Read Lamkang JOHON 9 Bible Online

JOHON 9 - Lamkang bible

JOHON 9

¹Mma ngi hanto mkurlon thungta, mik ktotti kṭou cha miilai khat Jisu ngi deida:

²Ungbi msiikhu rekki Mhin khewl lamda, “Rabbi, hava miilaija mma pnu leimo mnuh mpah pnu mkurthut na mmikka mṭou daatki ktot chda?”

³Jisu ngi arthawngda, “Hava mma mdak mdit mata mnuh mpah pnu ton lei pme, pdainu Isowr nong rek mma thung ngi mdo tpandan nrang lei.

⁴Nei mjuksii Mma nong thung ngi khuw mvaar daat arlaanni nenni tutlot raan, khuw mjiin dok bi, ku khat lee ngi nong tlo pchaang nime.

⁵Neiji dultipaam thu ka am khim khai thu, Neia dultipaamki mar awng ava ping.”

⁶Mma ngi hava mthe chunni, dul leen ptil pthot da, mdo pthot bul ava louda, bul ava mik ktot leen pthowm da,

⁷mhin theda, “Vara Siloam liibum thung ngi aphiit dok.” (mlei ava mdo haisii) Ava leiji mma ngi vada phiit da, ungta khuw kdeiji arvang kinle da.

⁸Mveen rek leh chodu ngi then kṭhil kcha chok miilai ava thide tdit kdei mii rekki the lamda, “Hava miilaija ku ongda then kṭhil kchok ava pmemo?”

⁹Mii angṭhe ngi theda, “Ava mma,” Angṭhe nowlva theda, “Eme, mma kdujik chngaal.” Ungbi mma ngi theda, “Neia mma ping.”

¹⁰Mmaanni mhin the lamda, “Ava mkurthuttu tak heppi amik klengda?”

¹¹Mma ngi arthawngda, “Jisu mdo dit ava ngi bul seemda kmik pbul thida ki hinni theda, ‘Vara Siloam thung ngi aphiit,’ dida ava leiji neiji vanu kphiit thungta, khuw kdo dee chaak.”

¹²Mmaanni mhin theda, “Mma tva thang da?” Mma ngi theda, “Dei maang.”

¹³Mik ktotti kṭou miilai ava mmaanni Pharisi rek hin ṭhi paphaak lamda.

¹⁴Tunva Jisu ngi bul seemda mdo pdamna ava sabath nit.

¹⁵Tak heppi mmava khuw mdo dee tdit Pharisi rekki mhin paukhewl nowl lamda. Ungbi mma ngi mhin inni theda, “Mma ngi kmik leen bul pthowm da ungu neiji kphiit thungta khuw kdo dee chaak.”

¹⁶Pharisi rek mii angṭhe ngi theda, “Hava miilaija Isowr hinki pme, mleija Mma ngi sabath nit danme.” Pdainu angṭhe rekki the lamda, “Tak heppi pnu ktong khat va hava lu titinna rek ktlo rangda?” Mmaan arlakki hanto kinṭhen chowp lamda.

¹⁷Ava leiji mmaanni mik ktot hin the lamda, “Amik ado tipdam pik leiva Mma mlei thu nangva tak heppi athea?” Mma ngi theda, “Mma Khulpu khat.”

¹⁸Mma ava mik ktot miilai ungu khuw mdo dee chaak tditki mlei ava mnuh leh mpah ownda pau mkhewl du in khim khai inni Jihudia rekki rin liit lamme.

¹⁹Ungta mhin inni khewl lamda, “Hava mṭou daat ki ktot kcha ado dit in naan chapa mo? Mik ktot mkurthut tu tunva tak heppi khuw mdo dee da?”

²⁰Mnuh leh mpah ngi mhin inni arthawngda, “Hava neen kchapa, ungu mṭou daatki ktot kcha tdit neenni kdee in;

²¹pdainu tunva tak heppi khuw mdo dee mdit mata ku ngi mmik maplen pik tdit dei chmman ring. Mdak akhewl chaan, mkum kver dok, mdaksaa tumva mma ngi kthe chra.

