Read Lamkang DOWLLO 15 Bible Online

DOWLLO 15 - Lamkang bible

DOWLLO 15

¹Pdainu Judia ki kurjung mii angṭhe ngi, “Mousi nopa dil kṭoiji vunmor areen maanbi, kartlen pchaang nimaanti,” dilamda mu u mnaorek hin purchuk lamda.

²Ungta Poul leh Barnabas ava ngi karteen ṭhi lamda, mkarteen naan hava pau mlei thung ngi Poul leh Barnabas ungta mii angṭhe kchol khiin lamda Jerusalem ki kenyee rek hin hansii lamda.

³Ava leiji rinlop rekki lamtha han arda chlamda, ktlok chati rekki plung ren mdohur in ava son pik lamda Phonesia leh Samaria klaan lamda, ungu mu u mnaorek mkheng hin kanpa plung ngam pii chlamda.

⁴Mmaanni Jerusalem mthlun in thungta, mmaanna rinlop ungu kenyee rek, kver rekki kowl chlamda, ungta mmaan tu kilṭhi ngi Isowr dotlot mkheng song chlamda.

⁵Pdainu Pharisi rek lop thungki krin charek mii angṭhe ngi rip lamda, ungu the lamda, “Vunmor mdo reen kat raan, ungta Mousi Nowlam mdo arkhiik nraan pau tkham ra.”

⁶Hava pau mlei thung ngi mkaryaak nraan kenyee rek leh kver rek thuwk kurkuk lamda.

⁷Ungta mmaanni kdung mkarteen dil thaanni, Pitor ri ripda mhin inni theda, “Ku u knaorek, ktlok chati rekki nei kner thungki kṭha pauminki pauna ava aryaada, mdo rin chaak nraan, Isowr va chodu ngi naan arlakki mdo tukchol ava ado dee in.

⁸Ungta plungril kdei Isowr ri sakhi kurthuwkda, nen nhin mdo tlot heppi, pthla kchiir pii chlamda;

⁹ungta mmaan leh nen narlakki mkirthlei nra tlome, pdaiinu krin changi muplung inna partleuda.

¹⁰Ava ngi mlei kurthuwkda, tunva npah le daat ruk mata nen rukva tuhur pchaan maan bowr krik ava siikhu rek lowl tunni athiik inna, talu leiji Isowr apirsin naanna?

¹¹Pdainu Mukpu Jisu wonsat ti mmaan lulungi nen rukka tkartlen chaak raan kdingi neenni krin chaak inna.”

¹²Ungta kurtuwl mii mkheng nga rim kdi am chda; ungta Barnabas leh Poul li ktlok chati rek arlakki, mmaanve thung ngi titinna rek leh tngana rek Isowr ri mdo tlot mson chaak in thungta aryaa tkiin rim lamda.

¹³Mmaanni pau msaam dok inle, Jeems ava ngi arthawngda, “Ku u knaorek, mhai aryaak pik chaan.

¹⁴Mma miing ngi mmaan thungki miilai khat mdolo nra, tak heppi Isowr va rukri ngi ktlok chati rekka mvel tdit Simeon ni theda.

¹⁵Ava tu kilṭhi ngi khulpu rek do kjit dok pauna ava kulrot nlamda,

¹⁶‘Hava diltha Neiji kinle nikdi, ungu Devid amna mun ktluw kcha ava sa nowl nikdi, kukrop kcha ava Neiji tiprip nikdi,

¹⁷Mkekleem miirek leh Nei kmiing ngi, mdo own ktlok chati rek mkheng ngi, Mukpu mdo thlaam nraan leiji hava lea,

¹⁸alraang Mukpu ngi tidet dok da mdo the dok.’

¹⁹Ava ngi mlei kurthuwkda, Isowr hin kinle ktlok chati rekka nenni owr chmaan che, dinu neiva kekṭewl chaakka.

