Read Lamkang DOWLLO 4 Bible Online

DOWLLO 4 - Lamkang bible

DOWLLO 4

¹Ungta mmaanni mii rek hin mpau slii daat arlaanni, thiimpu rek ungta luwbuk Inn thungki berksu rek ungu sadusi rek mhin inni kthleng,

²mmaanna plung purda, mleija mmaan ava mii rek hin purchuk lamda ungta kdiyou thungki kring karheel Jisu paryaam lamda.

³Ungta mmaanni kjowng lamda ungta khuw mtlei du khim khai, rowng inn thung ngi khum lamda, mleija khuw tmul dokda.

⁴Pdainu pauna karyaa mii maknemmi rin chda; ungu kthleng mii rek ava pun parnga arveel.

⁵Mupduk nii ngi mmaanki paam kpu rek leh kver rek ungu Nowlam chukpu rek Jerusalem thung ngi thuwk kurkuk lamda.

⁶Thiimpu kparthaang Annas ungta Keiphas ungu Johon leh Alekjander, ungta thiimpu kparthaang rilam kthuwk rek mkheng tu kilṭhi lamda.

⁷Ungta mlaiṭim inni thii lam thida, mmaanni khewl lamda, “Talu rutan mata talu miing ngi hava ado tlot in?”

⁸Ava dilli Pitor ra pthla kchiir ri dimda ungu theda, “Mii rek paamkpu rek naan ungu kver rek,

⁹snii ngi kyeng miilai khat hin kṭha nong khat kdo tlot lei inni, tak heppi miilai ava kdam dida athe inbi,

¹⁰naan akheng in ungu Isreel mii mkheng hin ktidet chaakka, mleija naanni khros leen ado pthoi in, Isowr ri kdiyou thungki mdo prin pinlet, Nasareth ki Jisu Khrista miing ngi hava miia pdam dokda naan maiṭhuwmmi rip daat da.

¹¹Inn ksa rek naanni ado pthlei in, pdainu markil ki ksuwt kcho ava hava.

¹²Ungta kirliinna ava ku khat lee hinki pme, mleija ava ngi nen tkartlan nraan mdo piik mii rek arlakki miing khat lee pre parwaan tingi ame.”

¹³Tunva mmaanni Pitor leh Johon plung tngar leh kurchuk kma mii cham thlaang thlaang ngal tdit mdee in thungta, kdung ngi ngak chlamda, ungta Jisu ngi mkurthlo ṭhi lamma tdit dei lamda.

¹⁴Pdainu kdam kcha mii ava ngi mmaan tu krip daat mdee in thungta, do khat lee ngi mraal piida the lamme.

¹⁵Pdainu mmaanni mmaanna karseel lop thung ki duwn mthuw nraanki pau mupṭum in thungta, mmaanni khat leh khatti karteen psuk lamda,

¹⁶the lamda, “Hava mii rekka tak pardit che naandi? mleija mmaanni kunton siiki titinna rek tlo lamda Jerusalem thung ngi ka am mii mkheng hin kandang dokka, ungu nenva tmat pchaan in nime.

¹⁷Pdainu mii rek arlakki mkurjou kurnowl ma nra, mmaanni ku mii khat lee hin hava miing ngi mpau ma nraan pauvi kham inche.”

¹⁸Ava leiji mmaanni own lamda, ungu Jisu miing ngi mpau liit ma nraan mdit mata mdo purchu ma nraan pau pṭum lamda.

¹⁹Pdainu Pitor leh Johonni arthawng lamda, “Isowr hin kma naan do aryaak ava Isowr dosut nathung ngi kindit mo kindit me, tdit akṭewl in.

²⁰Mleija neenni kdo dee in leh kdo aryaak in kthe kma ava pchaang chmaan ring.”

²¹Mii rekki mlei kurthuwk da, mraal mdo piik nraanki mlei ame, mmaanna kdung pṭit lam thida, psun lamda, mleija mii mkheng ngi kthuwk nong leiji Isowr panpaak lamda.

²²Mleija kum somplii kikheel li kder miilai khat hin titinna ava thuwkda.

²³Mmaanni mupthuw dok in thungta maplap rek hin chet lamda thiimpu kinreel rek leh kver rekki mhin inni mdo the pau ava song chlamda.

²⁴Ungta mmaanni ava maryaak in thungta, krowl kinṭimmi owng sap lamda, Isowr hin the lamda, “Parwaan leh dulti kseem ungu truwn leh do khim khai kseem, kṭuw knai kma ki Mukpu,

²⁵Pthla kchiir do pthe ngi neenki kpah in Devid nerri theda, ‘Talu leiji ktlok chati rekki plung pthit lamda, ungta mii rekva do ksikma plung mdo reel inda?

²⁶dultipaamki kruwng rekki mdaksaan kirsim lamda, ungta paamkpu rek thuwk kurkuk lamda, Mukpu raal pii lamda ungu, thao mdo pbul dok ava raal pii lamda.’

²⁷Mleija Nang ngi thao ado pbul dok asra owr kchiir Jisu mraal kpii ngi, Herod leh Pontas Pilat ti ktlok chati rek leh Isreel mii rek tu kilṭhi ngi,

²⁸Nah akhut leh aplungbin dil kṭoiji kthuwk rangki ado purchuwl dok ava ktlora, kindit katti khuwpii hava thung ngi ktlora kthuwk kurkuk lamma.

²⁹Ungta tunva Mukpu, mmaanni mdo tipṭit inna mhai sut pik chaan, ungu Nah sra owr rekki Nah apauna ava plung ktangar mkheng ngi mdo the thut chaak nraan,

³⁰Nah akhut atkhiin pik slii arlaan inni kdo pdam chaak nraan, ungta Nah sra owr kchiir Jisu miing ngi titinna rek leh tngana rek kdo tlot chaak nraan mhai rot pik chaan.”

³¹Ungta mmaanni mṭhil chaak dok inle, mmaan kurkuna mun ava kunchunda; ungu mmaan mkheng nga pthla kchiir ri dim chda, ungta Isowr pauna ava plung ktangarri saam lamda.

³²Tunva krin charek lop ava plung khdaat ungta raothla khdaatti am lamda, ungu mmaan ku khat lee ngi mdo thloi ava mdaksaa ki ngi karthe me, pdainu do khim khaija mkheng kingi thloi lamda.

³³Ungta kenyee rek ava klin langlang ki rutan ni mmaan rinpaumin ava Mukpu Jisu Khrista rinkarheel natu kilṭhida, ungta mkheng leen plungnee klin langlang amda.

³⁴Mmaan arlakki kikriing ku khat lee ame, mleija paam kthloi inn kthloi mii maknemva mma mmaki jurda, mdojur naan man ava arhai sin lamda,

³⁵kenyee rek khuther ri thii lamda; kikriing mii pum ktai hin them pik lamda.

³⁶Kupras ki mii, Levi miilai khat, kenyee rekki Barnabas mdo dit in (kuksop chapa mdo ditna) Joseph pi,

³⁷bil khat mdo thloi jurda, ungu sum arva sinda kenyee rek khuther ri thiida.