Read Lamkang DOWLLO 19 Bible Online

DOWLLO 19 - Lamkang bible

DOWLLO 19

¹Apollo ngi Korinthia thung ngi ma am daat arlaanni Poul va tun ktongki khuwpaam klaanda Ephisia tha arjungda. Ava thung ngi siikhu rek angṭhe pha lamda.

²Ungta mma ngi mhin inni theda, “Naanni arin chaak in thungva pthla kchiir arlaan inmo?” Ungta mmaanni theda, “Eme, pthla kchiir khat ka am tdit neenni aryaa chliit maan ring.”

³Ungbi mma ngi theda, “Ava mkurthut tu tva tha baptis alo inda?” Mmaanni theda, “Johon baptis tlot na thu.”

⁴Ungta Poul li theda, “Mma dil ṭoida karvang Jisu ado rin chaak raan dida miirek hin theda, Johon va plungren kuhur ki baptis mdo ptlot.

⁵Hava maryaak in thungta mmaanni Mukpu Jisu miing ngi baptis tlo lamda.

⁶Ungta mleen thaanni Poul li mkhut mkhiin pik lam thungta, pthla kchiir mleen thaanni arjungda, ungu mmaanni pleiji pau lamda, pauphuwng lamda.

⁷Mmaan mkheng nga sowm leiknii arveel lam.

⁸Ungta mma ngi synagog thung ngi lutda, Isowr Kruwngpaam mlei thung ngi karteen ṭhi lamda ungu archil lamda thla kdum lik thung ngi purchuk lamda.

⁹Pdainu mii angṭhe ngi plung kapchaiji mdo rin ma lei inni kurkuk loprek maiṭhuwm mi pau kṭha kma mdo the lei inni, mmaan arlakki siikhu rek angṭhe ṭhida sun chda. Ungta mnii ktaiji Tyranias mdodit karteenna inn thung ngi karteen ṭhi lamda.

¹⁰Hava kum knii thung ngi kurnowl thlit da, ava leiji Asia thu ka am mii mkheng Jihudia rek leh Grikrek mikniing ngi Mukpu pauna aryaa chlamda.

¹¹Ungta Isowr ri tatlot pchaan liit mara tngana rek ava Poul khut ti ptlotda.

¹²Ava leiji mma mdaksaa ki buwlaak, mata mdona ava kukoi rek hin sin lamda, ungu mu omlai thuwnki dam lamda, ungta mmaan thungki kṭha kma pthla rekka duwn thuwk chlamda.

¹³Ava dilli pang tlowng ngi ktlowng Jihudia rek mii angṭhe ngi pthla kṭhakma rek luna miirek hin mhaimeeng inni Mukpu Jisu miing ktham psuk lamda, “Poul doparyaam Jisu miing ngi pau kupṭum inna,” kdingi the lamda.

¹⁴Jihudia rek thiimpu kparthaang chapa rek tikheuvi hava tlo lamda.

¹⁵Pdainu pthla kṭhakma rekki mhin inni arthawngda, “Jisua kdee in ungu Poul ruk kdee in; pdainu naanna kule in pti?”

¹⁶Ungta pthla kṭhakma amna miilaiji mleen thaanni kunchowmda, mkheng kheng inni kjuwm tapda rutan pnen pthii lamda, ava leiji mmaanna inn ava thungki mchai daat inni, klimmi chen chlamda.

¹⁷Ungta hava Ephisia thu ka am mii mkheng, Jihudia rek leh Grikrek mikniing ngi dei lamda, ungta mmaan mkheng leen kṭi amda; ungu Mukpu Jisu miing nga kdung kurjouda.

¹⁸Tunva krin charek arlakki mii maknemmi thuwkda, mnong tlot in kṭha kma thethuw chlamda pandang lamda.

¹⁹Ungta haimeeng kthloi mii knempok rukva mlairik in purkuk lamda, mii mkheng dodee ngi meithung ngi buwng pthii lamda, ungu mmaanni mman ava mtai in thungta, thiir kpowl sum pun somparnga.

²⁰Ava leiji Mukpu pauna ava kurjouda kdung ngi tang setsetda.

