Read Lamkang DOWLLO 5 Bible Online

DOWLLO 5 - Lamkang bible

DOWLLO 5

¹Pdainu mmiing Anania tdit miilai khatti mnumei Saphira tu kilṭhi ngi paam mruk suwn jur lamda,

²ungta mnumei tu kilṭhi ngi mdojur in paam man angṭhe arkhii chlam thida angṭhe daat arva sin lamda, kenyee rek khuther ri thii lamda.

³Pdainu Pitor ri theda, “Anania, pthla kchiir hin pleinei imti, seitaan ni aplung nga kdim kcha a, ungu talu leiji paam manna angṭhe ado arkhiik pinlet da?

⁴Athloi slii daat thungva ava nah athina ki ado pmemo? Ungta ajur dok thung rukva nah plungbin daat rang pmemo? Tak heppi aplung thungva hava lu ado tlot nuwmda? Nang ngi mii rek hin pleinei mti pdainu Isowr hin.

⁵Anania ngi hava pauna rek maryaak daat le tluwda diyou chda. Ungu hava karyaa mii mkheng hin kṭi amda.

⁶Ksenao rekki rip lamda mma klum lamda kulruwl rangki vakdom lamda.

⁷Ungta ṭhang kdum arveel dilthang ngi tak kthuwk tdit kdei cha kma ngi mnumei arvang lutda.

⁸Ungu Pitor ri mhin theda, “Paamma naanva hava lim daatti ajur inmo, nei kihin athe.” Ungta mma ngi theda, “Oji, mleija hava lim daat.”

⁹Pdainu Pitor ri mhin theda, “Mukpu pthla ado pirsin naanni tak heppi kulrot naan pti? Asuw, thurngot bulli nah innpu kulruwl rek khua ka am daatta, ungu mmaanni nang rukka akukdom lamra.”

¹⁰Tunkat daatti mma ngi mkhu therri tluwda, ungu diyou chda. ksenao rek marvan lu in thungta, kdiyou dokki pha lamda, ungu mmaanni duwn tha kdom lamda, mi innpu bengi alruwl lamda.

¹¹Ungta hava karyaa rinlop mkheng leh mii rek mkheng leen kṭi amda.

¹²Tunva kenyee rek khutti mii rek arlakki tngana rek leh titinna rek tlo lamda, ungu mmaan mkheng nga Solomon dulbukki kurbuk lamda.

¹³Mii murson va ṭoinuwm lamme, pdainu mii rekva mmaanna kparthaang ngi kjat chlam da.

¹⁴Ungta snu psel mikniing ngi tpomda Mukpu rin chlamda miiluwngpa ngi kheel sii kurthuwkda.

¹⁵Ava leiji Pitor mthleng thu marlim pang daat ruk mdo phaak chaak nraan, mii angṭhe ngi lamṭhuwm thung ngi kukoi rek thii lamda, mkowm in ungu mi iinaan tun pi iip lamda.

¹⁶Jerusalem kloi khuwpii thungki mii rek ruk thuwk kurkuk lamda, kukoi ungta pthla ktobor doṭhi arhai ṭhilamda, ungta mmaan mkheng nga pdam pik lamda.

¹⁷Pdainu thiimpu kparthaang ngi mma miiṭhi rek mkheng leh sadusi rek lop tu rip lamda, kdung kheithe nlamda.

¹⁸Mmaanni kenyee rekka kjowng lamda ungu rowng inn thlaang thlaang thung ngi khum lamda.

¹⁹Pdainu jaanni Mukpu Waantamsii ngi thlengda, rowng inn thurngot pvangda duwn thuwṭhi lam thida theda,

²⁰“Va inra luwbuk Inn thung ngi rip inra mii mkheng hinni hava rinkhu pauna ava ason pik in.”

²¹Ungu mmaanni hava maryaak in thungta, khuw mtleile luwbuk Inn thung ngi lut lamda ungta purchuk lamda. Tunva thiimpu kparthaang leh mma miiṭhi rek arva lamda ungta karseel lop rek leh Isreel mii kver rek mkheng own purkuk lamda, ungta rowng inn thungki mdo arvan ṭhii nraanki mii haisi lamda.

²²Pdainu nong klin kpuw rek, ava ngi rowng inn thung ngi marhai in thungta, am lam mda, ungbi sun kinle lamda pau ava song lamda.

