⁶Neiji kṭewl daat joring, Nei kdo kṭewlla kindit, mleija Nei kthina daatti kṭewl maang; pdainu Nei leh Nei mjuksii Mma tu kdo kṭewl ve in.

¹⁷Naanki Nowlam thung ngi mdo kjit miilai knii ki rinpaumin ava mkindit kat.

¹⁸Neiji kdaksaa ki sakhi kirpii nu, ungta Nei mjuksii Kpah va Neiki sakhi mpiik pikda.”

¹⁹Ava ngi mlei kurthuwk da, mmaanni Mhin theda, “Nah Pah tu ungda?” Jisu ngi arthawngda, “Naanni Nei ruk mdit mata Kpah ruk dei maanti; naanni Nei atidee tlaang inbi Kpah ruk dei naandi.”

²⁰Mma ngi luwbuk Inn thung ngi mpurchu mpha thu, sumbuwr be ngi hava pauna rekka theda, pdainu ku khat lee ngi kjowng me, mleija Mma ki ṭhang vei mlai da.

²¹Veikhat nowlli Mma ngi mhin inni theda, “Neia sun chnik di, ungta naanni mthlaam inti donle, apnu ton inni diyou naan di; Nei ksun nrang tha naanna thleng pchaang nimaan ti.”

²²Ava dilli Jihudia rekki the lamda, “Mthina ngi kurhuwk you rangki mo? ‘Nei ksun nrang tha naanna thleng pchaang nimaanti,’ dida mdo thea.”

²³Mma ngi mhin inni theda, “Naanna kurdu ki in pti, Neia tun knungki ping, naanna hava dultipaam ki in pti, Neia hava dultipaam ki pmaang.

²⁴Neiji kthea, apnu ton rek inni diyou naan di, mleija naanni Nei ava Mma thide dida arin chaak du in khim khai, apnu ton rek inni diyou naan di.”

²⁵Mmaanni Mhin the lamda, “Nah ku ptida?” Jisu ngi mhin inni theda, “Kupṭhun daatki Neiji ahin thaanni kdo the ava Ping.

²⁶Naan mlei thung ngi do knempok theda do knempokki ado kekṭewl nraan ka am, pdainu Nei mjuksii Mma ava kindit kat, ungta Mma hinki Neiji kdo aryaak ava dultipaam thung ngi kdo the.”

²⁷Mpah mlei thung ngi Mma ngi mdo the ava mmaanva dei pandi lamme.

²⁸Ava leiji Jisu ngi theda, “Naanni Mii Chapa akhiin dok dil thaanni, Nei ava Mma thide tdit dei ro naandi, Neiva kthina ki rutanni do khat lee tlo maang, pdainu Kpah do purchu ava heppi Neiji kpau ping.

²⁹Ungta Nei mjuksii Mma ava Nei tu kilṭhi in ping, ksangtlaakki Mma va Neia mhai ma pthiime, mleija mpha ktai thu Neiji Mma dongei kdo tlot.”

³⁰Mma ngi hava mdo the leiji mii knempokki Mma rin chda.

³¹Ava dilli Jisu ngi Mma krin cha Jihudia rek hin theda, “Naanni Nei kpauna rek thung ngi anowl tlit daat inbi, naanna mkindit kat ki Nei ksiikhu rek in pti.

³²Ungta naanni kindit ava dei naandi, ungu kindit ava ngi akpintek chraan.”

³³Mmaanni Mhin arthawng lamda, “Neenna Abraham charuwl rek in ping, ungu ku mii khat lee dobowl thung ngi am maan ring. Tak heppi Nangva ‘Kintek pha chnaan di,’ diti ado the da?”

³⁴Jisu ngi mhin inni arthawngda, “Kindit, kinditti, Neiji ahin thaanni kthea, pnu thung ngi ktla mii khim khaija pnu suwk.

³⁵Suwkva inn thu kurnowl tlit da amme, chapa va kurnowl tlit da kṭuw knai kma ka amcha.

³⁶Ava leiji Chapa ngi kintekki atithiik inbi, naan rukka kintek naandi.

³⁷Naanna Abraham charuwl rek in pti tdit Neiji kdo dee dok, anto daat joso Neia mke eayoura mthlaam intinu, mleija naan thung ngi kpauna am nra mun ame.

³⁸Kpah tu kilṭhi ngi kdo dee chaak ava Neiji kdo the, ungta naanva apah leen dothe ava aryaa intinu ado tlot in.

