Read Lamkang DOWLLO 23 Bible Online

DOWLLO 23 - Lamkang bible

DOWLLO 23

¹Ungta Poul li karseel lop suw rim thida, theda, “Ku u knaorek, snii kpha thung ngi neiji Isowr maiṭhuwm mi kuplung bin mkheng thu kṭha ngi ka am kcha ping.”

²Ungta thiimpu kparthaang Anania ngi mbengi krip rek hin mner tha mdo tpeen nraan paureenda.

³Ava dilli Poul li mhin theda, “Kpowlli tulṭhut bang, Isowr ri nah akti peengra! Nowlam dil kṭoiji nei mkik ṭewlra ko ong thitinu, Nowlam liit kma pangi nei mkit peeng rangki pau apṭumma?”

⁴Ungbi mbetha krip rekki theda, “Isowr ki thiimpu kparthaang nga nang ngi rai nmo?”

⁵Ungta Poul li theda, “Ku u knaorek mma thiimpu kparthaang tdit neiji deimaang; mleija hanto kjitda, ‘Paamkpu tunni amii rekki kṭha kma mpau ronime.’ ”

⁶Pdainu sadusi rek mii angṭhe ungta Pharisi rek mii angṭhe kurchou lamma tdit Poul li mdee thungta, karseel lop thung ngi mma ngi owngda, “Ku u knaorek, neia Pharisi rek chapa Pharisi miilai khat ping; kdiyou thungki kring karheel kdung reenni kdo arngai chaak leiji nea kja kcha ping.”

⁷Ungta mma ngi hava mthe thungta, Pharisi rek leh sadusi rek arlakki mkalrai naan kurthuwkda; ungbi kunpun lop ava kanṭhen chda.

⁸Mleija sadusi rekki theda, Mleija kring karheel mata Waantamsii mata pthla tdit ame; pdainu Pharisi rekva mkheng deida ungu ro lamda.

⁹Ava dilli kheel siingi vawnglumda; ungta Pharisi rek lop thungki chukpu rek angṭhe ngi rip lamda pauvi karteen nlamda, “Hava miilai doparma do khat lee neenva pha maan ring. Mma hin pthla khat mata Waan tamsii khatti kthe ruk kro.

¹⁰Ungta kdung reenki plung kthi ngi vawng mlum thungta, Poul ava mthum mthummi kjen pthi kro lam kdingi rawlmii klin siiva ṭida, rawlmii rekki juda mmaan arlakki namtrom mi lowngda rawlmii ki innpii thu mdo arhun ṭhi nraan paupṭumda.

¹¹Mupduk nii jaanni Mukpu ngi mbetha ripda ungu theda, “Plung apngar daat, mleija Jerusalem thung ngi Neiki sakhi ado piik lulungi, Romia thang rukva Neiki sakhi pii nadi.”

¹²Khuw mvar thungta, Jihudia rekka kurthlong lamda mmaanni Poul me eayo dok du in khim khaiji chaanee nimaan ring kdingi mdaksaan kurbowl lamda paureel lamda.

¹³Mii somplii kheelli paureel dok lamda.

¹⁴Ungta mmaanni thiimpu kinreel rek leh kverrek hin chet lamda ungu the lamda, “Neenni Poul ke eayo dok duin khim khai then kdo chaak ma nraan kdaksaan kurbowl innu paukreel dok inna.

¹⁵Ava ngi mlei kurthuwkda, naanni mma mlei thung ngi kṭha ngi karkhal nrang heppi ado arjun ṭhi nraan, karseel lop tu kilṭhi ngi rawlmii ki klin sii hin atheen. Ungta mma ngi murjun nai du liitti mma neenni eayou dok inni.”

¹⁶Tunva mmaan dopthlim ava Poul chernu chapa murdupa ngi aryaa da; mma ngi rawlmii innpii thung ngi lutda Poul hin songda.