²³“Rowng inn ava knetti karkam daat, ungu thurngot krung rekka krip daat lam kdo dee in, pdainu kvanlu in thungta mthungva ku khat lee ame.”

²⁴Tunva luwbuk Inn rawl berksu ungu thiimpu kinreel rekki hava pau aryaa lamda, mmaan mlei thung ngi kdung kngakki tak kthuwk rang kdingi ngak chlam da.

²⁵Ungta miilai khatti arva da mhin inni songda, “Naanni rowng inn thu ado khum in mii rekka, luwbuk Inn thung ngi rip daat lamda mii rek hin mpurchu slii inna.”

²⁶Ava dilli berksu ki nong klin kpuw rektu valamda arvanṭhi nowl lamda, pdaiinu namtrom nong tlo lamme, mleija mii rekki lung ngi mikdeeng raan kdingi ṭi lamda.

²⁷Ungta mmaanni kenyee rekka arvanṭhi thilamda, karseel lop maiṭhuwmmi prip lamda. Thiimpu kparthaang ngi paukhewl lamda,

²⁸theda, “Hava miing ngi purchuk maan dinu kdung ngi pau kdo pṭum in, anto daat joso naan do purchu ngi Jerusalem ma kdim kcha a, ungta hava Miilai hiia neen kleenni apbuwk nuwm inna.”

²⁹Pdainu Pitor leh kenyee rekki arthawng lamda, “Miirek ava hinva neenni Isowr pṭoi chnikaan di.

³⁰Naanni ding leen pthoi inti ado eayown Jisu ava neenki Kpah ungu Isowr ava ngi pring pinleda.

³¹Isreel mii ngi plungren mdo hur nra ungu pnu rek mdo ptlot pik nra, Isowr ri Mma berksu ungu kaklan pik rangki Mma khut chang ktongtha khiingda.

³²Ungta neenva hava sakhi kdo piik in, ungu Isowr ri Mma dothe kupṭoi rek hin mdo piik pthla kchiir ava rukva sakhi.”

³³Mmaanni hava maryaak in thungta kdung plung pthit lamda ungu eayou nuwm lamda.

³⁴Pdainu karseel lop thungki Pharisi miilai khat, mmiing Gamaliel mdo dit, mii mkheng do kjat chaak, Nowlam chukpu khatti ripda, mii rek ava mpha mruk tummi duwn mdo pthuw nraan pau pṭumda.

³⁵Ungta mma ngi mhin inni theda, “Isreel mii rek kurthuwk hava mii rek hin ado tlot in ava tuk asut chaan.

³⁶Mleija hava mii rek dungi mdaksaa kpirlin kcha Theodas tdit miilai khat thlengda, mii arjaa plii arveelli mdil ṭoida; pdainu mma eayou lamda, ungu mma dilkṭoi mii rek ava doksi liit kma kinṭheu tir chlamda.

³⁷Mma diltha miing kuplut nit rek mpha thung ngi Judas tdit Galil miilai khat thleng da, mdilkṭoira mii angṭhe archil dokda; mma ruk maang chda ungu mdil kṭoi mii mkheng nga kinṭheu tir chda.

³⁸Ava leiji tun tunva neiji akthe inna, hava miirek thungki karneeng inra msangtlaak inni ama pthiin; mleija mdo bin in ungu mii rek thungki hava lea kthuwk mkurthutbi, ava dosi nime.

³⁹Pdainu Isowr hinki mkurthutbi, mmaanna naanni var pthi pchaang nimaanti. Naanni Isowr kapkhaan kurthuwk naandi!”

⁴⁰Ava leiji mmaanni mma do parseel lou lamda, ungu kenyee rekka own lamda, Jisu miing ngi mpau ma nraan pau pṭum lamda, ungta bun lamthida psun pthii lamda.

⁴¹Ava dilli mmaanni miing ava tummi ningkja ktaakki kja kakham mdo phaak in ava kuhuija kdingi kanpa ngi karseel lop ma lamthida sun chlamda.

⁴²Ungta mnii ktaiji luwbuk Inn thu ungu innbung kteen tha Jisua Khrista pi dilamda kpurchuk leh kparyaam thung ngi down liit lamme.