Read Lamkang DOWLLO 14 Bible Online

DOWLLO 14 - Lamkang bible

DOWLLO 14

¹Tunva Ikoniam thungki Jihudia rek synagog thung ngi lutve lamda, mpau lei inni mii knempok mikniing Jihudiarek leh Grik rekki rin chlamda.

²Pdainu krin kma Jihudia rekki ktlok chatirek plung thung ngi mu u mnao in mraal mdo piik nraan kruw daal lamda.

³Ava leiji mpha roi ksotti kcheeng lamda, Mukpu tummi plung ktangar ri pau lamda, Mma wonsatki pauna sakhi pii lamda, mkhut inni titinna rek leh tngana rek tlo lamda.

⁴Pdainu khuwpii ava thungki miirek ava kinṭhen lamda; mii angṭhe ngi Jihudia rek ungu mii angṭhe ngi kenyee rek ktongtha am lamda.

⁵Ktlok chati rek leh Jihudia rek mikniing ava ngi paamkpu rek tu kilṭhi ngi ningkja pii lamda, lung ngi kdeeng rangki mkurthlon in thungta,

⁶mmaanni dei lamda ungbi Lykonia khuwpii leh Lystra ungu Derbe tha ungu marveelki khuwpaam tha kunthot lamda;

⁷ungta ava tha kṭha paumin paryaam lamda.

⁸Tunva Lystra thu mkhu ksinton kma miilai khat ku ong daat da; mma kchet pchaang liit kma kseekki ṭou chda.

⁹Mma ngi Poul pausaam knaa tkiin rimda, ungbi Poul li mma suw rimda, ungu mdo rin chaakki kdam ra mdee thungta,

¹⁰krowl kparyaa khatti theda, “Akhu arjiira rip.” Ungbi mma ngi kunthowm da chetda.

¹¹Ungta kurtuwl miirekki Poul nongtlot mdee in thungta Lykonia pauvi “Miilai kdujik mukpu rek nen narlak inni kurjung nga!” dilamda krowl kparthaang ngi the lamda.

¹²Mmaanni Barnabas ava Yias di lamda, ungta Poul la kinreel li mpau leiji Hermes kdingi own lamda.

¹³Ungta khuwpii maiṭhuwm ki Yias luwbuk inn thungki thiimpu ngi silrek leh reipṭhi ava paltong thung ngi arhai sinda ungta miirek tu kilṭhi ngi tlaaidown nuwm lamda.

¹⁴Pdainu kenyeerek Barnabas leh Poul li ava maryaak in thungta, mdo mna in jen lamda miiluwngpa arlakki vachen lamda, owng lamda,

¹⁵“Miirek, talu leiji hava atlot inna? neen rukka naan alulu miilai inping, mleija naanni do ksikma rek thungki, parwaan leh dulti ungu truwn leh do mkheng kseem kring Isowr ava hintha akinlet nraan hava kṭha paumin ado kuhur pik in.

¹⁶Alraangki charuwl rek chati rek mkheng va mma mma dongeiji mche chaak in ava mdo rot pik;

¹⁷anto daat joso mdaksaa ava sakhi ktaakki ma pthiime, mleija Mma ngi kṭha tloda parwaanki khuw tipra da ungu chasowm ado arve nraanki mkaal apiinda, aplung inna then leh kanpa ngi kdim kcha.”

¹⁸Hava pauvi mhin inni tlaai kdown rangki ava kparsa langlang ngi neeng lamda.

¹⁹Pdainu ava tha Antia leh Ikoniam ki Jihudia rek thleng lamda, ungu mmaanni miirek ksop lamda, Poul la lung ngi deeng lamda, kdiyou kcha a kdingi khuwpii duwntha ṭen pthuwk lamda.

²⁰Pdainu siikhu rekki muklop dok thungta, mma ngi kardelda khuwpii lutda; ungu mupduk nii ngi Barnabas tu kilṭhida Derbe tha vang lamda.

²¹Mmaanni ava khuwpii thung ngi kṭha paumin paryaam lamda, siikhu knempok seem lam thida, Lystra ungu Ikoniam ungta Antia tha kinle lamda.

²²Siikhu rek plung tipnet pik lamda, krin cha thung ngi mkurnowl thlit daat nraan ksop lamda, ungta suwkthuw knempok ava ngi Isowr Kruwngpaam lut chenaan di kdingi the lamda.

²³Ungta rinlop ktai thung ngi mtum raan kver rek kchol khiin pik lamda, then ngowl lamda mdo ṭhil chaak intu kilṭhi ngi mdo rin chaak in ava Mukpu hin sil nlamda.

²⁴Ava dilli Pisidia arkaan lamda Pamphylia tha arvang lamda.

²⁵Ungta mmaanni Perga thung ngi pau msaam dok inle, Atalia tha jung lamda;

²⁶ava thungki mmaan do purkhum nong ava tummi Isowr wonsatti nong mdo sil naan mun Antia kphara arkuwng leen tuwng lamda.

²⁷Ungta mmaanni mthlun dok in thungta, rinlop own purkuk lamda ungu mmaan tu kilṭhi ngi Isowr nong tlot mkheng ungta tak heppi ktlok chati rek hin thurngot mapvan pik tditki pau song chlamda.

²⁸Ungta mmaanni siikhu rektu kilṭhi ngi mpha roiksotti kcheeng lamda.