Read Lamkang DOWLLO 24 Bible Online

DOWLLO 24 - Lamkang bible

DOWLLO 24

¹Nii parnga diltha thiimpu kparthaang Anania ngi kver rek mii angṭhe leh mner kjaang miilai khat Tertulia ṭhida arjungda. Poul ki mraal kpii rangki mmaanni paamkpu hin lusang tur oi lamda;

²ungu mma mo own in thungta, Tertulia ngi hanto theda, mma mraal piida, “Kinreel siiki Philiks, nang ngi kheel siiki kdaai mpaphaak chaan tinu ungta nah do purdonni hava chati rek kchang kdonni ado tpintiin pik lei inni,

³mlam ktai thu, ungu mmun kteen thung ngi havaki plung kanpa mkheng tu kdo rot chaak in.

⁴Pdainu mpha ado klo pik ma nra ktoi tekki ado taryaak pik nraan awonsat ra kaktham chaakka.

⁵Mleija hava miilaija khusiir tparthit na khat, ungta dultipaam mkheng thu ka am Jihudia miirek hin pauvi vawng kuplum lik Nasareth lop berksu khatti amda.

⁶Mma ngi luwbuk Inn ruk mdo kchou kre nra kurthlongda, pdainu neenni kjowng dok innu, neenki Nowlam dil kṭoiji kṭewl nikaan di.

⁷Pdainu rawlmii berksu Lysia thlengda neen kukhut thungki nam trommi mlowng inda,

⁸mma ki mraal kpiirek ava nah amaiṭhuwmmi mthlen nraan paureenda. Neenni mma ki mraal kdo piik naan khim khaija nah adak katti aparsin nabi, dei daat nadi.

⁹Jihudia rek rukva hava khim khaija anto pi dilamda the tpom lamda.

¹⁰Ungta paam kpupa ngi mpau nra mmik makcha psuk thungta, Poul li arthawngda: “Hava chati rek tunni nang ngi akṭewlla tdit neiji kdo dee chaak leiji plung kngammi karthe loi chni.

¹¹Neiji Jerusalem tha luwkbuk ra kahan chaak ava nii sowm leiknii kheel mlai tdit nang ngi dei nadi;

¹²Ungta mmaanni ku mii khat lee hin nei kdo karteen ṭhi mdit mata kurtuwl miirek vawng kdo plum ava luwbuk Inn thung daat don mata synagog rek thung daat don mata khuwpii thung daat don pha lamme.

¹³Mdit mata mmaanni neiki kraal mdo tpiik naanki mlei kat ava pii pchaang lam nime.

¹⁴Pdainu nah hinni hava kthe chaakka, mleija mmaanni karmak lop mdodit in ava Lam dil kṭoiji neiji nenki npahle ki Isowr luwbuk nu, Nowlam thu mata khulpu rek dokjit thu do khim khai rin chnu,

¹⁵kindit rek ruk kindit kma rek ruk mikniing ngi kring karheelra dida hava mmaan mdaksaan kat rukva mdorot in Isowr ava hinni neiji kuplung kdo var chaak.

¹⁶Ava leiji neiji Isowr hin ruk ungta miirek hin rukva plung kpanchel deekki ka am nra kja ngi plung kdo purdun chaak.

¹⁷Tunva kum mruk diltha nei kchati rek hin chla ungu tlaaikdown chra kthleng cha ping.

¹⁸Kurtuwl mii mata vawngklum ktaak liitti luwbuk Inn thu kartleu dokki hava kdotlot slii pha lamda. Pdainu Asia ki Jihudia miirek angṭhe am lamda.

¹⁹Mmaanni nei kihin kraal mdo piik nraan ma ambi, mun hava thu nah amaiṭhuwmmi athe lamso.

²⁰Mdit mata hava miirek mdaksaan katti neiji karseel lop maiṭhuwm mi kri mpha thu kdo parma ma amta athe lamso.

²¹Kdiyou thungki kring karheel mlei thu snii naan amaiṭhuwm inni ado tparsin naan hava krowl hanto daatti neiji mmaan arlakva krip ping.

²²Pdainu Philiks ava ngi Lam tdit mlei thu mkindit kat deida, “Rawlmii klin sii Lysia murjunta naanki mleija reelro laini,” dida the thida mnit sown pthiida.

²³Ava dilli mma kṭha deekki mdo seel psuk nraan, pdainu mplap rekki mdo kriin mdo purdon pik chaak nra, kintekki mdo thiik nraan, rawlmii berksu hin paupṭum da.

²⁴Ma am bong diltha, Philiks ava ngi mnumei Jihudia snu miilai khat kurthuwk Drusila ṭhida, Poul ku ownra mii siida, Khrista Jisu hin krin cha mlei thu mdo the pik karyaa ra arvada.

²⁵Ungta mma rinkidit ungu daksaa kjuwm ungta dilki kekṭewl mlei thu ngi mkarteen in thungta, Philiks va ṭida, ungu theda, “Hava mpha ki tumva sun; neiki mpha ma am thu a own laini.”

²⁶Poulva sum mikpii luwng rangmo kdi rukva binda. Ava leiji maknem thu mma ngi mii siida, ownda ungu karbiik ṭhida.

²⁷Pdainu kum knii mve dok thungta, Porsias Phestas ava ngi Philiks kchang donda; Philiks va Jihudia rek san nuwm da, Poul la rownginn thu ma daat da.