Read Lamkang DOWLLO 3 Bible Online

DOWLLO 3 - Lamkang bible

DOWLLO 3

¹Tunva Pitor leh Johon na kṭhil chaki ṭhang mtukut na thung ngi luwbuk Inn tha hanglamda.

²Ungta kyeng ngi kṭou miilai khat arva kdom lamda, luwbuk Inn thung ngi klut mii rek hin plungnee mdo ṭhil chaak nra, luwbuk Inn Rungchen kṭha mdo dit ava paltong thung ngi mnii ktaiji amda.

³Luwbuk Inn thung ngi Pitor leh Johon klut rangki ava mdee thungta, mma ngi plungnee ṭhil chda.

⁴Ungta Pitor ri Johon tu kilṭhi ngi suw rim thida theda, “Mhai suw in.”

⁵Ungta mhin inki do khat arlaang chrang paknu kdingi plung klutti suw mer daat lamda.

⁶Pdainu Pitor ri theda, “Neia thiir kpowl mata jeering thloi chmaang pdainu kdo thloija akpiik chaakka; Nasareth Jisu Khrista miing ngi chet.”

⁷Ungta mma ngi mkhut chang ktongki kjowngda tipripda; ungbi tun kat daatti mkhu armik rekka mru tang chda.

⁸Ungu mma ngi kunthowm da ripda ungu chet da ungta mmaan tu kilṭhi ngi luwbuk Inn thung ngi lutda, ungu kunthowmda chetda Isowr panpaak chda.

⁹Ungta mma ngi chetda Isowr mdo panpaak slii ava mii mkheng ngi deida,

¹⁰ungu luwbuk Inn rungchen kṭha mdo dit paltong thung ngi plungnee kṭhil chra kuk ong daat kchok miilai khat ava thide tdit dei lamda; ungu mma hin kthuwk ava ngi kdung kpiir ri ngak chlam da.

¹¹Mma ngi Pitor leh Johon mukjown daat arlaanni, mii mkheng nga ngak chda Solomon tdit ava dulbukki arva chen kurkuk lamda.

¹²Ungu Pitor ri ava mdee thungta mii rek hin theda, “Isreel mii rek, hava leiji talu lei kngak in pti, mdit mata neen kdak kat in rutan, mdit mata Isowr kdo rin chaak lei inni mma kdo pche in kdingi talu lei atsut rim inna?

¹³Abraham ungta Isek, ungu Jakob ki Isowr, nenki npahle ki Isowr, ava ngi msra owr Jisu mi punlor pikda, naanni parlaan pthiin ti, Mma ava Pilat ti mupthuw nuwm kpha thu, naanva mmaiṭhuwm katti ro maanti.

¹⁴Pdainu naanva Kchiir ungu Rinkindit Khat ro maan thiin tinu, mii ke eayou khat ado trot pik nraan ṭhil in tinu,

¹⁵ungta rinkhu thuwna eayou intinu, Mma Mukpu ngi kdiyou thungki pring pinle da. Neenva hava sakhi kpii kcha in ping.

¹⁶Ungta Mma miing, Mmiing krin cha ngi naanni ado dee in hava miilai ava maptan pikka; ungu Jisu krin cha naan akheng inki maiṭhuwmmi pum dammi kdam kcha mpiik chaakka.

¹⁷“Ungta tunva ku u knao rek, naanki paamkpu rek lulu ngi, naan rukva kdei chdok kmangi ado tlot in tdit neiji kdo dee.

¹⁸Pdainu Isowr ri Mma ki Khrista jat kham nra ava khulpu rek mkheng ner thung ngi alraang mdo the dok Jisu ngi purkhum da.

¹⁹Ava ngi mlei kurthuwkda, plung ren ahur chaan, ungu apnu ton in ado tuknuwl pik nraan kinle nowl in, ditta Mukpu awngki rinkindit mthlen nra,

²⁰ungu naan tummi mdo kchol dok Jisu Khrista ava mdo sii nra,

²¹do mkheng nga mdo pur owl naki mpha mve du khim khai parwaan tha ktapa amra, dida Isowr va alraangki kchiir khulpu rek ner ri mdo pthe dok.

²²Mousi ngi theda, ‘Mukpu Isowr ri naanki a u anao rek thungki naan tumra, nei mdo tsi lulu ngi, Khulpu khat ksira. Naan hin Mma dothe khim khaija ado aryaak raan.

²³Ungta hanto kthuwkra, ditta Khulpu hin karyaa kma raothla khim khaija mii rek thungki kpamawng pthiira.’

²⁴Ungta Samuel leh mma diltha karvang khulpu rek mkheng rukva, hava nit rek theda paryaam lamda.

²⁵Naan ava khulpu rek ungu apah le hin mdo piik paurina ava naole in pti, Abraham hin theda, ‘Ungu nah charuwl thung ngi dultipaam ki phungka mkheng nga msuw kṭha ra.’

²⁶Rukri ngi Isowr ri naan hin msra owr ava mii pum ktai hin aṭhat nmaan thungki plung pinle da suw kṭha ado phaak chaak nraan asii pik chaanda.”