¹⁷Ava leiji Poul li rawlmii berksu khat ownda ungu mhin theda, “Hava ksenao va rawlmii klin sii hin aṭhi psuk; mleija mma ngi mhin paukhat mson nuwmma.”

¹⁸Ava leiji mma ngi rawlmii klin sii hin ṭhi paphaak da ungu theda, “Rownginn thu ado khum in Poul li hava ksenaova nah ado kpaphaak rangki mo ownda, mleija mma ngi nah hin paukhat mthe chaak nuwmma.”

¹⁹Rawlmii klin sii ngi mkhut tha kjowngda ungu kensii tha ṭhi ptliing thida, khewlda, “Nei kihin tak the nada?”

²⁰Ungbi mma ngi theda, “Pduk niingi nang ngi Poul hin karman dokki pau kikhewl rang heppi karseel lop thung ngi ado ṭhi pthuw nra, Jihudia rekki nah hin mdo ṭhil nraanki pau kulrot ndok lamma.

²¹Pdainu rot pik lamma; mleija mii somplii kheel dekki mma ava mipthlim inna, mma me eayo dok duin khim khaiji then kchaa knee tlo maanche kdingi mdaksaan kurbowl lamda pau mreel dok inna; ungta tunva mmaanni nah hinki pau mdo aryaak nraan leiji kurthlong dok lamma.”

²²Ava leiji rawlmii klin siingi ksenao va, “Nei kihin ado tithe pik ava ku mii khat lee hin songma,” dida mhin paukham da.

²³Ava dilli mma ngi rawlmii berksu rek miilai knii ownda ungu theda, “ṭhang kdum thung ngi Kaisaria kpha rangki rawlmii rek arjaa knii ungu skowl kthou mii som tikheu ungta kchei ksin mii arjaa knii tu kilṭhi ngi chet in.

²⁴Poul ava skowl aptuwng inra paamkpu Philiks hintha kuhui deekki adoṭhi paphaak nraan apurthlong in.”

²⁵Ungta hava mlei thung ngi mma ngi che khat kjit da:

²⁶“Kloudia Lysia ngi kinreel siiki paamkpu Philiks nah ahinni akurvui chaakka.

²⁷Hava miilaija Jihudia rekki kjowngda, ungu ke eayou rangki kurthlong lamda, mma ava Romia mii tdit neiji deinu, rawlmii rek tu kilṭhi ngi mmaan thungki kdo ktlan pik.

²⁸Ungta mmaan doplaal naki mlei deinuwm nu, mmaanki karseel lop thung ngi kdo juṭhi.

²⁹Mmaanki Nowlam mlei thung ngi mraal pii lamda, pdainu mdiyo nra mata rownginn thu ma am nrangki pau khat lee pre neiji pha chmaang.

³⁰Ungta hava miilai tunni mraal kpii ngi kurthlong lamma tdit karyaak thungta, neiji mma raal kpii rek rukka nah amaiṭhuwmmi mdo the nraan paupṭumnu, mma nah hinni kuknotti ksii chaakka.”

³¹Ava leiji rawlmii rekki mmaan doparseel dil kṭoiji, Poul la lou lamda, jaanni Antipatria hin ṭhi lamda.

³²Ungta mupduk niingi skowl kthou miirekka mma tu kilṭhi ngi ma lam thida, mmaanni rawlmii innpii tha mdil in kinle lamda.

³³Mmaanni Kaisaria thlung lamda, ungu paamkpupa hin chethi parlaan lamthida, Poul rukka mhin pii lamda.

³⁴Chethi ava mma ngi pa thida, tva paamkowl ki tdit mma ngi khewlda. Mma ngi Silisia ki tdit mdee thungta,

³⁵mma ngi theda, “Araal kpii rek mthlunta neiji aju aryaa rolaini.” Ungta mma ava Herod lusang inn thung ngi mdo seel psuk nraan paureenda.