Read Lamkang DOWLLO 25 Bible Online

DOWLLO 25 - Lamkang bible

DOWLLO 25

¹Tunva Phestas ava ngi mpaam thung ngi arvang lutda, nii kdum diltha Kaisaria ki Jerusalem tha hangda.

²Ungta thiimpu kinreel rek leh Jihudia rek berksu miirekki Poul ki mraal the lamda, mhin ktham chlamda,

³lamtha mmaanni pthlimda mdo eayo nraan, mma ava Jerusalem tha mdo hansii da mdosan nraan pau khewl chlamda.

⁴Phestas ava ngi arthawngda, Poul la Kaisaria tha am daatda mma mdak katti ava tha kbeiji mjun nra theda.

⁵Ava leiji mma ngi theda, “Naan arlakki rutan kthloi miirekki mjunṭoi lamso, ungu ava miilai do parma ma amta, mmaanni mraal kpii lamra.”

⁶Mma ngi mmaan arlakki nii tret mata nii sowm kipkheel kma ambong thida, Kaisaria tha jungda; ungu mupduk niingi kekṭewl ko onna tunni ko ong thida, Poul mdo arvan ṭhi nraan paupṭumda.

⁷Ungu mma marvan ṭhiin thungta, Jerusalem kikjung Jihudia rekki klop dok lamda, mlei kat ktaakki krik krik pau knempokki mraal pii lamda.

⁸Poul karthe loi, “Neiji Jihudia rek Nowlam tun mata luwbuk Inn tun mata Kaisar tun mraal kpii ngi karmak nong tlo liit maang.”

⁹Pdainu Phestas ava ngi Jihudia rek mdosan nuwm leiji, Poul hin theda, “Nang ngi Jerusalem tha hangda hava pau mlei thung ngi nei kmaiṭhuwmmi avatha aparsin nuwmma?”

¹⁰Pdainu Poul li theda, “Neia paamkpu Kaisar maiṭhuwm mi krip daat ping, ava thung ngi ado tparsin kat raan; Jihudia rek hin neiji karmak nong tlo liit maang tdit nang ngi kminni ado dee dok.

¹¹Anto daat joso neiji karmak tloda ungu kdiyou kroki do khat ktlotbi; neiji kdiyou rangki karthlet ra thlaam maang; pdainu mmaanni kraal mdo tpiik lam thung ngi do khat lee ma am mabi, ku mii khat lee ngi neia mmaan hin mpii pchaang nime. Neiji Kaisar hin pau kdo naak dok.”

¹²Ava dilli Phestas ava ngi karseel lop tu pau mkaryaak ndok diltha arthawngda, “Nang ngi Keisar hin pau ado naak dok leiji Keisar hin vangcha.”

¹³Tunva niikhu mve bong diltha kruwng Agripa leh Barnis ava ngi Phestas dokowl rang ngi Kaisaria tha thlung lamda.

¹⁴Ungta mmaanni niikhuw roiksotti makcheen dil thaan, Poul mlei thu Phestas ava ngi kruwng maiṭhuwmmi ṭhida, theda, “Philiks do maak daat rownginn thung ngi miilai khat am daat da;

¹⁵ungta neiji Jerusalem thu ka am daat mpha thu, thiimpu kinreel rek leh Jihudia rek kver rekki, mma mlei thu kihin the lamda, mma mlei thu mraal kpii rangki mkhewl lamda.

¹⁶Neiji arthawng lamnu, mleija mdo the psul in mii ava ngi kthe psul rek kurdut ṭhida mmaan dothe naki mraal mlei thu mkarthe loi du khim khai ku mii khat ti miilai ava mpiik dok bi ava Romia ki nopa pme.

¹⁷Ava ngi mlei kurthuwkda, mmaanni hava thu mthuw kurku in mpha thu, neiva krem maang, pdainu mupduk niingi kekṭewl ku onna tunni ko ongnu ungu miilai ava mdo arvan ṭhi nraan pau pṭumnu.

¹⁸Mraal kpii rekki rip lamda mma mlei thung ngi neiji kṭha kma ngi kdobin hep luluva khat lee the lam mda;

¹⁹mmaan karteenna ava, mmaanki dhormo mlei thu, Jisu tdit miilai khat, kdiyou thungki ava Poul li kring karheel pi dida, mdothe ava mmaan poibin thung ngi mdo purthun susu in thung ngi karteen psuk lamda.

²⁰Hava le mlei thu neiji tak heppi khewl nikda dinu, mma ngi Jerusalem tha hangda ava mlei thung ngi mpirsin nuwm mo dinu khewl nu.

²¹Pdainu Poul li paamkpu kinreel dobin dil kṭoiji, mdo seel psuk nraan mthe thungta, neiji mma ava Kaisar hin ksii du khim khai mdo seel psuk nraan paureennu.

²²Ungta Agripa ngi Phestas hin theda, “Nei kdaksaa katti mii ava karyaak nuwmma.” Mma ngi theda, “Pduknii ngi mhin aryaa nadi.”

²³Ava leiji mupduk niingi Agripa leh Barnis ava ngi marchaang klin ni rawlmii ki klin siirek leh khuwpii ki klinksaang rek tu kilṭhida mii kurtuwlna inn klin thu lut lamda. Ava dilli Phestas ti Poul mdo arvan luṭhi nraan pau pṭumda.

²⁴Ungta Phestas ti theda, “Kruwng Agripa ungu hava thu ka am nen nkheng, Jerusalem leh hava thu ka am Jihudia miirek mkheng ngi nei kihin mlei mdo kjit in miilai ava asuwn, mleija mma mrin bong rang pme kdingi owng lamda.

²⁵Pdainu mma ngi mdiyo nrangki do khat lee neiji pha manu, ungta mma mdaksaa rukva paamkpu kinreel hin pau mdo naak dok leiji, mma kdosi dok nra reel dok nu.

²⁶Pdainu neiki paam kpupa hin mma mlei thu kdo kjit kat ra do khat lee am mda. Ava ngi mlei kurthuwkda, naan amaiṭhuwm inni kṭhi pthuw chaakka ungu kinreel siingi kruwng Agripa, nenni mma npirsin ndok dil thaanni, neiji mlei mruk kdo kjit chaak rang nga kpha cha kro ping.

²⁷Mleija rownginn thungki miilai khat ava mma ki mraal kikjit pik kma nsii pthiibi, ava dosi nime mo kdingi bin chnu.