Read Lamkang DOWLLO 18 Bible Online

DOWLLO 18 - Lamkang bible

DOWLLO 18

¹Hava diltha mma ngi Athenia ma thida Korinthia tha vangda.

²Ungta mma ngi Pontas ki mmiing Akuila mdodit Jihudia miilai khat kurdut ṭhida, mma ava mnumei Prisila tu Italy ki kukto ngi arvangda, mleija Jihudia mii mkheng ngi Romia mdo maak nlamra Kloudia ngi pau pṭumda. Ungta mmaan ksuw vada;

³ungu mnong tlot in mkurdut jik leiji amṭhi lamda, nong kmei lamda, mleija buwinn ksarek lam.

⁴Ungta sabath nit ktaiji synagog thung ngi karteen lamda, ungu Jihudia rek leh Grik rekki plungren mdohur nraan tloda.

⁵Silas leh Timothi ngi Masidonia ki mthlun in thungta, Jisua Khrista ava pi dida Poul va Jihudia miirek hin sakhi piida kparyaam thung ngi muplung plutda.

⁶Mmaanni ro mda mrai chaak in thungta, mma ngi mbuw kṭhik thida mhin inni theda, “Aluw tun inni ahii in am chaso! Neia parmak maang. Tunii ki kupṭhunni ktlok chati rek hin chet chnikdi.”

⁷Ungta mma ngi mun ava mathida, mmiing Titia Jastas mdodit Isowr luwkbuk miilai khat ava inn tha vangda, mma inn na synagog tnel tekda.

⁸Synagog paamkpu Krispas, ava ngi mphungka mkheng tu kilṭhi ngi, Mukpu rin chda; ungta Poul hinni knaa ktikiin Korinthia mii knempokki rin chda ungu baptis ruk lou lamda.

⁹Ungta Mukpu ngi jaankhat ti Poul hinni mik kleng ngi theda, “ṭi ma, pdainu pau asaam, rim kdi amma;

¹⁰mleija Neiji akṭhi daatta, ungu ku mii khat lee ngi nah aplim nime; mleija hava khuwpii thung ngi mii knempok kdo thloi.”

¹¹Ungta mma ngi kum khat thla truk marlak inni amda Isowr pauna purchukda.

¹²Pdainu Gallio ngi Akhaija paam kpu mkurthut thungta, Jihudia rekki plung kinṭimmi Poul kjowng lamda, kekṭewl maiṭhuwm mi arvanṭhi lamda,

¹³the lamda, “Hava miilaiji Nowlam parthleng jek arjekda miirekki Isowr luw mdobuk nra marchilla.”

¹⁴Pdainu Poul li mta atdut arlaanni Gallio ngi Jihudia rek hin theda, “Mdo parma mata kṭha kma mdo tlot ma ambi, neiji ado kdiil ṭhi nraanki mlei ka amra, O Jihudiarek;

¹⁵pdainu pauna rek ungta miingrek ungu naan adaksaa kat inki Nowlam mlei thu ado khewl in mkurthut leiji, naan adaksaan ni asuw chaan, havale tunni kṭewl nuwm maang.”

¹⁶Ungta mma ngi kekṭewl mun thungki rei pthii lamda.

¹⁷Ungta mmaan mkheng ngi synagog paamkpu Sosthenis kjowng lamda, ungu kekṭewl mun maiṭhuwm mi bun lamda. Pdainu Gallio va ning pu uilamme.

¹⁸Ava diltha Poul li niikhu ksaang betti kcheeng thida, mu u mnaorek mada, Prisila leh Akuila ṭhida, Syria kira arkuwng tunni tuwng lamda. Mpaureel dok leiji Kenkhria thu mluw ngeuda.

¹⁹Ungta mmaanni Ephisia tha arvang lamda, ava thu mmaanna ma lamda; pdainu mma mdaksaa ava synagog thung ngi lutda, Jihudia rek karteen ṭhida.

²⁰Mmaanni mpha roi ksot bong ngi mdo amṭhi nlamra maktham chaak in thungta mat da;

²¹pdainu mmaan hinki ksunni theda, “Isowr dongei mkurthutbi, naan hin kdil kinle nikdi,” Ungta mma ngi Ephisia ki arkuwng tun ni tuwngda.

²²Mma ngi Kaisaria mthlun thungta, rinlop tha hangda arvui chlamda, ungu Antia tha jungda.

²³Mpha mruk ma am diltha, mma ngi Galatia leh Phrygia paamkowl mun ktai thu tlowngda siikhu rek ruptan pik chda.

²⁴Tunva Alekjandria ki mii mmiing Apollo mdodit Jihudia miilai khat Ephisia tha arvangda. Mma ava mner kjaang laaika maalam kdei kurthuwkda.

²⁵Mma ava Mukpu lam kurchuk dok ksa; ungta kdung plung klutti Jisu mlei thung ngi purchukda, anto daat joso Johon baptis tlot hehe daat deida.

²⁶Mma ngi synagog thu plung ktangar ri kpau pṭhunda; pdainu Prisila leh Akuila ngi maryaak in thungta, Isowr lamma kheel betti karmang betti the pjiir pik lamda.

²⁷Mma ngi Akhaja mphaak nuwm thungta, mu u mnaorek ki ksop chlamda, ungu siikhu rekki mdo kowl chaak nlamra kjit lamda. Mma ngi mthlun thungta plungnee krin cha rekka kdung ngi bom chlamda,

²⁸mleija Jisu ava Khrista dida mma ngi laaika rek tdetda, miirek dodee ngi Jihudia rekka kapchaiji pngam dok lamda.