Read Lamkang DOWLLO 2 Bible Online

DOWLLO 2 - Lamkang bible

DOWLLO 2

¹Pentikos nit mphaak thungta, mkheng inni mun khat thung ngi kurkuk lamda.

²Ungta tun kat daatti tirthli kraang heppi parwaanki krowl khat thlengda, ungu mmaan ko onna innka ava pum dimmi dim chda.

³Ungta mei lulu ngi mhin inni ktardet da, ungu mii pum ktai leen tuwngda themda.

⁴Ungu mkheng kheng inni pthla kchiir ri dim chlamda, ungta pthla do the dil kṭoiji msik msik pauvi kpau pṭhun lamda.

⁵Tunva parwaan kurdu ngi ka am chati khim khai thungki plung klut Jihudia mii rek Jerusalem thung ngi am lamda.

⁶Ungta hava krowlli miiluwngpa thuwk kurkukda, ungu mmaanna psum chda, mleija mpau inna mdak mdak inki pauvi mii pum ktaiva aryaa da.

⁷Ungu mmaanni ngak chlam da, ungta tngana a kdingi the lamda, “Hava kpau mii mkheng nga Galil ki lam pme mo?

⁸Ungta nen nenki nkhuwpaam pauvi mii pum ktaiva naryaak daat inmo?

⁹Parthia, Media, Elamait, ungu Misopotamia ki mii rek, Judia leh Kapadosia, Pontas leh Asia,

¹⁰Phrygia leh Pamphylia, Egypt leh Kurini ki Libia arveelli ka am mii rek, Romia ki kvel kcha rek, Jihudia leh Jihudia no kupṭoi kcha rek,

¹¹Kritan leh Arabia rek, hava klin langlang ngi Isowr nong rekki kpau ava npau npau inni naryaak chaak inna.”

¹²Ungta mkheng kheng inni ngak chlam da, kupsum kcha ngi khat leh khatti the lamda, “Hava talulu daat da?”

¹³Pdainu ktlok rekva kipnii chaakki the lamda, “Mmaanni rikrou dii nee reen lamda kipri kcha lamma.”

¹⁴Pdainu sowm lei khat tu kilṭhi ngi Pitor ri ripda, mukrowl kparyaa ngi mhin inni theda, “Judia leh Jerusalem thung ngi ka am mii mkheng naanni hava adei chaan, ungu nei kpauna rekka knaa atkiin in.

¹⁵Mleija naan dobin lulu ngi hava mii rekka kipri ava pme, mleija nit avaki ṭhang kdum daat roa;

¹⁶Pdainu hava ava khulpu Joel li mdo the dok:

¹⁷‘Isowr ri theda, mṭutna nitti kthuwkra, Neiji dulti mii mkheng leen kapthla ptlong nikdi, ungta achapa rek leh achanurek inni pau kphuwngra, ungu ksenao rekki mik kleng kdei kpha chra, ungta kder rekki mer kmer lamra.

¹⁸Oji, ungu hava nit rek thung ngi, Nei ksra owrpa rek leh ksra owrnu rek tunni, Neiji Kapthla ptlong nikdi; ungu mmaanni pau kphuwng lamra.

¹⁹Ungta tun knungki parwaan tha tngana, ungu kurdu dulti thung ngi titinna ki hii, ungu mei ungta meikhut Neiji tdet lam nik di.

²⁰Mukpu ki klin lang lang leh kunlor nit mthlen dungi, kniw ava kvom chra ungu thla ava hii kur owl chra.

²¹Ungta hava kthuwkra, Mukpu miing ko own kcha mii khim khaija kaktlan pikra.’

²²Isreel mii rek hava pauva aryaa chaan: Nasareth Jisua Isowr ri klin klin nong rek, ungta tngana rek ungu titinna rek mdo ptlot ava ngi Mma Isowr do rot Miilai khat tdit adak kat inni adodee in

²³Hava Jisua, Isowr ri krip merri mdo bin, ungu mdungi kdei chdok dil kṭoiji parlaan da, naanki Nowlam kṭoi kma mii rek khutti khros leen pthoi lamda, ungu eayou da.

²⁴Pdainu Isowr ri suwkthuwkki mdiyo thungki parthlet da, pring pinle da, mleija ava ngi khut pnen pchaangme.

