Read Lamkang DOWLLO 12 Bible Online

DOWLLO 12 - Lamkang bible

DOWLLO 12

¹Mpha ava thung ngi kruwng Herod ti Rinlop thung ki mii angṭhe hin kja kakhamki khut khiingda.

²Mma ngi Johon upa Jeems ava kaang ksaang ngi eayouda.

³Ungta Jihudia rek plung ngam mma ngi mdee thungta, Pitor ruk mdo kjown nraan mma ngi tloda. Hava ava thowl ktaak thenpen kmaal nit rek mpha thung ki.

⁴Ungu mma ngi mukjown thungta, rownginn thung ngi khumda, ungu mmun plii thung ngi rawlmii plii lii pruwnda, taplaanna diltha miirek hin pthuwk nuwmda.

⁵Ava leiji Pitor ra rownginn thung ngi khumda, pdainu rinlop va mma tummi Isowr hin plung klutti ṭhil chda.

⁶Herod ti mdo pthuw nuwm na ava nit jaan katti, Pitor ra rawlmii knii arlakki thiir ri knii dobowlli iip daatda, ungu kseel rekki rownginn thurngot bengi rung lamda;

⁷ungta asuwn, Mukpu Waan tamsii ngi mhin ktardetda, ungu mthung ngi mar awng khat lengda; ungta Pitor ra mturnguk tha tpeengtik da ungu pardelda, theda, “Kbeiji kardel dok.” Ungta mkhut leenki thiir ri rekka detda tla chda.

⁸Ungta Waan tamsii ngi mhin theda, “Adona leh akhukok rek anaa.” Ungta mma ngi anto tloda. Ungu Mma ngi mhin theda, “Abuw ahiilra kdil aṭoi.”

⁹Ungbi mma ngi duwn thuwkda mdil ṭoida; Waan tamsii dotlot ava mlangkat tdit mma ngi deime, pdainu mik kleng dei chpaknu kdingi mmava binda.

¹⁰Ungta mmaanni rukri verki leh miknitna thurngot kseel kheel dok lamda, khuwpii sekthleng ring thiir paltong mphaak in thungta, paltong nga mmaan tummi mthina ngi kparvangda, ungta mmaanni lam khat ṭoi lamda, ungu tunkat daatti Waan tamsii va ma pthiida.

¹¹Ungta Pitor mdaksaa ngi dei chda theda, “Tunva kindit chelli kdee chaakka, ditta Mukpu ngi Waan tamsii msii pikda, Mma ngi Herod khut thungki ungu Jihudia miirek plungbin thungki mtiṭenthuw chaakka.”

¹²Mma ngi hava mdee dokle, mii knempokki thuwk kurkukda mdo ṭhil sliina, mmiing msik khat Mak mdo dit Johon ava nuh Mery inn tha vangda.

¹³Ungu mma ngi paltong thurngot mprei thungta, mmiing Rhoda mdodit sra owr khat ava ngi karthawngra arvada.

¹⁴Pitor krowl maryaak thungta mkanpat chaak reenni paltong kapvan pik kma, paltong bengi Pitor krip daatta dida vangchen da songda

¹⁵Mmaanni mhin theda, “Nah mong kukto kchaamti.” Pdainu mmava klang katpi dida mhin inni theda, “Ava mma Waantamsii ngaal!”

¹⁶Pdainu Pitor va prei thlit daatda; ungu mmaanni mapvan thungta mma dei lamda ungta ngak chlamda.

¹⁷Pdaiinu rim kdi ma am nraan mkhutti partamda. Tak heppi Mukpu ngi rownginn thungki mthuwṭhi tdit mhin inni song chda. Ungta mma ngi theda, “Hava Jeems leh mu u mnao rek hin ason pik chaan.” Ava dilli mma ngi kurlouda mmun ktlok tha sunda.

¹⁸Tunva khuw mvar thungta, Pitor hin tak kthuwk kdingi rawlmii rek arlakki kut, lur ri vawnglum khat amda.

¹⁹Ungta mma Herod ti thlaamda mphaak ma thungta, kseel rekka parsinna thida mdo eayo nraan pau pṭumda. Ava dilli mma ngi Judia ki Kaisaria tha jungda, ungu ava tha kcheengda.

²⁰Tunva Herod va Tyr leh Sidon mii rek hin plung pthitda; ungbi mmaanni plung khdaat ti mhin thleng lamda, kruwng amna thungki vaiklou Blastas archil lamda, kdaai rangki tummi ktham chlamda, mleija mpaam in ava kruwng paam ava ngi then purdon pik chlamda.

²¹Herod ta mdo palreen naan nit katti, kruwng dona ngi kirsimda, mko onna leen ko ongda, mii rek hin paryaam da.

²²Ungta mii rekva owng lamda, “Isowr khat krowl ungu miilai krowl ava pme!”

²³Ungu tun kat daatti Mukpu Waan tamsii ngi eayouda, mleija mma ngi Isowr punlor me; ungu mma ava pdenni chaada ungta diyou da.

²⁴Pdainu Isowr pau ava linda ungu kurjouda.

²⁵Ungta Barnabas leh Soul la mnong tlot in mkurkhum dok thungta, mmiing Mak mdodit Johon ṭhi lamda Jerusalem tha mdil kinle lamda.