Read Lamkang DOWLLO 10 Bible Online

DOWLLO 10 - Lamkang bible

DOWLLO 10

¹Kaisaria thung ngi Italia rawlmii berksu mmiing Kornelia mdodit miilai khat amda.

²Mma ava mphungka mkheng tu kilṭhi ngi plung klut ungu Isowr kṭi mii rek hinni chang tlaak ktaakki kpurdon pik, ungta Isowr hin kdet liit kma kṭhil cha miilai khat.

³Kunthunki ṭhang tku arveelli mik kleng khatti Isowr Waan tamsii ngi arjungda mhin theda, “Kornelia!”

⁴Ungta mma ngi suw rimda, ungu kpiir ri theda, “Talu da Mukpu?” Ungbi Mma ngi mhin theda, “Nah doṭhil chaak leh chang tlaak ktaak liitti ado purdon ava Isowr hintha mdo bin phaak nangi kthlung nga.

⁵Ungta tunva Joppa tha Pitor mdodit Simon kṭhira mii asiilam.

⁶Mma ava Simon mdodit saavun kukhok hin kipriik daatta, mi inn na truwn biing ngi ka am.”

⁷Mma hin pau kthe Waan tamsii msun dok thungta, mma sra owr rek miilai knii ungu rawlmii rek arlakki miilai khat ownda,

⁸ungta parseel jik lam thida, Joppa tha mma ngi sii lamda.

⁹Mupduk nii ngi mmaanni hanto kchet slii ngi, khuwpii mnai in mpha thu, Pitor ra ṭhang truk arveelli kṭhil chra inn tun tha hangkal da.

¹⁰Ungu mpoi thamda, ungta do khatta chaa nuwm chda; pdainu mmaanni von mvai slii arlaan ni mik kleng khat ti,

¹¹parwaan kparvangda, dultipaam markil plii thung ngi buwklinpa hep daat mdo arjuk ptlaak mma ngi deida.

¹²Mthung thang ngi msik msik saa mkheng leh muplung ngi kunkhow khauṭit khaujaar ungu kjuwng puwa rek amda.

¹³Ungta mhin krowl khat thlengda, “Kardel, Pitor; a eayoura achaa.”

¹⁴Pdainu Pitor ri theda, “Eme, Mukpu; mleija kbuwr mata kartleu kma do khat lee cha kchok maang.”

¹⁵Ungta krowl ava mvei kniitna ngi mhin thleng nowlda, “Isowr dopartleu dok ava nang ngi kbuwr pi adodit ro nime.”

¹⁶Hava vei kdum chak thung ngi thuwkda, ungta do ava parwaan tha arju ṭen dok tengda.

¹⁷Tunva Pitor ri mik kleng mdodee ava talu mlei da kdingi muplung thu mpurdun slii arlaanni, asuwn, Kornelia dohaisii miirekki Simon inn thlaam lamda, paltong bengi rip daat lamda

¹⁸ungta Pitor mdo dit Simon kipriik mo kdingi ownda khewl lamda.

¹⁹Ungta Pitor ri mik kleng mpurdun slii arlaanni, pthla ngi mhin theda, “Asuw, miilai kdum rekki at thlaamma.

²⁰Ungta kardelra jungṭum, kṭoi nuwm kmalua tloma; mleiija Nei kdosii lam.”

²¹Ungta Pitor ri jung ṭumda, ungu miirek hin theda, “Naan dosut thlaam ma neiping; talu leiji kthleng in ptida?”

²²Ungta mmaanni theda, “Rawlmii rek berksu Kornelia ava rinkindit ungu Isowr kṭi miilai khat, Jihudia chati rek mkheng ngi kunton dokki mpau naan miilai khat, mma inn thang ngi ado kṭhi nraan, ungu nang ngi mhin ado thera ava karyaa chra, kchiir Waan tamsii khat dothe pik dil kṭoiji kthleng kchaan ping.”

²³Ava leiji mmal rek rang ngi mma ngi own chlam da. Mupduk nii ngi mma ngi ripda ungu mdil in ṭoida, ungta Joppa ki mu u mnao rek angṭhe tu kilṭhida.

²⁴Ungta adai nii ngi Kaisaria lut lamda. Kornelia va mphungka kthuwk rek leh mplap rek own purkukda mmaan arngai chlamda.

²⁵Pitor ri mlu thungta, Kornelia va ardada ungta mkhu therri kuwnda mma luwbuk da.

²⁶Pdainu Pitor ri tipripda theda, “Hangrip; nei rukka mii ping.”

