Read Lamkang DOWLLO 13 Bible Online

DOWLLO 13 - Lamkang bible

DOWLLO 13

¹Tunva Antia ki rinlop thungki khulpu rek ungta chukpu rek, Barnabas, Niger mdodit Simeon, Kurini ki Lusias, paamkpu Herod dojuw chaak Manaen, ungu Soul am lamda.

²Mmaanni then ngowl lamda Mukpu luw mbuk slii arlaan inni, Pthla Kchiir ri theda, “Barnabas leh Soul la Nei knong tummi kdo own lam, Nei ktumra mhai pankai pik in.”

³Ava dilli mmaanni then ngowl lamda mṭhil chaak in diltha, mleen thaanni mkhut in khiin pik lam thida sii lamda.

⁴Ava lei Pthla kchiir dosii ngi, mmaanni Silusia tha jung lamda; ava thungki Kupras tha vang lamda.

⁵Mmaanni Salamis mthlun in thungta, Jihudia rek synagog thung ngi Isowr pauna paryaam lamda. Ungta mmaan kukthowra Johon ṭhi lamda.

⁶Mmaanni prahpaam mkheng klaan lamda Paphos thlung lamda, Jihudia mii kurthuwk, mmiing Barjisu mdodit doi kṭhakma ktlo kinditkma khulpu miilai khat pha khot lamda.

⁷Mma ngi prahpaam ava kpupa ksing langlang miilai Sergias Poulas ava tu kilṭhida, mma ngi Barnabas leh Soul ownda, Isowr pauna aryaa nuwm chda.

⁸Pdainu doi kṭha kma ktlo Eluma ngi (mma miing mdothe na) ripkhaan lamda, prahpaam kpupa ngi mdo rin chaak thungki mdil mkinlet nra mlam thlaamda.

⁹Pdainu Pthla kchiir ri kdim Poul mdodit Soul li, mma suw rimda

¹⁰ungu theda, “Rinkindit rek mkheng kipteng, pleiknei leh kuhuwng cha mkheng ngi kdim, dijabowl chapa nang, Mukpu lam kirjii deek ado punkoi slii thungki down nipti mo?

¹¹Ungta tunva asuw, Mukpu khut aleenni ka amma, ungta mpha mruk tummi amik tot donle kniw dei nimti.” Tun kat daatti mmik totda pum jiing kjiing ngi mkhut tha kṭhi pikra mii thlaamda.

¹²Ava dilli prahpaam kpupa ngi kthuwk nong ava mdee thungta rin chda, mleija Mukpu mlei thung ngi mdo purchu inni mma ngak chda.

¹³Tunva Poul leh mmiiṭhi rekka Paphos thungki Pamphylia ki Perga tha arvang lamda. Ungta Johon ni ma lamthida Jerusalem tha mdil kinle da;

¹⁴pdainu Perga thungki mmaanni Antia ki Pisidia thlung lamda. Ungta sabath nitti mmaanni synagog thung ngi lut lamda ku ong lamda.

¹⁵Nowlam leh khulpu rek laaika mpat dok inle, synagog ki paamkpu rekki mhin inni siilamda, the lamda, “Ku u knao rek mii rek hin ado kso naanki pauna athloi inta, atheen.”

¹⁶Ava leiji Poul li ripda mkhut haida theda: “Isreel mii rek, ungu Isowr kṭi rek aryaan.

¹⁷Isreel mii rek Isowr hava ngi nen npahle kcholda, ungta Egypt paam thung ngi ma am in mpha thung mii rekka plin psaangda, ungu ava thungki Mma ngi mbaanbul khiingda ṭhi pthuwk lamda.

¹⁸Ungta kum somplii arveel kpha thung kbowklaiji Mma ngi diilṭhi lamda.

¹⁹Ungta Mma ngi Kenan paam thungki chati rek tikheu eakrep thida, mpaam in ava mmaan do ngi pur owlda, kum arjaa plii som parnga kpha thung mhin inni piida.

²⁰Ungta ava diltha Mma ngi khulpu Samuel kpha thung, kekṭewl rek mhin inni piida.

²¹Ava dilli mmaanni kruwng khat ṭhil lamda; kum som plii tumra, Benjamin sumkhur thungki miilai khat, Kish chapa Soul Isowr ri pii lamda.

²²Ungta Mma ngi kneng pthii thida, kruwngra Devid pii lamda; mma hin Mma ngi sakhi piida theda, ‘Nei kuplungril dil kṭoira miilai, Jessi chapa Devid, Neiji kphaak chaakka, mma ngi Nei kdo ngei mkheng ktlora.

²³Hava miilai charuwl thungki Isowr ri Isreel mii rek kaktlan pik rangki, mpaureel dok Jisu pṭouda.

²⁴Mma murjun dungi plungren hurda baptis ktlo ava Isreel miirek mkheng hin Johon ni paryaamda.

²⁵Ungta Johon ni mnongtlot mupṭut tiingtiing le, mma ngi theda, “Neia ku pi atidit inna? Neia Mma pmaang. Eme, pdainu nei kdil ṭoida karvang Miilai Khat ava mkhukok ri daat rapklua kparthle pikra neia kurhui chmaang.’

²⁶“Ku u knaorek, Abraham phungka chaparek, ungta naan arlakki Isowr kṭirek, nen nhinni hava tkirliinna paumin ava mdosii.

