Read Lamkang DOWLLO 28 Bible Online

DOWLLO 28 - Lamkang bible

DOWLLO 28

¹Neenni ka karthle dok dil thaanni, neenni Maltia tdit parhpaam deiro innu.

²Ungta khuwpaam ava thungki miirekki kheel siingi wonsat mlo chaanda; mleija khuwkra pṭhunda kheel reenni kjiil sikda, mmaanni mei pchok lamda kikheng inni mkowl chaanda.

³Poulva ding tut khat thlaamda ungu mei thu dikda, msat thungta pruwl khat thuwkda mkhut tha purkol dokda.

⁴Khuwpaam ava thungki miirekki, mkhut leenki pruwl mdee in thungta, khat leh khatti the lamda, “Hava miilaija miilai khat ke aeyou munra. Mma ngi truwn thungki karthlet chdaat joso, ringthleng mun nime,” kdingi the lamda.

⁵Anto kurthuwk chdaat joso mma ngi pruwl ava mei thung ngi kṭhik lot pthiida kja nangme.

⁶Mmaanva ktarthliing ra mata tluw daat don kdiyou rang mo kdingi arda lamda; pdainu mmaanni roiksotti arda lamda mhin do khat lee mthuw ma thungta, muplungbin in parthleng lamda, mma mukpu khat kdingi the lamda.

⁷Tunva mun ava arveelli paam avaki prahpaam kpupa mmiing Pablias tdit miilai khat amda, mma ngi mkowl chaanda, nii kdum lik thu mwonsatti mupthlung chaanda.

⁸Hanto thuwkda, ditta Pablias pah ava riphaak leh poisen ni koi chda, ungbi Poul li velda, mleen mkhut khiingda ṭhil pikda, ungbi dam chda.

⁹Ungta hava mthuw thungta, prahpaam thu ka am omlai kthloi cha rekki thleng lamda ungu pdam pik chlamda.

¹⁰Mmaanni chla knempok mpii chaanda; ungu neenni arkuwngpii leen kuhowl rangki ktuwn in thungta, kdo kriin chaak in mkheng msim pik inda.

¹¹Thla kdum diltha neenni prahpaam thu phalbi pvei dok in thiinnu, unao kanphiir kdujik Alekjandria ki arkuwngpii khat leen howl innu.

¹²Syrikias thu tparngat innu, neenni nii kdum kcheeng innu.

¹³Ungta ava thungki neenni lam punkoi innu, Rhegiam thlung innu; ungu nii khat diltha kurdu ktongki tirthli raangda, ungbi mnii knitna rongi Putiolia thlung innu.

¹⁴Ava tha neenni ku u knaorek pha chaannu ungu mmaanni mo own chaanda, nii tikheu kcheen ṭhiinnu. Ungta neenni anto Romia thlung chaannu.

¹⁵Ungta avaki ku u knao rek inni, neen mtaryaak in thungta, Apias bajaar mdodit ungu innlu kdum kpha dek lamkla ngi neenna mdu chaanda. Mmaan mdee thungta Poul li Isowr panpaak da, ungu plung tapngar chda.

¹⁶Ungu neenni Romia kthlun in thungta, Poul la mthina ngi rawlmii doseelli ma am nra rot pikda.

¹⁷Nii kdum diltha, mma ngi khuw ava thungki Judia miirek berksurek own purkuk da, mma ngi mhin inni theda, “Ku u knaorek, neiji miirek mata nenki npahle nopa do khat lee raal piimaang, anto daat joso neia Jerusalem ki rownginn thu mdo tkhum lammi Romia rek khut thu mparlaan lamda.

¹⁸Mmaanni mpirsin dok lamda, kdiyo nrangki mlei khat lee ma amma thungta, mmaanni neia kintekki mapthla nuwm lamda.

¹⁹Pdainu Jihudia rekki mrot ma thungta, neiji kchati miirek hin kdo psul nlamra dokhat lee am mdaat joso, neia Kaisar hin lusang kdo tur oima rome di chnu.

²⁰Ava ngi mlei kurthuwkda, neiji adei inda pau kdosaam chaak nra, ado ko own in, mleija Isreel rekki plung ngi kdung mdo arngai chaak, ava tummi neia hava thiirri ngi mdo tbowl.

²¹Ungta mmaanni mhin the lamda, “Nah mlei thung ngi neenni Judiaki chethi khat lee arlaang chmaan ring, ungta hava nang mlei thu pau ksongra mata kṭha pau ksong ra ku u knaorek in khat lee thlengme.

²²Pdainu nah poibinna talu tdit neenni nah hinki karyaak chaak nuwm inna; mleija nah amna mun kteen thu miirekki araal piida tdit neenni dei innu.

²³Mmaanni mma tummi nii khat mpalreen in thungta, mma amna thung ngi mii knempokki thlengda. Ungta mma ngi Mousi Nowlam leh khulpu rek dokjit mikniing thungki Isowr Kruwngpaam sakhi piida, Jisu mlei thung ngi plungren mdohur nraanki jiingsun kingi kjiing kpha dekki the pik lamda.

²⁴Ungta mii angṭhea mma pausaammi plungren hurda, ungu murson rekva rin chlamme.

²⁵Ava leiji mmaan msingreel in thu kulrot nlam mda, Poul li hava paukhat mthe dilthang rongi sun lamda: “Pthla Kchiir ri naanki apah khulpu Isaijah hintha hanto tiptheda:

²⁶‘Hava miirek hin chet ra ungu athe, naanni taryaakka aryaa naandi pdainu aryaa pandi nimaanti, ungu naanni tsutta suw naandi pdainu suw pandi nimaanti,

²⁷mleija hava miirek plung nga kurmowl cha a, ungta maknaa inna mdo aryaak naan thungki krik cha a, ungu mmik inna mipjiin pthiinna, anto mkurthut ma tlaangbi mmik inni suw pindi lamdon, ungta maknaa inni aryaa lam don, ungu muplung inni dei pindi lam don, ungta mdam chaak nraan Nei kihin kinle lamra.”

²⁸Hava Isowr ki kirliinna ava ktlok chatii rek hintha msia tdit naanni adei chaan; mmaanni knaa ktikiinra.”

²⁹Mma ngi hava pauna rek mthe dok le, Jihudia rekka sun lamda, msingreel inni kdung karteen nlamda.

³⁰Ungta mma ngi kum knii lik thu mdaksaa ngi kpurdon chda ava tha amda, ungu mma hin kthleng mii mkheng nga kowl chda,

³¹Isowr Kruwngpaam paryaamda ungu Mukpu Jisu Khrista mlei purchukda ku mii khat lee dopkhaan mangi, plung ktangar leh kintekki nong mdo tlot chaak.