Read Lamkang DOWLLO 11 Bible Online

DOWLLO 11 - Lamkang bible

DOWLLO 11

¹Tunva ktlok chati rek rukva Isowr pauna marlaan chaak inna tdit kenyee rek leh Judia tha ka am mu u mnao rekki aryaada.

²Ava leiji Pitor ri Jerusalem tha mhan thungta vunmor kreen lop rekki mkho the chlamda,

³the lamda, “Talu leiji vunmor kreen kma rek hin chetti then ado maal ṭhi lamda?”

⁴Pdainu Pitor ri parnaak jikda mhin inni kpau pṭhunda:

⁵“Neiji Joppa khuwpii thung ngi ṭhil chnu; ungta mik kleng khatti deinu, buwklinpa dum khat hepdaat, parwaanki markil plii thung ngi arjung ṭumda, ungu nei kihin arjung kṭum do khat deinu.

⁶Knai tekki neiji suw rimnu plung kpurdun slii thungta, saarek, downkhaal rek, plung ngi kundowt khauṭit khaujaar, kjuwng puwa rek deinu.

⁷Ungta, ‘Kardel Pitor; a eayoura achaa,’ dida kihin kthe krowl khat neiji aryaanu.

⁸Pdainu neiji thenu, ‘Eme, Mukpu; mleija kbuwr mata kartleu kma do khat lee kner thung ngi junglut mlai.’

⁹Pdainu parwaanki krowl ava ngi mvei knit nangi kihin arthawngda, ‘Isowr do partleu dok ava nang ngi kbuwr pi ado dit ronime.’

¹⁰Hava vei kdum chak thung ngi thuwkda, ungu mkheng ngi parwaan tha arjuk ṭen dok nowlda.

¹¹Mpha ava kat thung ngi nei kihin mdosii Kaisaria ki miilai kdummi neen ka am ndaat in inn ava thlung lamda.

¹²Ungta kipjiir kma ngi mmaan kdo vanṭoi lam nra pthla ngi kihin theda. Ungta ku u knao rek hava miilai truk rukva mhai kurthlo ṭhi chlamda, ungta neenni mii ava inn thung ngi lut innu.

¹³Ungta mma ngi tak heppi mdee tdit ki pau songda, mleija Waan tamsii ngi inn thung ripda theda, Joppa tha mii haisira Pitor mdodit Simon arvan ṭhi;

¹⁴mma ngi nang ruk ungta aphungka mkheng ngi kartlen kcha ado phaak nraan paumin khat akparyaam pik chraan.’

¹⁵Neiji kpau kupṭhun thungta, nen ntuwn ni chodu chodilli kurjung ava lulu ngi pthla kchiir mleen thaanni arjungda.

¹⁶Ungta, ‘Johon va diitu kilṭhi ngi baptis aptlot inda, pdainu naanna pthla kchiir ri baptis akuptlot raan,’ dida Mukpu ngi tak heppi mthe tdit pauna neiji bin phaak chnu.

¹⁷Ava mkurthutbi Mukpu Jisu krin changi Isowr va mmaan hin ruk nen nhin ruk kinṭim chakki chla ava mitpiik inbi, neia ku kurthuwk nu Isowr ava mat nikda?”

¹⁸Mmaanni hava maryaak in thungta rim kdi am chlamda. Ungta Isowr panpaak lamda the lamda, “Ktlok chati rek hin rukva rinkhu mdo phaak chaak nraan Isowr ri rot pikda.”

¹⁹Tunva Stiphan leenni kja kakham mthuw leiji kinṭheu tir kcharek ava ngi ku khat lee hin kma Jihudia rek hin daatti pauna ava Phonesia, ungta Kupras, ungu Antia kpha dekki lamkla ngi chet lamda the lamda.

²⁰Pdainu mmaan arlakki mii angṭhe Antia tha kthleng Kupras leh Kurini mii rek rukva Grik mii rek hinni Mukpu Jisu paryaam lamda.

²¹Ungta Mukpu khutti kurthlo ṭhi lamda, ungu mii msing knempokki plung pinle da Mukpu hin rin chda.

²²Hava pauren ava Jerusalem ki rinlop knaa thlungda, ungbi mmaanni Antia tha Barnabas sii lamda.

²³Mma ngi arvangda Isowr plungnee mdee thungta, mma kanpa chda; mmaan mkheng ngi plung knetti Mukpu hin mdo rin chaak nraan, ksop lamda.

²⁴Mleija mma kṭha miilai khat, pthla kchiir leh krin changi dim chda. Ungta lop klin langlang ngi Mukpu hin tpom chlamda.

²⁵Ava leiji Barnabas ava Soul ksuwra Tarsas tha vangda.

²⁶Ungu mma ngi mkurdut ṭhi thungta Antia tha arvan ṭhida. Mleija mmaanni kum khat lik thung ngi rinlop kurthlo ṭhi lamda, ungu lop klinpa hin purchuk lamda; ungta Antia thung ngi siikhu rek ava rukri verki khristen di lamda.

²⁷Tunva hava nit rek thung ngi Jerusalem ki khulpu rekka Antia tha arjung lamda.

²⁸Ungta mmaan thungki khat mmiing Agabas ava ngi ripda, ungu dultipaam mkheng thung ngi poitham klin langlang kthuwkra dida pthla ngi theda; ungu hava Kloudia mpha thu kurthuwk.

²⁹Ungta Judia thung ngi ka am mu u mnao rek hinni mii pum ktaiji mma mma dopchaan ni mdo purdon pik chaak nra, siikhu rekki pau rip lamda.

³⁰Ungta mmaanni anto tlo lamda, Barnabas leh Soul khut thung ngi kver rek sii lamda.