²¹Tunva hava nongrek mṭut dok diltha, Poul li Masidonia leh Akhaja klaanda, Jerusalem tha mhun nrangki muplung bin theda, “Neiji ava tha hung thinira Romia ruk kdodee ma rome.”

²²Ungta mma ngi mma kbom cha rek miilai knii, Timothi leh Erastas ava Masidonia tha sii lam thida, mma mdakka Ephisia thung ngi mpha mruk tummi kcheeng daatda.

²³Mpha ava arveel bing thung ngi lam mlei thu kdung kut,lur amda.

²⁴Mleija mmiing Demetria mdodit thiir kpowl ksa miilai khatti Artamia kukdown inn ava thiir kpowlli sada, dimdowl klourek hin mnong in knempok piida.

²⁵Mma ngi nong mdo ptlot miirek own purkuk thida, theda, “Miirek hava dimdowl klouvi alrou knempok tphaak chaak in ava naanni ado dee in.

²⁶Ungta khut dosak isowr rekka isowr pme, dida Poul li Ephisia rek hin daat kma Asia mmun mkheng thung ngi tlowngda mii knempok mdo archil dok ava naanni dei inti ado aryaak in.

²⁷Ungta nenki sumdowl lona ava khusiir parthit nrang daat kma, nkho ndan in ruk ka amra. Ungta Asia paam leh dultipaam mkheng ngi luw mdobuk klin langlang isowrnu Artamis luwbuk inn rukka dosinime, ungu mkunlor rukka mma thungki kukrowt chra.”

²⁸Mmaanni hava maryaak in thungta, kdung reenni plung pthit lamda, ungu owng lamda, “Ephisia Artemis ava klin langlang!”

²⁹Ava leiji khuwpii ava kdung ngi plung chei karche chowp chda; ungu ktlowng thung ngi Poul doṭhirek, Masidonia ki Gajas leh Aristarkas howl lamda kumhai inn thung ngi namduwl lamda.

³⁰Poulva miiluwng rek arlakki chet nuwmda, pdainu siikhu rekki mat lamda.

³¹Asia ki mii angṭhe mma ngi kdung ngi plap mdo kurthut ṭhirek rukva kumhai inn thung ngi maktardet ma nra mii siilamda ktham chlamda.

³²Tunva mii angṭhe ngi ktlok khat, angṭhe ngi msik liklik khatti owng lamda; mleija kurtuwl miirekka plung kinṭhen chowp chda, ungta mii maknemva mkurku naanki mlei ruk dei lamme.

³³Miiluwng rek angṭheva Jihudia rekki mdusuk inni mdo namduwl in Alekjander pakda kdingi bin lamda. Ungta Alekjander va miirek hin mkhut haida kirthe ploi chda.

³⁴Pdainu mma Jihudia mii tdit mdee in thungta, ṭhang knii arveel klutti mkheng inni krowl khdaatti owng lamda, “Ephisia Artemis ava klin langlang!”

³⁵Ungta khuwpii thungki lairik nong ktlo lik mma ngi miiluwngpa rekka pdown pthii lamda, mma ngi theda, “Ephisia miirek, Ephisia khuwpii ava klin langlang Artemis leh parwaanki ktla tuprut ki lung luwbuk inn karkhii pi tdit kdeikma ku ka am in ptida?

³⁶Havale kro kmara ame tdit adei inra, rim kdi amchaan ungu kuknot reenni do khat lee tlo maan.

³⁷Mleija naanki luwbuk inn thungki ruk kulrowt kma mata mukpu nuh ruk kjowm cha kma hava miirekka aṭhiinna.

³⁸Ava ngi mlei kurthuwkda, Demetria dimknei rekki ku mii khat hin mraal mpiik inbi, kekṭewl inn ava kparvang nga, ungu ava thung ngi paam kpurek ka am lam; mmaanni khat leh khat mraal kirpii chlam so.

³⁹Pdainu naanni murson athlaam inbi, ava paamki kunpun lop thung ngi kṭuw rora.

⁴⁰Mleija snii ki kthuwk nong ava ngi khusiir tparthit naan kurthuwk ra, hava mlei thung ngi nenni sakhi tpiik pchaan in nime.”

⁴¹Ungta mma ngi hava the thida kunpun lop ava psun pthiida.