²⁷Ungta mma tu pau saamda vanglutda, ungu mii knempok kthuwk kurkuk pha da.

²⁸Ungbi mma ngi mhin inni theda, “Jihudia khat kurthuwk ki ktlok chati tu kurchuwm mdit mata ka amve ava Nowlam mi mdorot ma naan adak kat inni adodee in; pdainu neiji ku mii khat lee ava kbuwr mata kartleu kma kdo dit rang pme dida Isowr ri mtidet chda.

²⁹Ava leiji nei atu own in mpha thu do khat lee kthe pkhaan kma kthleng kcha ping; talu leiji ado to own chaak inda dinu akikhewl chaak inna.”

³⁰Ungta Kornelia ngi theda, “Nii plii dungi ṭhang hava thu neiji ki inn thung ngi ṭhang tku ki kṭhil cha tlonu; ungu asuw, kpowl dang miilai khatti kmaiṭhuwmmi ripda,

³¹theda, ‘Kornelia, ado ṭhil chaakka aryaak pikda, ungu changtlaak ktaakki ado purdon ava Isowr maiṭhuwmmi mbin phaakka.

³²Ava ngi mlei kurthuwkda, Joppa tha Pitor mdo dit Simon hin mii asii; mma truwn biing ngi Simon mdo dit saavun kokhowk inn tha kipriik daatta.’

³³Ava leiji nah hin ku knotti kdo haisii chaak lam kurthuwk, ungu nah awonsat ti ado tithlen pik chaak in kurthuwkka. Ava ngi mlei kurthuwkda tunva, Mukpu ngi nah hin pau mdoreen mkheng karyaa chra, neen kikheng inni Isowr dosut na thung ngi ka am kchaan ping.”

³⁴Ungta Pitor ri mner pvangda ungu theda: “Kinditti, neiji kdea, ditta Isowr va ksanksui tlome.

³⁵Pdainu chati khim khai thung ngi Mma kṭi miirek ungu kindit ktlo Mma ngi mdo rot kurthuwk.

³⁶Mma ngi Isreel hin pauna mdosi ava naanni adee in, (Mma ava mkhengki Mukpu) ditta Jisu Khrista ngi kdaaiki kṭha paumin paryaamda.

³⁷Johon ni baptis ktlo ki paumin mparyaam diltha, Galil ki pṭhunda Judia paam mkheng thu pauna ava paryaamda:

³⁸Nasareth ki Jisua Isowr ri thao pbulda; Mma ngi tlowngda kṭha nong tloda ungu tarnam do owr mii mkheng nga tak heppi mapdam pik, mleija Isowr ri mdo kurthlo ṭhi kurthuwk.

³⁹Ungta neenna Jihudia rek khuwpaam leh Jerusalem thung ngi Mma dotlot mkheng avaki sakhi in ping. Mma ava dingleen pthoi lamda mmaanni eayou lamda.

⁴⁰Pdainu mnii kdumna nitti Isowr ri pring pinleda pandang da,

⁴¹Mii mkheng hin pme pdainu Isowr do kchol dok neenni sakhi kdo hur pik in, Mma ngi kdiyou thungki mrin kinlet diltha, mdo chaak mdo neek ṭhi neen kihin kurthuwk.

⁴²Ungta mii rek hinni paumin kparyaamra, ungu ksing leh kdiyou kekṭewl ra, Isowr dopurthuw dok ava sakhi kpiira neen kihin pau mreen pik inda.

⁴³Mma hinni khulpu rek mkheng ngi sakhi piida, ditta Mma krin kcha mii pum ktaija Mma miing ngi pnu rek kuptlot pik marlaan chaak inna.”

⁴⁴Pitor ri hava mthe slii arlaanni, pthla kchiir ava mii mkheng tunni arjungda.

⁴⁵Ungta Pitor doṭhi krin cha miirek vunmor kreen rekka ngak chlamda, mleija ktlok chati rek tun rukva pthla kchiir ki chla ava ptlon pikda.

⁴⁶Mleija mmaanni msik msik pauvi pau lamda ungu Isowr mdo panpaak chaak in aryaa lamda. Ava dilli Pitor ri thethuwda,

⁴⁷“Nentu kinṭimmi pthla kchiir karlaang cha mmaan ni baptis mdolo chaak nraan dii kthlot ku mii khat ka am ngaal in pti mo?”

⁴⁸Ungta Jisu Khrista miing ngi baptis mdotlot nraan mma ngi pau pṭumda. Ava dilli mma ngi mado kcheen ṭhi bong nrangki ktham chlamda.