³⁹Mmaanni Mhin arthawngda, “Abraham ma neen kpah.” Ungbi Jisu ngi mhin inni theda, “Naanna Abraham naole akurthut inbi, Abraham do tlot lulu tlo naan di.

⁴⁰Pdainu tunva Neiji Kpah hinki kdo aryaak kindit pau ava kdo the, anto daat joso naanva mke eayoura mthlaam intinu, anto lulu ngi Abraham va tlo me.

⁴¹Apah leen do tlot naanni tlo in tinu.” Mmaanni Mhin theda, “Neenna nala tartlaang kturkui thungki kṭou pmaan ring, Kpah in khat Isowr ruk kdo thloi in.

⁴²Jisu ngi mhin inni theda, “Naanki Apah inna Isowr mkurthutbi, Nei wonsat mlo naan di, mleija Neia Kpah hinki thuwk nu kdusuk kdo nowl; kthina ki rutanni Neia kurjung pmaang, pdainu Neia Mma dosii ping.

⁴³Nei kdo the ava talu leiji dei pandi maan ti? Naanni Nei kpauna diil da ado aryaak maan leiji hava.

⁴⁴Naanna naanki apah in dijabowl hinki in pti, ungta naan dongeija naan pah dongei kurthuwkda, mupṭhun daatki mma va mii eayouda, ungta kindit tu kilṭhi ngi mdo tlot nra ame, mleija mma thu kindit ava ame, mma ngi plei mne mpha thu mdak nopa dil kṭoiji pauda, mleija leineipa pda pleineida.

⁴⁵Pdainu Neiji kindit ado kthe pik lei inni, naanni mrin chmaanti.

⁴⁶Pnu pi dida naan arlakki ku ngi kraal mpii naandi? Neiji kindit kthe ku kurthut tu, talu leiji mrin chmaan ti?

⁴⁷Isowr hin ka am miiva Isowr hin mdo aryaak; naan do aryaak inki mlei ava ngi naanna Isowr ktong ki pmaanti.

⁴⁸Jihudia rekki Mhin arthawngda, “Nah Samaria khat ungu tarnam khat athloija kdingi neenni kdo the ava mkindit pmemo?”

⁴⁹Jisu ngi arthawngda, “Neia tarnam thloi maang; pdainu Neiji Kpah kjat nu; ungta naanva Neia makjat maanti.

⁵⁰Anto daat joso Neiva kthina ki laarnee thlaam maang; ava kthlaam rang nga khat ka am kcha ungu Mma ngi kekṭewl chra.

⁵¹Kindit, kinditti, Neiji ahin thaanni kthea, ku mii khatti kpauna rek markhiik chaakbi, mma ava diyou liit nime.”

⁵²Jihudia rekki Mhin theda, “Nah tarnam kthloi pti tdit tunva kdee chaak inna. Khulpu rek diyo lulu Abraham ruk kdiyou kcha, ungta Nangva ‘Ku mii khatti kpauna markhiik chaakbi, kdiyou du liit nime,’ diti athea.

⁵³Neenki kpah Abraham hinva Nah klin ptimo? Khulpu rek ruk kdiyou dok cha! Ku ping ngi kardi im pti?”

⁵⁴Jisu ngi arthawngda, “Neiji kdaksaa kpunlor bi, Nei kdo punlor ava do khat lee pme, Nei mukpunlor ava naanni neenki Kpah ado dit in Kpah ava.

⁵⁵Pdainu naanva dei mlai inti, Neiva kdo dee dok. Mma dei maang dida Neiji kthe kukurthutbi, Nei rukka naan lulu ngi plei knei khat kurthuwk nikdi, pdainu Mma Neiji deinu mpauna rek kdo arkhiik.

⁵⁶Neiki nit rek deida kanpa chrang ava naanki apah Abraham ra, mma ngi deida ungu kanpa cha.”

⁵⁷Ava dilli Jihudia rekki Mhin theda, “Nah kum som parnga ruk thlung mlaiti, ungta Nangva Abraham adee mo?”

⁵⁸Jisu ngi mhin inni theda, “Kindit, kinditti, Neiji ahin thaanni kthea, Abraham du ngi Neia ka am dok ping.”

⁵⁹Ava leiji mmaanni lung chom lamda, Mma kdeengra kurthlong lamda; pdainu Jisua kurdowl dok da, luwbuk Inn thungki duwn thuwk dok da.