Read Lamkang DOWLLO 16 Bible Online

DOWLLO 16 - Lamkang bible

DOWLLO 16

¹Ungta mma ngi Derbe leh Lystra tha arvangda. Jihudia snu miilai khat ava chapa mmiing Timothi tdit siikhu khat amda; pdainu mpah ava Grik.

²Mma ava Lystra leh Ikoniam thung ngi mu u mnaorekki kunton dokki mpau naan miilai.

³Poul li Timothi ava ṭhi nuwmda; mmun hava thung ngi Jihudia rek ma am leiji vunmor reen pikda, mleija mpah Grik mii tdit mii mkheng ngi deida.

⁴Khuwpii thu mmaanni mche slii chun inni, Jerusalem ki kenyee rek leh kver rek do kulrotna pau ava mdo dan nraan parlaan lamda.

⁵Ava leiji rinlop rekka krin cha thung ngi ruptan pik lamda, ungta mnii ktaiki mii ava nem set setda.

⁶Ungta Asia thung ngi pauna mdo saam raan pthla kchiir ri mdo mat leiji, mmaanni Phrygia Galatia paamkowl ava klaan lamda.

⁷Ungta mmaanni Mysia raalpha tha marvan in thungta, Bethynia lut nuwm lamda, pdainu Jisu pthla ngi rot pik lam mda;

⁸ava leiji Mysia klaan lamda Troas tha jung lamda.

⁹Ungta jaanni mik kleng ngi Poul hin ktardetda: Masidonia ki miilai khatti ripda mhin ktham chda, “Masidonia tha mhai thlen pikra mhai bom chaan.”

¹⁰Ungta mma ngi mik kleng tdit mdee thungta, mmaan hin kṭha paumin kparyaamra Isowr ri miitu own inna tdit dei innu, kuknotti neenni Masidonia tha ksun rangki thlaam innu.

¹¹Ava ngi mlei kurthuwkda, lam sekthleng ring ngi Samathas pha innu, ungta mupduk nii ngi Nepolis pha innu,

¹²ava thungki ngi Romia khuwveen khat Masidonia paamkowl ki kinreel sii khuwpii Philippia tha arvang innu. Hava khuwpii thung ngi neenni niikhuw kcheeng bong innu;

¹³ungta sabath nitti paltong duwnni kreng biing tha tiṭhil chaak na mun ka am munra kdingi va innu; ungta neenni ku ong innu snu rek kthuwk hin pausaam innu.

¹⁴Ungta khuwpii ki mmiing Lydia mdo dit kning ngi ksen dona vaiklou, Isowr luwkbuk kcha snu miilai khat ava neen mkaryaak pik in thung ngi amda.

¹⁵Ungu mma leh mphungka mkhengtu kilṭhi ngi baptis mlo in thungta, neen kihin mma ngi ktham da, theda, “Neia Mukpu krin kcha miilai khatti atikṭewl pik inta, nei ki inn tha mhai thlen pik inra, ungu am in.” ungta mma ngi kdung marchil chaanda.

¹⁶Neenni kṭhil chra kche slii arlaan inni dil kira kthethuw, pthla kṭha kma doṭhi suwk owr nala khat kurdut ṭhiinnu, ungu mma ktlaa sutti mma kpupa rekka kdung do psit nlamda.

¹⁷Mma ngi Poul leh neen kdil in ṭoida owngda, “Hava lea kirliinna lam kparyaam kparthaang sii ki Isowr sra owr rek lam.”

¹⁸Ungta mma ngi hava mpha ksot thung ngi tloda. Pdainu Poul va plung kpur ri binda ungbi mdil kinle da pthla hin theda, “Jisu Khrista miing ngi neiji pau kakthamma mma thungki arvan thuwk dok.” Ungta ṭhang ava kat thung ngi arvan thuwk dokda.