²⁷Mleija Jerusalem thung ka amrek, ungta mmaanki paamkpurek, ava ngi sabath nit ktai thung ngi mdopat in khulpurek ner dothe dok ava deipandi mda, mata mdotin ma lei inni, Mma mraal pii lamda hava lea kurkhum.

²⁸Mmaanni mdo aeyo nraanki mlei do khat lee pha lam mjoso, mmaanni mdo eayo nraanki Pilat hin ṭhil lamda.

²⁹Ungta Mma mlei thung ngi mdo kjit dokrek mkheng mpurkhum dok inle, ding leenki mmaanni hanpṭum lamda thlaan khat thung ngi alruwl lamda.

³⁰Pdainu Isowr ri kdiyou thungki pring pinleda;

³¹Ungta Galil kingi Jerusalem tha kahang Mma tu kilṭhi miirek hin ktardetda, tuntunni mmaanni miirek hin sakhi kpii lam.

³²Ungu npahle hin Isowr paureel dok kṭha paumin ava neenni akuhur pik inna.

³³Hava Jisu mdo prin pinletti mnaoleen ava nen nhin purkhum da; laa miknitna thung rukva kjitda, ‘Nah Nei Kchapa pti, sniingi akupluk chaakka.’

³⁴Ungta kdiyou thungki mdo prin pinlet kat ava ngi kṭop ktobor thung ngi mkinlet kurnowl ma nra, hava ktongtha Mma ngi theda, ‘Neiji Devid ki mkindit kat Kchiir phowl kṭha apii nikaandi.’

³⁵Ava ngi mlei kurthuwkda laa murson thung rukva Mma ngi theda, Nangki Kchiir Khat ava kṭop ktobor tipdee nimti.’

³⁶Mleija Devid ti mma mdak kat charuwl thung ngi Isowr ki karseel lop ava sok mlodok diltha, diyouda, ungu mpahle thlaan thung ngi alruwl lamda, ungta kṭop ktobor ava deida.

³⁷Pdainu Isowr do prin pinlet Mma va kṭop ktobor deime.

³⁸Ava ngi mlei kurthuwkda, ku u knaorek, naanni hava adei in, ditta hava Miilaiji mlei kurthuwkda, naan hinni pnurek kuptlot pik ava kdo paryaam chaak in.

³⁹Ungta Mousi Nowlam mii kintek mdo phaak chaak maan ava khim khai thungki krin cha miipum ktaiji kintek mphaak chaakka.

⁴⁰Ava ngi mlei kurthuwkda, khulpu rek dothe aleen thaanni mthlun ma nra, tuk kursut chaan; ava thu hanto theda:

⁴¹‘Asuwn, ning ku uikma rek, ungta ngak in ungu mawng chaan; mleija naan mpha thu Neiji nong khat tlonu, naan hinki nong ava ku mii khatti mthe thut chaakbi, naanni rin chni maanti!’ ”

⁴²Mmaanni duwn mthuw slii arlaanni hava lea mvei knit naki sabath nitti mhin inni mdosaam pik nlamra mhin inni ktham ki kurkuk mkui in thungta, Jihudiarek leh Jihudia dhormo thung ngi plung klut mii knempokki Poul leh Barnabas dil ṭoi lamda, mmaan hin parseel lamda, Isowr wonsat thung ngi kdet liit kma ma am nraan parseel chlamda.

⁴³

⁴⁴Mupduk niiva Isowr pauna karyaa ra khuwpii thungki mii mkheng thuwk kurkuk lamda.

⁴⁵Pdainu Jihudiarek ki miiluwngpa mdee in thungta, kheithe ngi dim chlamda, ungu Poul pauthe leek psuk lamda ungu ning er pauvi the psuk lamda.

⁴⁶Poul leh Barnabas ava ngi plung ktangar pauvi the lamda, “Rukri verri Isowr pauna ava naan hin katti tsaamra. Naanni naan thungki kṭuw knai kmaki rinkhu kpha chrang nga kurhui maanring diinti ado kṭewl lei inni, asuwn, ktlok chatirek hin kinle kchaan ping.

⁴⁷Mleija Mukpu ngi neen kihin hanto pau mreen pik inda, theda, ‘Dultipaam mdonna dek thung ngi kirliing mdo phaak chaak nraan, ktlok chatirek tummi mar awng khat akpurthuw inna.’ ”

⁴⁸Ktlok chatirek ki hava maryaak in thungta, kdung kanpa chlamda, ungu Isowr pauna punlor lamda, kṭuw knai kmaki rinkhu krin cha thung, mii knempok kchol khiin lamda.

⁴⁹Ungta Mukpu pauna ava paamkowl mkheng thung ngi kurjouda.

⁵⁰Pdainu takjat kirvei snurek ungta khuwpii thungki pselpa kinreel rek, Jihudia rekki ksop lamda kdung kut, lur ri Poul leh Barnabas tun kja kakham pii lamda, mpaamkowl in thungki reipthii lamda.

⁵¹Pdainu mmaanni mmaanki mraal kpiingi mkhuwn tunki khu arbaat, kṭho pthii lamda, ungu Ikoniam tha vang lamda.

⁵²Ungta siikhu rekka pthla kchiir kdimmi kanpa chlamda.