²⁵Ditta Mma mlei thung ngi Devid ti theda, ‘Neiji Mukpu a mpha ktai thu kdu sukki dei chnu, mleija neiji kukunchun ma nra, Mma ngi kchang ktong tha amda;

²⁶ava leiji kuplung ngam chda, ungta kiplei kanpa chda; ava kheelli kdaksaa rukva plung pnet psuk da am nik di.

²⁷Mleija kraothla ava sim thu sii nimti, mata Nang ki kchiir khat ava kmawng pdee nimti.

²⁸Nang ngi rinkhu lam rek mipdee chtinu; Nah awng ngi kdung plung kngam mpur owl nadi.’

²⁹“Ku u knao rek, charuwl Devid mlei thung ngi mma diyou dokda, kulruwl dok, ungta mma thlaan ava snii kpha thung ngi ta am ṭhi daat in dinu neiji plung ktangarri kthe chaakka.

³⁰Ava ngi mlei kurthuwkda, ungta khulpu khat kurthuwkki mma charuwl rek thungki khatti mma ku onna tunni kuk ongra, dida mhin inni Isowr ri paureel khatti mdo reel pik dok lam tdit deida.

³¹Mma ngi mdungi deida ungta Khrista rinkarheel nrangki theda, mleija Mma ngi sim thu siime, mdit mata mdaksaa ngi kṭop deime.

³²Hava Jisua Isowr ri pring pinle da, ungu ava leiji nen nkheng ngi sakhi tkurthuw in.

³³Ava ngi mlei kurthuwkda, Isowr chang ktong tha khiingda, ungta pthla kchiir paureel Mpah hinki arlaang chda, naan dodee ungu do aryaak hava aptlon pik chaanda.

³⁴Mleija Devid ta parwaan tha hunkal me; pdainu mma mdak katti theda, ‘Mukpu ngi neiki Mukpu hin theda,

³⁵Neiji Nah arawlmii rek akhu tingi kthiik du khim khai, Nei kukhut chang ktong tha ko ong cha.’

³⁶Ava ngi mlei kurthuwkda, naanni khros leen ado pthoi in Jisu ava Isowr ri Mukpu ungu Khrista mdo tpur owl tdit Isreel innbung mkheng ngi adeiso.

³⁷Tunva mmaanni hava maryaak in thungta muplung ril inna kdetbuk heppi tloda, ungbi Pitor leh kenyee rek angṭhe hin the lamda, “Ku u knao rek neenva tak tlo nikaan da?”

³⁸Ungbi Pitor ri mhin inni theda, “Apnu ton in ado tuptlot pik nraan leiji plung ren ahur chaan, ungu Jisu Khrista miing ngi naan mii pum ktaiji baptis alou chaan, ungta naanni pthla kchiir chla arlaang chnaandi.

³⁹Mleija naan hin tha ungu anaoleen hin, ungu lam kla ngi ka am mii mkheng hin, nenki Isowr Mukpu do own ava mii pum ktai hin mpaureella ka am.”

⁴⁰Ungta pauna rek knempokki sakhi purthuwda, ungu ksop lamda theda, “Hava kṭha kma charuwl thungki adaksaan kirtleu chaan.”

⁴¹Ava leiji mma pauna karlaang cha rekka baptis ptlot lamda, ungu ava nitti raothla pun kdum arveelli tpom chlam da.

⁴²Ungta mmaanni kenyee dopurchu thu, ungu kurbuk thu thenpen kupkui thu ungta kṭhil cha thung ngi plung plut lamda.

⁴³Ungta raothla khim khai leen kṭi amda; ungu kenyee rekki tngana leh titinna knempok tlo lamda.

⁴⁴Ungta krin cha mii mkheng ngi kurkuk lamda ungu do mkheng nga khdaat ti tlo lamda.

⁴⁵Ungta mdo thloi mdothloi in jur lamda, ku mii khat kikriing hin them pik lamda.

⁴⁶Ungta mnii ktaiji luwbuk Inn thu thuwk kurkuk lamda, ungu innbung kteen thung ngi thenpen pkui lamda, ungta plung kngam leh plung kneiji chaanee lamda,

⁴⁷Isowr panpaak lamda mii mkheng dosanni am lamda. Ungta mdo ktlan dok rek ava Mukpu ngi mnii ktaiki tpom pik lamda.