¹⁹Pdainu mma kpupa rekki mlam rin chaak in ava ksun dok mdee in thungta, mmaanni Poul leh Silas ava kjowng lamda, mii amna bajaar thung leh paam kpurek maiṭhuwmmi ṭhi lamda;

²⁰mmaanni kekṭewl rek hin ṭhi lamda the lamda, “Hava lea Jihudia mii rek lam ungu mmaanni nkhuwpii inna vawng muplum inna.

²¹Romia mii nnenni karlaang kcha mata kupṭoi thung ngi Nowlam kleek nopa mmaanva mpurchu inna.”

²²Miiluwngpa ngi kurdutda mraal pii lamda, ungta kekṭewl rekva mdo mna in suwt pthii lamda, kchung ngi mdo bun nraan pau pṭum lamda.

²³Mmaanni bun dip ardip lamthida, rownginn thung ngi khum lamda; kuhuiji mdo arkhiik nraan kseelrek hin paukham lamda.

²⁴Mma ngi hava paukham arlaangda, rownginn korchip thung relli khum lamda ungu mkhuwnna dingthum bowl psuk mer lamda.

²⁵Pdainu thanṭim arveelli Poul leh Silas va Isowr laa the lamda ṭhil chlamda, ungu rownginn thu ka am rekva knaa tkiin lamda,

²⁶ungta tun kat daatti ringnaang kdung ngi thuwkda, ava leiji rownginn kcho tnokda; ungu thurngot rek mkheng kparvang teng chda, ungu mdobowl miipum ktaija karthlet tir chda.

²⁷Kseel miilai ava ngi kardelda rownginn thurngot kparvang mdee thungta, mdo khum rekka chen chpakda kdingi, mkaangksaang turthuwda mthina kurthun you rangki karsimda.

²⁸Pdainu Poul li krowl kparyaa ngi owngda, “Athina ngi kirlimma, mleija kikheng inni hava thu ka am daat in ping.”

²⁹Mma ngi meila ṭhilda kjaang ngi mvanlu thungta, mkunchun leh mṭitti Poul leh Silas maiṭhuwmmi tluwda,

³⁰Ungta duwn pthuwk lam thida theda, “Miirek, nei mdo taktlan nra tak tlo nikda?”

³¹Ungta mmaanni theda, “Mukpu Jisu arin cha, ungu nang leh aphungka mkheng nga kaktlan pikra.”

³²Ungta mma leh mi inn thungki ka am mii mkheng hin mmaanni Mukpu pauna saam pik lamda.

³³Ungta ava jaanki ṭhang kat thung ngi, mma ngi ṭhi lamda, klim kbii alṭhut pik chlamda, ungu mpha ava kat thung ngi mma mdak leh mphungka mkheng nga baptis ptlot lamda.

³⁴Ava dilli mma ngi mi inn tha hunṭhi lamda; ungta then down pik lamda, Isowr mdo rin chaak inni mma ngi mphungka mkheng tu kilṭhi ngi kanpa chda.

³⁵Pdainu khuw mvar thungta, kekṭewl rekva pulis siida, the lamda, “Miirekka sun chlamso.”

³⁶Kseel ava ngi pauna ava Poul hinni songda, theda, “Kekṭewl rekki asun chaak nraan mii msia; ava leiji, tunva arvan thuwk inra kdaaiji sun chaan.”

³⁷Pdainu Poul li mhin inni theda, “Kekṭewl liit kma Romia mii neen ava miirek dodee ngi kandang ngi mbun in thida, rownginn thu mkhum inda, ungu tunva tuprutti mkupthuwk raanmo? Ronime! Mmaan mdaksaa kat inni arva lam sora mhai pthuwk inso.”

³⁸Hava pauna rek ava pulis rekki kekṭewl rek hin song lamda, mmaan rukka Romia miirek lam tdit maryaak in thungta ṭi chlamda;

³⁹ava leiji mmaannii arva lamda ktham chlamda. Ungta mmaanni ṭhi pthuwk lamda, khuwpii mdo maak nraan ktham chlamda.

⁴⁰Ava leiji mmaanni rownginn thungki thuwk lamda Lydia vel lamda; ungu mmaanni mu u mnaorek mdee in thungta, ksop lam thida sun chlamda.