²⁰Pdainu khut dosak pthla thungki kbuwr, ungta pang turkuiji kturkui ungu kakraak you saa ungta hii hava lim mdo kdaan nraan nenni kjit pik inche.

²¹Mleija alraangki charuwl rek thungki kupṭhunni, khuwpii ktai thung ngi Mousi paryaam lamda, sabath nit ktaiji synagog thu ava pa lamda.”

²²Ava dilli mu u mnaorek arlakki berksu rek, ungta Barsabas mdodit Judas leh Silas mmaan thungki kchol lamda, Poul leh Barnabas tu kilṭhi ngi Antia tha mdosi nraan kenyee rek leh kver rekva rinlop mkheng tu kilṭhi ngi kṭha rangmo kdingi bin chlamda,

²³hanto kjit lamda puhur lamda: “A u anao in kenyee rek leh kver rekki, Antia leh Syria ungu Silisia ki ku u knaorek naan hin tha, akurvui chaak inna.

²⁴Neen kdo parseel maanni neen karlak inki mii angṭhe ngi, aplung in tipja lamda, pauna ava ngi aning in kmulla tdit neenni kdo aryaak lei inni,

²⁵neenni plung khdaat ti, nenki Mukpu Jisu Khrista tummi mrinkhu kvardeen kcha miirek,

²⁶neen kwonsat lo in Barnabas leh Poul tu kilṭhi ngi, miirek kdosi chaak in ava ngi kṭha rangmo kdingi kbin chaak inna.

²⁷Ava ngi mlei kurthuwkda, neenni Judas leh Silas ksii chaak inna, mmaan mdaksaa kat inki nerri anto jikki akthe pik chraan.

²⁸Mleija havale kheelli bowr krik aleen thaanni tithiik ma ngi kṭha ra diinnu pthla kchiir ruk neen rukva kbin chaak inna.

²⁹mleija naanni khut dosak pthla hinki tlaaidown thungki hii thungki ungta kakraak you saa leh pang turkuiji kturkui thungki akdaan chaan. Naan adaksaan thung ngi havale akdaan chaak inbi, kṭha kurthuwkra. Akthaan chaak inna.”

³⁰Ava leiji mmaanna sii dok lamda, mmaanni Antia tha jung lamda; ungta miirek purkuk lam thida, chethi ava parlaan chlamda.

³¹Ungu mmaanni mpat in thungta, mdo kso lei inni kdung kanpa chlamda.

³²Ungta mdaksaan khulpu kurthuwk Judas leh Silas rukva mu u mnao rekka ksop lamda pauna knempokki ruptan pik lamda.

³³Ungta mmaan amṭhi bong lam thida, mu u mnao rekka mmaan ksiirek hin plung kdaaiji sii pinle chlamda.

³⁴Pdainu Silas ava maktaan daatti kṭha rangmo kdingi bin lamda.

³⁵Poul leh Barnabas ava Antia tha ktaang daat lamda, do knempok tu kilṭhi ngi Mukpu pauna purchuk lamda paryaam lamda.

³⁶Ungta mpha mruk diltha Poul li Barnabas hin theda, “Nenni Mukpu pauna tparyaam na khuwpii tha tak heppi ka am lamma kdingi ksuwra nu u nnaorek hin kvelra ndil kinle che.”

³⁷Ungta Barnabas va Mak tdit Johon ṭhi nuwmda.

³⁸Pdainu mmaanna Pamphylia thu ma pthii lamda nong thung ngi mmaan tu kilṭhi kma ava mdo ṭhi raanna ṭha memo kdingi Poul va binda.

³⁹Ungta kdung karteen nlamda, ava leiji khat leh khat kanṭhen lamda; Barnabas va Mak ṭhida Kupras kira arkuwng tuwngda,

⁴⁰pdainu Poul va Silas kcholda, mu u mnaorek ki Mukpu wonsat thu sil nlam thida psun chlamda.

⁴¹Ungta mma ngi rinlop rek ruptan pik lamda ungu Syria leh Silisia klaan lamda.