²²Mnuh leh mpah va Jihudia rek mdo ṭit lei inni hanto mdo theen, mleija Mma ku mii khatti Khrista pi dida kthe thuw ma ambi, mii ava synagog duwn tha tiknen pthii raan kdingi kulrot ndok lamda.

²³Ava ngi mlei kurthuwk da, mnuh leh mpahva ‘Mkum kver dok, mdak akhewl chaan,’ kdingi mdo theen.

²⁴Ava leiji mmaanni mik ktot ava mvei knitna own lamda, ungu mhin the lamda, “Isowr apanpaak cha; hava Miilaija pnu ktong khat tdit neenni kdee in.”

²⁵Mma ngi arthawngda, “Mma pnu ktong khat mo neia dei chmaang; do khat pang lamchi kdee, neia ktot cha ping, tunva khuw kdee chaakka.”

²⁶Mmaanni mhin the lamda, “Mma va tak atpardit da? Tak heppi amikka mdo pdam da?”

²⁷Mma ngi mhin inni arthawngda, “Neiji ado kthe pik dok in, ungu naanva knaa tkiin liit maanti. Talu leiji aryaak nuwm nowl inna?” Mma siikhu kurthuwk nuwm in ptimo?”

²⁸Ungta mmaanni rai chda, mhin the lamda, “Nah Mma siikhu pti, pdainu neenna Mousi siikhu in ping.

²⁹Isowr ri Mousi hin pau mdo the neenni kdee in, pdainu hava Miilai ava tva ki kthleng tdit neenni dei maan ring.”

³⁰Mii ava ngi arthawngda, “Talu leida hava tngana khat kurthuwkka! Mma ava tva ki kthleng tdit naanni dei maan ti, anto daat joso nei kmik rekka Mma ngi mhai plen pik chda.

³¹Isowr va pnu ktong rekka aryaak pikme tdit nenni ndee in, pdainu ku mii khatti Mma luwbuk da, ungu Mma dongei mtlotbi, Isowr ri mhin mdo aryaak pik.

³²Mik ktotti kṭou ku khat lee pre dultipaam mupṭhun daatki ku khat lee ngi mdo plen taryaak liit inpme.

³³Hava Mma Isowr hinki kma mkurthutbi, Mma va do khat lee tlo pchaang nime.”

³⁴Mmaanni mhin arthawngda, “Nah pnu thung ngi kuplup changi kṭou pti, ungta neenna nah do purchu rangki in ping mo? ungta mmaanni duwn tha kneng pthi lamda.

³⁵Mii ava duwn tha mdo knen pthiin Jisu ngi deida, Ungu Mma ngi mphaak khot thungta mhin theda, “Mii Chapa arin chaakka?”

³⁶Mma ngi arthawngda, “Mma ku da? Ocha; ditta neiji Mma kdo rin chaak nra.”

³⁷Jisu ngi mhin theda, “Mma ado dee dok, ungta ahinni kpau slii ava Mma.”

³⁸Mma ngi theda, “Mukpu, neiji krin chaakka.” Ungta mma ngi Mhin luwbuk chda.

³⁹Jisu ngi theda, “Mleija kdei cha kma mii ngi mdo dee chaak nra, ungta kdei mii rekki mdo dee ma nra, dultipaam thung ngi kekṭewl ra Neia kurjung ping.”

⁴⁰Ungta mbe ki Pharisi rek mii angṭhe ngi hava aryaa da, ungbi mmaanni Mhin the lamda, “Neen rukka ktot in pingmo?”

⁴¹Jisu ngi mhin inni theda, “Ktot akurthut tlaang inbi, ado parma ma raanna; pdainu tunva, ‘Kdee in,’ ado dit lei inni ado parma inna ka am tlit daatta.